Read bahnar I Pot 7 Bible Online

I Pot 7 - bahnar bible

I Pot 7

¹Sôlômôn pơm hnam pơtao sư keh đang lăm mơjĭt-pêng sơnăm.

²Sư pơm hnam pơtao tơ Bri Liban tor sư pơđăm-jĭt hlok, wơ̆l sư 'bar-jĭt pơđăm hlok, kơjung sư mơjĭt-pơđăm hlok. Sư pơtăm pêng trong jrăng hăm 'long hơngo; đei 'long tơpơng roh kơpal, jrăng sư kư̆m pơm hăm 'long hơngo.

³Ala bơbŭng hnam pơtao sư pơ̆ng sap hăm tơ̆r 'long hơngo, đei puăn-jĭt pơđăm tŏ hơpok pơjăng, minh trong roh mơjĭt-pơđăm tŏ, sư pơ̆ng hơgơn 'bơ̆t kơ̆l jrăng.

⁴Đei pêng trong 'măng-'mŏk sư pơrĕng tơklă băl, kư̆ kơ rim pêng tŏ 'măng-'mŏk sư minh khŭl.

⁵Đĭ-đăng 'măng păng 'long dơ̆ng măng đei puăn hlak tơnang 'măng, tơklă băl, kư̆ pêng tŏ 'măng minh khŭl.

⁶Sư pơm kơdeng hăm jrăng, kơdeng tor sư 'bar-jĭt pơđăm hlok, wơ̆l să sư mơjĭt-pơđăm hlok, gah anăp kơdeng âu sư đei jrăng pơrĕng gơweng păng đei dan bơbŭng.

⁷Sôlômôn sư kư̆m pơm minh pôm anih wă dan tang-dŏ pơtao; anih sư sek tơlang; đe krao Anih Trŏ Hơnơ̆ng, anih sek tơlang noh sư pơm hăm tơ̆r 'long hơngo. Sư pơm sap đơ̆ng hơnă truh tơ bơbŭng.

⁸Hnam mă pơtao Sôlômôn oei sư pơm gah rŏng kơ hnam tih 'noh. Sư man lei-lăi thoi noh mơ̆n. Sư kư̆m pơm minh pôm hnam, ăn kơ akăn sư, kon drŏ-kăn Pharaôn, sư pơm lei-lăi thoi noh mơ̆n.

⁹Đĭ-đăng hnam pơtao âu, sư pơm păng tơmo gĭt ngăl, sư bŏk blah teh tơmo âu pơtŏ hơgăt trŏ kiơ̆ gah rŏng păng gah klak. Mă đơ̆ng lăm truh tơ 'nguaih đơ̆ng ala truh tơ kơpal mă gah rŏng anăp.

¹⁰Hơnă sư pơm hăm tơmo gĭt, tơmo să, minh hlak tor sư pơđăm hlok đei tơmo mơ'nah tor sư să puăn hlok.

¹¹Sư lơ̆k hơnă hăm tơmo gĭt blah kăt kiơ̆ pơtŏ bơih. Sư lơ̆k hăm tơ̆r 'long hơngo kơpal.

¹²Sư pơm tăp dăr tơnăr hăm pêng trong tơmo gĭt, păng roh pêng trong tơpơng hăm tơ̆r 'long hơngo, sư pơm lei-lăi thoi lăm kơdeng, hăm gah cham Hnam akŭm Kră Yang.

¹³Pơtao Sôlômôn wơh bơngai năm krao wơ̆n Hiram đơ̆ng pơlei Tirơ.

¹⁴Hiram minh 'nu kon drŏ-nglo, mĕ sư bơngai drŏ-kăn adro đơ̆ng lăm adrĕch Neptali, 'bă sư sơ̆ đơ̆ng bơngai Tirơ, 'bă sư pơm bơ̆jang hling đak kong, Huram sư kư̆m minh 'nu bơngai gơh hơgei thoi 'bă sư sơ̆ bơ̆jang hling đak kong, sư năm truh tơ pơtao Sôlômôn, sư jang ăn kơ pơtao Sôlômôn.

¹⁵Huram sư hling pơm 'bar tŏ jrăng hăm kong, sư hling rim jrăng kơjung mơjĭt-tơhngam hơgăt dah iŏk tơlei pơtŏ sư, hơpôm sư đei mơjĭt-'bar hơgăt.

¹⁶Sư tuh pơm kơ̆l 'bar tŏ jrăng hăm kong sư pơdơ̆ng kơpal jrăng, kơjung kơ̆l jrăng noh pơđăm hơgăt mă jrăng gah to pơđăm hơgăt mơ̆n.

¹⁷Sư kư̆m hling hơdrao hăm kong dan tơ rim kơ̆l jrăng; rim kơ̆l jrăng sư pơm tơpơh dăng tơlei rơbưn hăm kong tanh gơwŏk đơ̆ng hơdrao kơ̆l jrăng, rơbưn âu sư pơm nhen thoi pơkao.

¹⁸Huram sư kư̆m hling 'bar trong plei gărnăt hăm kong chô̆ tơ hơdrao rim kơ̆l jrăng wă pơgong sư 'lơ̆ng hơbŏ.

¹⁹Rim kơ̆l jrăng lăm kơdeng anăp sư hling thoi pơkao 'brê tih sư puăn hơgăt.

²⁰Rim 'nguaih kơ̆l jrăng 'noh sư hling minh trong; đei 'bar-hrĕng tŏ plei gărnăt, sư dăng tăp dăr kơ̆l jrăng 'noh.

²¹Huram sư pơtăm 'bar tŏ jrăng noh anăp Hnam akŭm Kră Yang, sư pơtăm minh pôm jrăng gah 'ma. Sư anăn jrăng 'noh Jakin; sư pơtăm jrăng gah 'ngiĕo 'noh sư anăn jrăng Bôas.

²²Tôch kơ̆l jrăng 'noh sư pơm rup pơkao tŏng-mŏng, đĭ dôm lu jrăng 'noh sư pơm keh bơih.

²³Sư kư̆m pơm bơng đak hơpôm hling hăm kong să mơjĭt hơgăt; kơjung pơđăm hơgăt, đei pêng-jĭt hơgăt jum dăr.

²⁴Rok jih bơng đak 'noh sư tuh pơm rup get đak 'bar trong tăp dăr kơ bơng 'noh; kiơ̆ kơ lăm minh hơgăt mơjĭt tŏ get sư pơm kơtă hăm bơng đak 'noh,

²⁵Bơng đak 'nâu dan kơpal kơdŭ rŏng mơjĭt-'bar tŏ rơmo tơwih băl kiĕng, pêng tŏ tơ'bong sư tơwih gah hơlĕch, pêng tŏ tơ'bong sư tơwih gah bơmơ̆t, pêng tŏ tơ'bong sư tơwih gah gơal, pêng tŏ gah yă-nơ̆m.

²⁶'Bơ̆r bơng hơ'bơ̆l tŏ pah, gơnăp sư thoi gơnăp pơnhan đei thoi pơkao tŏng-mŏng, bơng 'nâu mong đei puăn-jĭt puăn-rơbâu lit đak.

²⁷Sư kư̆m pơm mơjĭt tŏ gre hăm kong jơ̆ng đei tang-wang hăm kong, lăm minh pôm gre 'noh tor sư 'bar hlok, wơ̆l sư kư̆m 'bar hlok; kơjung sư minh hlok minh puăt.

²⁸Sư pơm gre 'noh sư hling tơnăr hăm kong kơtă kơ akâu gre.

²⁹Rim tơnăr 'noh sư hling đei rup dăm-brang, rup rơmo păng rup chêrubim, sư pơm kơpal păng ala kơ rup dăm-brang, rup rơmo, păng rup chêrubim đei chhơ̆ rup pơkao ngăl.

³⁰Rim kơ gre 'noh sư pơm puăn tŏ jơ̆ng păng tơnung sư hăm kong, puăn pah mum 'noh sư pơm đei jơ̆ng sư wă kơ pơdơ̆ng kơjăp. Puăn tŏ jơ̆ng 'nâu hling pơklep kơ akâu gre, gah đaih kơ jơ̆ng gre âu đei chhơ̆ rup pơkao tŏng-mŏng.

³¹Kơpal hơnă gre đei hling gor pơm ala, gor 'nâu minh hơgăt hlom jrŭ tơ lăm tơpơh pơ̆t minh puăt, gah đaih tơnăr akâu sư hơli pơiel pơgong. Tơnăr sư pơm hăm kong blat ưh kơ hơpôm ala kơ rim hlak kong akâu sư noh đei.

³²Ala kơ rim hlak kong akâu sư noh đei puăn tŏ jơ̆ng gre, tơnung sư rim kơ jơ̆ng gre 'noh kơjung sư tơpơh pơ̆t minh puăt.

³³Jơ̆ng sư 'noh pơm lei-lăi thoi jơ̆ng gre aseh tơpă, lu tơnung dăr gre, tă kơ tuh hling ngăl.

³⁴'Bơ̆t rim puăn pah mum, ala kơ puăn tŏ jrăng tơjră sư hling mam pơm tơklep hăm akâu gre.

³⁵'Bơ̆r kơpal gre sư đei gor hơpôm, kơjung sư minh puăt hơgăt, akâu gor păng jơ̆ng sư hling kơtă hăm kơpal 'bơ̆r gre.

³⁶Kơpal kơ mam blat gơnăp hơpôm kơpal lu tơmam blat akâu gre sư chhơ̆ lu rup chêrubim, dăm-brang, hla gol, anih ayơ oei rơhơi sư chhơ̆ trong pơkao tăp dăr.

³⁷Sư kư̆m pơm rok lei-lăi sư pơm đei mơjĭt tŏ gre thoi noh, sư hling ngăl đĭ lu gre.

³⁸Sư pơm mơjĭt tŏ bơng đak, man hling hăm kong, lăm minh tŏ bơng đak 'noh sư mong tuh đei tơhngam-hrĕng tơhngam-jĭt lit đak, minh pôm bơng đak kơjung sư 'bar hlok, sư tah lu bơng đak noh tơ lăm mơjĭt tŏ gre, minh pôm gre minh pôm bơng đak noh.

³⁹Sư dan pơđăm tŏ gre gah gơal pơđăm tŏ gre gah yă-nơ̆m kơ hnam akŭm. Sư kư̆m pơdơ̆ng bơng đak 'bơ̆t mum thoi dơnâu 'noh sư kư̆m 'măn gah 'ma, sư tơwih gah hơlĕch gơal kơ Hnam akŭm.

⁴⁰Sư kư̆m pơm gŏ glah chơ'mŏng păng kơthao. Thoi noh. Hiram bơ̆jang keh dôm tơdrong jang mă pơtao Sôlômôn pơjao ăn kơ sư jang lăm Hnam akŭm Kră Yang.

⁴¹Pơm 'bar tŏ jrăng hăm kong, pơm kơ̆l sư hơgơn kơpal kơ 'bar tŏ jrăng kong, lu hơdrao hăm kong klơ̆p lê̆ kơpal kơ̆l jrăng.

⁴²Đei puăn-hrĕng tŏ plei gărnăt păng kong, sư pơrĕng 'bar trong minh trong minh-hrĕng tŏ sư dăng tăp dăr tôch kơ kơ̆l jrăng.

⁴³Đei mơjĭt tŏ gre, sư dan mơjĭt tŏ bơng đak kơpal lu gre noh.

⁴⁴Sư pơm minh pôm bơng đak tih păng mơjĭt-'bar tŏ rơmo sư pơm man ala kơ bơng đak.

⁴⁵Sư pơm lu gŏ glah, gơ'beng păng kơthao. Dôm lu tơmam âu Hiram pơm ăn kơ pơtao Sôlômôn lăm Hnam akŭm Kră Yang 'Bok Kei-Dei. Sư pơm hăm kong, sư pơiel rang.

⁴⁶Pơtao Sôlômôn athei Hiram man lu tơmam âu tơ anih thŭng (Jôrđăn) tơ lăm anih 'noh đei teh lơ̆n, anih 'noh sơlam Sukôt păng Sarethan.

⁴⁷Pơtao Sôlômôn sư ưh kơ đei kŏng lăng tơmam 'noh ôh, yua kơ tơmam lơ dêh, sư kư̆m ưh kơ đei kĕ hơlen kŏng lăng kong 'noh dôm yơ mơ̆n.

⁴⁸Pơtao Sôlômôn sư kư̆m pơm tơmam yua lăm Hnam akŭm Kră Yang sư pơm chơnang soi hăm maih; sư kư̆m pơm gơ'bang 'măn 'bĕng hăm maih.

⁴⁹Jơ̆ng ŭnh kơđeng sư pơm hăm maih se, pơđăm tŏ sư 'măn gah 'ma, pơđăm tŏ gah 'ngiĕo, 'bơ̆t anăp anih rơgoh hloh, sư kư̆m ăn pơm lu pơkao, ŭnh kơđeng păng săng kep kăt păng maih.

⁵⁰Dôm lu pơnhan, săng, kăt brai ŭnh kơđeng, kơthao, grang tơmam mă mong tơnuh păng grang mong ngar sư pơm păng maih, dôm lu gơwŏk 'măng, sư pơm kơ lu 'măng lăm anih Rơgoh Hloh, hăm 'măng Hnam akŭm, sư kư̆m pơm hăm maih ngăl.

⁵¹Đĭ-đăng dôm tơdrong jang pơtao Sôlômôn pơm Hnam akŭm Kră Yang pơm keh đĭ, đang kơ 'noh pơtao Sôlômôn wơh đe chĕp đĭ dôm tơmam 'bă sư Đawit pơyơ̆r sư 'măn lê̆ lăm hnam mong tơmam, lu hu, maih păng dôm tơmam yua nai dơ̆ng mơ̆n, tah lăm Hnam Kră Yang.