Read bahnar II Pot 1 Bible Online

II Pot 1 - bahnar bible

II Pot 1

¹Đơ̆ng rŏng kơ Ahap lôch, lu bơngai Môap iung blah lu bơngai Isơrael.

²Đei minh năr ei, tơ Pơlei Samari, Ahasia huŏng đơ̆ng 'măng-'mŏk hnam kơjung akâu sư rơka, jĭ dêh, na sư wơh bơngai jang kơ sư năm păng tơtă nơ̆r: “Năm jet apinh yang Baal Sêhup, yang Pơlei Ekrôn wă kơ băt inh gô klaih đơ̆ng jĭ 'nâu dah ưh?”

³Mă-lei linh jang 'lơ̆ng Kră Yang khan kơ Êli bơngai Tisbit thoi âu: “Iung bĕ năm tơ'bơ̆p lu bơngai mă 'bok pơtao đe Samari wơh păng khan kơ lu sư: ‘Lăm Isơrael ưh kơ đei Kră Yang 'Bok Kei-Dei hă na iĕm năm jet apinh yang Baal Sêhup, yang Pơlei Ekrôn noh?’

⁴Yua kơ thoi noh, na Kră Yang 'Bok Kei-Dei khan: ‘Ih ưh kơ đei iung đơ̆ng giơng ih 'bĭch noh ôh sĭt ih gô lôch.’ ” Thoi noh 'bok Êli yak năm hloi.

⁵Lu bơngai mă pơtao wơh noh wơ̆t brŏk tơ sư dơ̆ng, na pơtao jet lu sư: “Yua kơ kiơ iĕm wơ̆t brŏk?”

⁶Lu sư tơl: “Đei minh 'nu bơngai tơ'bơ̆p nhôn păng khan kơ nhôn: ‘Iĕm brŏk bĕ tơ pơtao mă wơh iĕm 'noh păng iĕm roi kơ sư khan: Kră Yang khan bơih thoi âu: ‘Lăm lu bơngai Isơrael ưh kơ đei Kră Yang 'Bok Kei-Dei hă na ih wơh athei năm jet yang Baal Sêhup, yang pơlei Ekrôn 'noh? Yua kơ noh, ih ưh kơ đei iung đơ̆ng giơng ih 'bĭch noh ôh, sĭt ih gô lôch?!”

⁷Pơtao jet hloi lu sư: “Bơngai mă năm tơ'bơ̆p lu iĕm păng roi kơ iĕm tơdrong noh sư bơngai thoi yơ?”

⁸Lu sư tơl: “Bơngai noh hrŭk ao akar sŏk sem bri păng tơ̆n tơlei tơ̆n akar.” Pơtao khan: “'Nei Êli bơngai Tisbit noh bơih.”

⁹Pơtao wơh hloi minh 'nu yŏng linh chông pơđăm-jĭt 'nu linh sư năm tơ Êli, kơplah noh Êli oei ngôi kơpal wĕch kông. Yŏng linh ei khan kơ sư: “Ơ bơngai mă Kră Yang 'Bok Kei-Dei yua, pơtao wă kơ ih jur.”

¹⁰Mă-lei Êli tơl yŏng linh mă wei pơđăm-jĭt 'nu linh 'noh khan: “Dah inh bơngai Kră Yang 'Bok Kei-Dei yua, apinh ŭnh đơ̆ng plĕnh jruh sa lê̆ ih hăm pơđăm-jĭt 'nu linh ih 'noh.” Na ŭnh đơ̆ng plĕnh jruh sa lê̆ yŏng linh ei păng pơđăm-jĭt 'nu linh sư hloi.

¹¹Pơtao wơh dơ̆ng yŏng linh nai hăm pơđăm-jĭt 'nu linh plơ̆ng năm tơ Êli, yŏng linh 'nâu khan kơ Êli: “Ơ bơngai mă Kră Yang 'Bok Kei-Dei yua, pơtao khan kơ ih: ‘Jah jur mă tĕnh.’ ”

¹²Mă-lei Êli tơl yŏng linh ei: “Dah inh bơngai Kră Yang 'Bok Kei-Dei yua, inh apinh ŭnh đơ̆ng plĕnh jruh sa lê̆ ih hăm pơđăm-jĭt 'nu linh ih noh hloi. Ŭnh Kră Yang 'Bok Kei-Dei jruh hloi đơ̆ng plĕnh chhông sa lê̆ yŏng linh ei hăm pơđăm-jĭt 'nu linh sư.

¹³Pơtao Ahasia wơh dơ̆ng minh 'nu yŏng linh mă pêng năm hăm pơđăm-jĭt 'nu linh mă sư wei yŏng linh 'nâu tŏk truh tơ Êli tơ kơpal kông, sư sơtơ̆p kŭl-tăng 'bơ̆t anăp Êli, apinh thoi âu: “Nhôn đĭch đam ih ơ bơngai mă Kră Yang 'Bok Kei-Dei yua, apinh ih lăng tơdrong arih inh păng tơdrong arih đĭ-đăng pơđăm-jĭt 'nu bơngai 'nâu gĭt găl.

¹⁴To ŭnh đơ̆ng plĕnh jruh chhông sa lê̆ 'bar 'nu yŏng linh păng 'bar khŭl linh bre sư bơih, mă-lei dang ei, apinh ih lăng tơdrong arih inh gĭt găl 'bơ̆t anăp ih.”

¹⁵Linh jang 'lơ̆ng Kră Yang khan kơ Êli: “Năm wăi ih jur năm tơ sư, 'nĕ kơ hli kiơ.” Thoi noh Êli jur năm kiơ̆ yŏng linh ei, năm tơ pơtao.

¹⁶Sư khan kơ pơtao: “Kră Yang khan thoi âu: Ih wơh bơngai năm jet apinh yang Baal Sêhup, yang Pơlei Ekrôn, lăm Isơrael ưh kơ đei Kră Yang 'Bok Kei-Dei mă ih wă jet apinh nơ̆r Sư bơih hă? Yua kơ noh bơih na ih ưh kơ đei iung đơ̆ng giơng ih 'bĭch noh ôh, sĭt ih gô lôch.”

¹⁷Thoi noh Ahasia lôch kiơ̆ thoi nơ̆r Kră Yang yua bơih Êli khan. Yua kơ pơtao Ahasia ưh kơ đei kon drŏ-nglo lei na oh sư Jôram tŏk pơm pơtao pơtrơp đơ̆ng sư, lăm sơnăm mă 'bar chăl Jôram pơgơ̆r, sư kon Jêhôsaphat pơtao dêh Juđa.

¹⁸Dôm lu tơdrong jang nai mă Ahasia đei pơm đe đei chih boih lăm sơ̆p hla bơar hơ'mon kơ chăl arih lu pơtao đe Isơrael.