Read bahnar II Pot 10 Bible Online

II Pot 10 - bahnar bible

II Pot 10

¹Tơ Samari, đei tơpơh-jĭt 'nu kon drŏ-nglo Ahap oei lăm Pơlei Samari. Jêhu chih kơthơ ăn kơ lu kră pơlei păng lu yŏng pơgơ̆r tơ Jêsreel păng lu bơngai mă wei-lăng kon drŏ-nglo Ahap chih khan:

²“Tơ anih lu iĕm đei lu kon drŏ-nglo yŏng tơ'ngla iĕm, đei lơ gre, đei aseh hai, đei khêl đao tơmam tơblah păng đei lơ pơlei tih kơjăp tăm. Thoi noh bơih, mưh iĕm đei iŏk kơthơ 'nâu,

³iĕm athei rơih iŏk lăm lu kon drŏ-nglo yŏng tơ'ngla iĕm, bơngai ayơ mă tơpăt tôm tơdrong gơh hơgei hloh, pôk sư oei 'bơ̆t tang-dŏ 'bă sư, đơ̆ng noh iung tơblah yua kơ adrĕch adrung yŏng tơ'ngla iĕm.”

⁴Mă-lei lu sư hli tơrơ dêh, păng khan: “'Nhŏ kơ 'bar 'nu pơtao ưh kơ kĕ dơ̆ng 'bơ̆t anăp sư, tơma nhôn khan tơblah sư kĕ liơ 'nei?”

⁵Kuan wei hnam pơtao păng lu kuan wei pơlei păng lu kră pơlei, păng bơngai bơtho wei-lăng kon drŏ-nglo Ahap, pơtruh nơ̆r roi kơ Jêhu khan: “Lu nhôn jơ̆ đĭch đam ih; lu nhôn gô pơm tôm tơdrong ih athei nhôn pơm, lu nhôn ưh kơ wă chă rơih bu pơm pơtao ôh, ih pơm bĕ tơdrong kiơ, kiơ̆ kơ ih tơchĕng khan lăp trŏ.”

⁶Jêhu chih kơthơ wơ̆t mă 'bar khan: “Dah iĕm mơ̆t gah ĭnh păng 'maih wă chu kiơ̆ mơ̆ng ĭnh athei, lei iĕm athei chơ̆ng kơ̆l lu kon drŏ-nglo yŏng tơ'ngla iĕm; đơ̆ng noh năr dơning, kư̆m kơplah jơ 'nâu mơ̆n, iĕm athei chĕp ba kơ̆l noh năm tơ ĭnh tơ Pơlei Jêsreel.” Thoi noh, lu kon drŏ-nglo pơtao, đĭ-đăng tơpơh-jĭt 'nu oei tơ lăm hnam lu bơngai yŏng mơng lăm pơlei tih ei ngăl, đe bơtho, 'me rong lu sư.

⁷Lu đe ei đei iŏk kơthơ noh, na rôp hĭ tơpơh-jĭt 'nu kon drŏ-nglo pơtao, pơlôch đĭ, đơ̆ng noh tah lê̆ kơ̆l lu sư lăm bai, ba truh tơ Jêhu tơ Pơlei Jêsreel.

⁸Đei bơngai đe wơh năm truh tơ ei roi ăn kơ sư khan: “Đe chĕp ba kơ̆l lu kon drŏ-nglo pơtao noh tơ âu bơih.” Jêhu tơl: “Iĕm dan 'bơ̆t 'măng dur pơlei, dan pơm 'bar pôi, lê̆ 'bơ̆t dei dĭng truh pơgê dơning.”

⁹Pơgê đơ̆ng rŏng, sư lĕch, dơ̆ng 'bơ̆t anăp đĭ-đăng kon pơlei, na khan: “Lu iĕm ưh kơ 'bơm, ưh kơ pơm yoch ôh. Inh 'nâu bơngai mă pơm plơ̆ kơ yŏng tơ'ngla ĭnh păng pơlôch sư, mă-lei bĭ lu bơngai 'nâu, bu pơlôch lu sư?

¹⁰Lei na dang ei, bơ̆n athei băt lăm dôm nơ̆r Kră Yang đei khan bơih gah adrĕch Ahap, ưh kơ đei nơ̆r ayơ huŏng tơ teh; yua kơ Kră Yang pơkeh bơih nơ̆r sư pơkă mă sư yua 'bơ̆r Êli đĭch đam sư pơma.”

¹¹Jêhu kư̆m pơlôch đĭ lu adrĕch Ahap mă oei oei lăm Pơlei Jêsreel, pơlôch hloi kuan tih, lu buăl juăt sư ngơ-ngei, păng lu 'bok soi tơm sư, ưh pă đei lê̆ minh 'nu bu hloi.

¹²Đơ̆ng noh, Jêhu iung năm tơ Pơlei Samari. Tơ rok trong, tơ Pơlei Bet Êket, bơsŭn bơngai wei triu,

¹³sư tơ'bơ̆p hĭ lu 'nhŏng oh Ahasia pơtao đe Juđa, sư jet: “Lu iĕm bu?” Lu sư tơl: “Lu nhôn 'nhŏng oh Ahasia, nhôn wă jur năm ngôi tơ lu kon drŏ-nglo pơtao hăm lu kon drŏ-nglo mĕ pơtao.

¹⁴Na Jêhu athei lu đam sư: “Năm rôp lu sư, rôp arih.” Đe rôp lu sư, arih, đĭ-đăng puăn-jĭt 'bar 'nu; đơ̆ng noh pơlôch lu sư 'bơ̆t jê̆ đak sơlŭng, Pơlei Bet Êket bơsŭn bơngai wei triu. Sư pă đei rong arih hơya minh 'nu bu.

¹⁵Lăp Jêhu yak weh đơ̆ng noh, sư tơ'bơ̆p Jêhônadap, kon drŏ-nglo Rêkap tŏk-bŏk oei năm sơng sư. Sư kơkuh kơ Jêhônadap păng khan: “Jơhngơ̆m ih hăm tơpăt tơpă hăm ĭnh, thoi ĭnh tơpăt tơpă hăm ih bơih?” Jêhônadap tơl: “Jơhngơ̆m ĭnh tơpăt tơpă hăm ih” Jêhu khan dơ̆ng: “Dah ih tơpăt tơpă lei, ih chro ti ih kơ ĭnh.” Na Jônađap chro ăn kơ sư ti. Jêhu rôp ti hơtŏk Jônadap hao gre aseh, hơdai hăm sư.

¹⁶Păng sư khan: “Năm hơdai ĭnh bĕ, lăng jơhngơ̆m ĭnh tơnăp kơjăp hăm Kră Yang.” Thoi noh, Jônadap hao gre hơdai sư.

¹⁷Lăp sư mơ̆t lăm Pơlei Samari bơih, sư pơlôch pơđĭ lu bơngai lăm adrĕch Ahap lăm Pơlei Samari dĭng mah adrĕch 'nei goh hloi, thoi nơ̆r Kră Yang khan kơ Êli bơih.

¹⁸Jêhu pơpôi đĭ-đăng kon pơlei păng khan kơ lu sư: “Ahap kơkuh jang kơ yang gah Baal tŏ sĕt dêh: Inh Jêhu gô kơkuh jang ăn kơ yang Baal lơ hloh.”

¹⁹Dang ei na akŭm pơpôi ăn kơ ĭnh dôm lu bơngai khan lê̆ adrol yang Baal noh bĕ lu bơngai kơkuh kơ sư păng đĭ-đăng lu 'bok soi sư. Ưh kơ gơh krŭl minh 'nu bu ôh, yua kơ ĭnh wă pơyơ̆r minh pôm tơmam soi tih ăn kơ yang Baal. Dah bơngai bu ưh kơ truh sĭt bơngai noh ưh kơ arih ôh.” 'Noh Jêhu chă đon wă pơlôch pơtôch lê̆ lu bơngai bơ̆jang kơkuh kơ yang Baal.

²⁰Jêhu athei: “Athei krao akŭm pơm giĕng tih, wă soi kơkuh kơ yang Baal. Thoi noh đe roi tơbăt pơm giĕng ei.

²¹Jêhu wơh lu bơngai năm jơ̆p-jang char Isơrael roi tơbăt athei đĭ-đăng đĭch đam mă jang kơ yang Baal khŏm năm truh. Lu sư năm tôm đĭ-đăng ưh kơ đei krŭl minh 'nu bu hloi. Lu sư mơ̆t lăm hnam yang Baal; lu sư mơ̆t 'bĕnh đơ̆ng jih pah âu truh tơ jih pah to, bơngai 'bĕnh kơ hnam dơ'bit.

²²Na Jêhu khan kơ bơngai wei ao kơ̆m giĕng, chă asong ao kơ̆m giĕng 'noh kơ đĭch đam jang kơ yang Baal 'noh bĕ. Na bơngai ei chă asong lu sư ao 'noh.

²³Jêhu păng Jêhônadap, kon drŏ-nglo Rêkap mơ̆t lăm hnam yang Baal, khan kơ lu bơngai kơkuh kơ yang Baal: “Iĕm chă lăng mă nhen, tơ âu hăm đei bơngai ayơ đĭch đam Kră Yang ưh? Tơ âu; lu đĭch đam kơkuh kơ yang Baal đĕch.”

²⁴Lu sư mơ̆t wă pơyơ̆r dôm tơmam soi, păng tơmam soi 'buh pơkhôi. Jêhu dan tơhngam-jĭt 'nu bơngai, athei lu sư răp tơ 'nguaih hnam, păng athei lu đe ei: “Dah đei bơngai bu lăm lu bơngai mă ĭnh pơjao lăm tơpang ti iĕm 'nâu, oei đei klaih 'mơ̆i lei bơngai mă lê̆ lu đe ei klaih hiong 'nei sư gô lôch tơplih lu đe noh.”

²⁵Lăp lu sư pơyơ̆r tơmam soi 'buh pơkhôi đang bơih, Jêhu khan kơ lu linh gak păng lu yŏng tih linh: “Mơ̆t pơlôch lu sư bĕ, pơlôch pơđĭ, 'nĕ kơ ăn bu gơh lĕch.” Thoi noh na lu sư pơlôch lu đe ei hăm đao gưm, lu bơngai gak păng lu yŏng tih linh klơ̆m lê̆ atâu lu đe ei tơ 'nguaih, na mơ̆t lăm anih hnam yang Baal.

²⁶Lu sư yuih lê̆ gơ'bang soi đơ̆ng lăm hnam yang Baal; na soh lê̆.

²⁷Teh pơchah lê̆ rup man yang Baal, hăm yuih lê̆ hnam sư, pơm kơ anih noh jing anih chă bơyơ̆ng 'bâu ôm, truh tơ dang ei,

²⁸Jêhu pơrăm yang Baal pơtôch lê̆ đơ̆ng lu bơngai Isơrael.

²⁹Mă-lei, sư ưh kơ achăng lê̆ ôh tơdrong yoch Jêrôbôam, kon drŏ-nglo Nêbat noh bơih mă hlôi pơm kơ lu bơngai Isơrael pơm yoch. Noh kơkuh kơ rup yang rơmo đe pơm hăm maih tơ pơlei Bethel păng tơ Pơlei Đan.

³⁰Kră Yang khan kơ Jêhu: “Kơlih kơ ih pơm trŏ dêh, sek tơpăt 'bơ̆t anăp Inh păng pơm kơ adrĕch Ahap kiơ̆ thoi Inh wă, na kon drŏ-nglo ih gô hơ-oei 'bơ̆t tang-dŏ pơtao, pơgơ̆r lu bơngai Isơrael dĭng truh tơ puăn jơhnơr.

³¹Mă-lei Jêhu ưh kơchăng đĭ jơhngơ̆m pơm kiơ̆ tơdrong juăt Kră Yang 'Bok Kei-Dei Isơrael, sư ưh kơ weh achăng lê̆ đơ̆ng tơdrong yoch Jêrôbôam, bơngai mă pơhlŭ lu bơngai Isơrael pơm yoch.

³²Kơplah noh sơ̆, Kră Yang pơm tơhiong pơoch lê̆ teh lăm char Isơrael, pơm kơ Hasael blah iŏk jei tơ jơ̆p-jang lăm char Isơrael.

³³Blah tơgar iŏk đĭ-đăng tơring đơ̆ng đak krong Jôrđăn dĭng truh tơ gah hơlĕch, đĭ dêh gah Gileat, teh khŭl bơngai Gat, Rubên, păng adrĕch Manase, đơ̆ng Pơlei Arôe, 'bơ̆t thong đak Arnôn truh tơ dêh Gileat păng dêh Basan.

³⁴Dôm lu tơdrong jang Jêhu, tơdrong jang nai dơ̆ng, păng tơdrong nuih kơtang sư, đei đe chih lăm sơ̆p hla bơar tơdrong hơ'mon gah lu pơtao đe Isơrael.

³⁵Sư lôch thoi tep hiôk kiơ̆ lu yă 'bok sư, đe 'bŭ sư tơ Pơlei Samari; Jêhôahas, kon drŏ-nglo sư, pơm pơtao pơtrơp đơ̆ng sư.

³⁶Jêhu pơgơ̆r lu đe Isơrael đunh đei 'bar-jĭt tơhngam sơnăm tơ Pơlei Samari.