Read bahnar II Pot 11 Bible Online

II Pot 11 - bahnar bible

II Pot 11

¹Lăp yă Athalia, mĕ pơtao Ahasia 'bôh kon drŏ-nglo sư lôch bơih, sư iung blah hloi, pơlôch đĭ-đăng adrĕch pơtao.

²Mă-lei Jêhôseba kon drŏ-kăn pơtao Jêhôram, sư noh mŏ Ahasia, rôp tơtông Jôas, kon drŏ-nglo Ahasia đơ̆ng lăm lu kon tơdăm pơtao mă yă Athalia wă pơlôch, đơ̆ng noh ôn lê̆ sư lăm anih tep, oei hăm yă mă rong sư păng ôn lê̆ sư wă kơ Athalia chă ưh kơ 'bôh; yua kơ thoi noh na đe huay kơ đei pơlôch sư.

³Sư oei hăm Jehôseba, ôn tơ hnam Kră Yang lăm tơdrâu sơnăm kơplah Athalia pơgơ̆r dêh char Juđa.

⁴Sơnăm mă tơpơh, 'bok soi Jêhôiada athei bơngai krao lu 'bok tih mă pơgơ̆r minh-hrĕng 'nu linh gah khŭl linh Karit păng lu linh mă kiơ̆ wei pơtao noh năm tơ sư lăm hnam akŭm kơkuh kơ Kră Yang. Sư pơma pơkă pơgơ̆p hăm lu đe ei păng athei lu đe ei pơkă hăm sư tơ lăm hnam akŭm kơkuh kơ Kră Yang; na sư tơhlâu tơ'bôh ăn kơ lu đe ei kon tơdăm pơtao.

⁵Sư athei lu đe ei: “'Nâu tơdrong mă lu iĕm gô pơm; truh năr pơdơh Sa'bat, iŏk klah asong pơm pêng khŭl minh khŭl lu iĕm gô wei anih pơtao;

⁶minh khŭl iĕm gô gak 'măng dur Sur, na minh khŭl iĕm gô gak 'bơ̆t 'măng jang tơ rŏng lu bơngai wei pơkao, hnam pơtao găn ưh kơ ăn bu mơ̆t lăm noh.

⁷Đơ̆ng noh dơ̆ng, 'bar khŭl lăm lu iĕm, keh kơ gak năr pơdơh Sa'bat, gô gak wei pơtao, gak wei hnam akŭm Kră Yang.

⁸Lu iĕm gô wei tăp dăr kơ pơtao, rim 'nu iĕm athei chĕp khêl đao; bu mah mơ̆t lăm iĕm athei pơlôch sư hloi. “Mưh pơtao lĕch, mơ̆t, iĕm athei kiơ̆ sư.”

⁹Lu 'bok yŏng mă wei minh-hrĕng 'nu linh, lu sư pơm kiơ̆ nơ̆r 'bok soi Jêhôiada athei. Rim 'nu sư chông lu linh sư, lu bơngai mă gak lăm năr pơdơh Sa'bat, mă đĭ jơ gak bơih, chông ba đĭ-đăng năm tơ 'bok soi Jêhôiada.

¹⁰'Bok soi ei ăn kơ lu yŏng linh dôm lu đao hơlă păng khêl Đawit sơ̆, đơ̆ng lăm Hnam akŭm kơkuh kơ Kră Yang.

¹¹Lu linh mă kiơ̆ wei pơtao noh, rim 'nu lu sư chĕp tơmam tơblah kơdih kơdih, lu sư pơrĕng tăp dăr wă wei pơtao, iŏk đơ̆ng gah gơal truh tơ yă-nơ̆m kơ Hnam akŭm ei tăp dăr kơ chơnang soi păng hnam akŭm.

¹²Jêhôiada chông hloi kon tơdăm pơtao noh lĕch, pơyơ̆l ăn kơ sư môk pơtao, păng ăn kơ sư sơ̆p hla bơar tơdrong juăt. Thoi noh đe pôk sư pơm pơtao, tuh đak 'bâu phu kơpal kơ̆l sư, păng đĭ-đăng lu đe ei tap ti ôr jreo, khan: “Pơtao arih ling-lang khŏm khŏm.”

¹³Lăp yă Athalia kơtơ̆ng 'bơ̆r lu linh păng 'bơ̆r lu kon pơlei, na sư năm hloi tơ kon pơlei lăm Hnam akŭm kơkuh kơ Kră Yang.

¹⁴Yă ei lăng 'bôh pơtao dơ̆ng 'bơ̆t anih kơjung kiơ̆ thoi tơdrong juăt kơ̆m giĕng hmă, đei lu yŏng linh păng đei lu bơngai hlôm tơgiĕp dơ̆ng jê̆ sư păng đĭ-đăng kon pơlei lăm dêh char sư hiôk chơt hlôm tơgiĕp ngăl. Yă Athalia hek hloi ao sư kơdih păng hơdrăi rơ̆n khan: “Blơ̆ blĕch! Blơ̆ blĕch!”

¹⁵'Bok soi Jêhôiada athei lu yŏng khŭl linh: “Dui tơlĕch yă âu đơ̆ng lăm linh noh bĕ dah bu kiơ̆ sư, bơ̆n athei pơlôch hăm đao gưm.” Yua kơ 'bok soi khan bơih: “'Nĕ kơ pơlôch sư lăm Hnam akŭm kơkuh kơ Kră Yang.”

¹⁶Đe rôp chông yă ei tơ hnam pơtao sư kơplah sư oei rok trong năm mơ̆t tơ anih pơtao 'bơ̆t trong 'măng jang 'măn kơ aseh mơ̆t, na đe pơlôch sư tơ noh.

¹⁷Jêhôiada pơjing tơdrong pơgơ̆p pơkă hơlam Kră Yang hăm pơtao păng kon pơlei wă kơ lu sư jing kon pơlei Kră Yang. Sư kư̆m pơjing tơdrong pơgơ̆p pơtao hăm kon pơlei mơ̆n.

¹⁸Đĭ-đăng kon pơlei lăm dêh char sư năm tơ anih hnam yang Baal, na yuih pơrăm lê̆ đĭ, teh pơchah lê̆ chơnang soi păng pôlôch lê̆ Mathan 'bok soi gah yang Baal 'bơ̆t anăp, Đơ̆ng noh Jêhôiada athei bơngai gak wei Hnam Akŭm kơkuh kơ Kră Yang.

¹⁹Sư chông lu yŏng linh mă wei minh-hrĕng 'nu lĭnh, khŭl linh Karit, lu linh mă wei pơtao, păng đĭ-đăng kon pơlei lăm dêh char ei; sư ba pơtao jur đơ̆ng Hnam Akŭm kơkuh kơ Kră Yang năm tơ hnam pơtao trong 'măng jang mă lu linh gak hnam pơtao noh, Na pơtao Jôas hơ-oei hloi 'bơ̆t tang-dŏ pơtao.

²⁰Đĭ-đăng kon pơlei chơt hiôk ngăl, păng pơlei ei gơh hiôk hơđơ̆ng, đơ̆ng rŏng kơ đe pơlôch yă Athalia hăm đao gưm 'bơ̆t anih hnam pơtao.

²¹Jôas, sư 'nao tơpơh sơnăm kơplah sư tŏk pơm pơtao.