Read bahnar II Pot 15 Bible Online

II Pot 15 - bahnar bible

II Pot 15

¹Lăm sơnăm mă 'bar-jĭt tơpơh chăl Jêrôbôam, pơtao đe Isơrael pơgơ̆r, na Asaria, kon drŏ-nglo Amasia pơtao đe Juđa, tŏk pơm pơtao.

²Kơplah sư tŏk pơm pơtao sư 'nao mơjĭt-tơdrâu sơnăm păng sư pơgơ̆r pơđăm-jĭt 'bar sơnăm lăm pơlei Jêrusalem. Mĕ sư anăn Jêkôlia, bơngai pơlei Jêrusalem.

³Sư pơm 'lơ̆ng 'bơ̆t anăp Kră Yang, sư pơm rok kiơ̆ tơdrong Amasia 'bă sư hlôi pơm.

⁴Mă-lei sư ưh kơ yuih lê̆ hnam kơkuh kơ rup yang, tơ anih kơjung, na kon pơlei oei soi sơmah păng soh 'long 'bâu phu tơ hnam kơkuh noh đĕch.

⁵Kră Yang phak pơtao Amasia, pơm kơ sư jĭ chin dĭng truh tơ năr sư lôch, kơplah sư oei arih, sư oei tơ ataih kơ kon pơlei pơm hnam hơdrô̆ sư. Jôtham, kon drŏ-nglo pơtao ei wei-lăng hnam pơtao sư păng wei-lăng kon pơlei dêh char sư.

⁶Dôm lu tơdrong hơ'mon nai gah Asaria, đĭ-đăng tơdrong jang sư pơm, đe đei chih tơ lăm sơ̆p hla bơar gah lu 'bok pơtao đe Juđa.

⁷Asaria lôch thoi tep hiôk hăm lu 'bok kơdră sư păng đe 'bŭ sư hơdai hăm lu 'bok kơdră sư tơ pơlei Đawit. Jôtham, kon drŏ-nglo sư tŏk pơm pơtao pơgơ̆r pơtrơp sư.

⁸Lăm sơnăm mă pêng-jĭt tơhngam, chăl Asaria pơtao đe Juđa pơgơ̆r, na Sachari, kon drŏ-nglo Jêrôbôam, tŏk pơm pơtao đe Isơrael tơ pơlei Samari. Sư pơgơ̆r lăm tơdrâu khei.

⁹Sư pơm kơnê̆ 'bơ̆t anăp Kră Yang thoi lu 'bok kơdră sư hlôi pơm sơ̆ mơ̆n sư ưh kơ achăng lê̆ ôh tơdrong yoch Jêrôbôam, kon drŏ-nglo Nêbat noh jơ̆ tơdrong yoch pơm kơ lu bơngai Isơrael pơm yoch.

¹⁰Sallum, kon drŏ-nglo Jabes, chă đon blơ̆ sư, pơlôch sư 'bơ̆t anăp kon pơlei, đơ̆ng noh tŏk pơm pơtao tơplih sư.

¹¹Lu tơdrong jang Sachari pơm tơdrong nai hai, đe chih ngăl bơih tơ lăm sơ̆p hla bơar hơ'mon gah lu pơtao đe Isơrael.

¹²'Nâu bơih đei 'bôh 'blep thoi nơ̆r Kră Yang khan kơ Jêhu: “Adrĕch ih gô pơgơ̆r lu đe Isơrael dĭng truh kơ jơhnơr mă puăn.” Tơdrong 'nâu đei truh sĭt thoi noh.

¹³Lăm sơnăm mă pêng-jĭt tơsĭn, chăl Ussia, pơtao đe Juđa pơgơ̆r, Sallum kon drŏ-nglo Jabes tŏk pơm pơtao, sư pơgơ̆r minh khei lăm Pơlei Samari.

¹⁴Mênahem, kon drŏ-nglo Gađi, oei đơ̆ng pơlei Tirsa tŏk truh tơ Pơlei Samari, blah Sallum, kon drŏ-nglo Jabes lăm pơlei Samari păng pơlôch lê̆ sư, thoi noh, Mênahem tŏk pơm pơtao tơplih sư.

¹⁵Lu tơdrong jang Sallum tơdrong nai hai păng tơdrong sư chă đon kơnê̆ tơblah băl, đe chih ngăl bơih lăm sơ̆p hla bơar hơ'mon gah lu pơtao đe Isơrael.

¹⁶Kơplah noh Mênahem lĕch đơ̆ng Pơlei Tirsa blah Pơlei Tipsa, păng đĭ-đăng kon pơlei oei tơ lăm pơlei păng oei jơ̆p-jang kơ tơring jum dăr, yua kơ pơlei noh kuă kơ pơih 'măng dur; thoi noh na pơtao pơrăm lu sư păng roch klak đĭ-đăng lu drŏ-kăn mă oei anăp, lăm pơlei ei.

¹⁷Lăm sơnăm mă pêng-jĭt tơsĭn, chăl Asaria pơm pơtao đe Juđa na Mênahem, kon drŏ-nglo Gađi tŏk pơm pơtao đe Isơrael păng sư pơm pơtao mơjĭt sơnăm lăm Pơlei Samari.

¹⁸Sư pơm kơnê̆ 'bơ̆t anăp Kră Yang; đĭ chăl arih sư, ưh kơ achăng lê̆ dôm lu tơdrong yoch Jêrôbôam, kon drŏ-nglo Nêbat noh jơ̆ tơdrong yoch mă pơm kơ lu bơngai Isơrael pơm yoch.

¹⁹Pul, pơtao đe Asiri mơ̆t tơgar dêh char sư, na Mênahem ăn kơ 'bok ei minh-rơbâu talâng jên hua wă kơ 'bok ei tơgŭm pơm ăn kơ dêh char sư kơjăp lăm tơdrong sư pơgơ̆r.

²⁰Mênahem chă ra iŏk jên đơ̆ng lu bơngai Isơrael, noh đơ̆ng lu bơngai mă đei mŭk tơmam lơ, kư̆ rim 'nu pơđăm-jĭt sêikơlb jên hu wă ăn kơ pơtao đe Asiri, thoi noh pơtao đe Asiri brŏk, ưh kơ oei lăm dêh char ei đunh ôh.

²¹Dôm lu tơdrong hơ'mon nai gah Mênahem păng đĭ-đăng tơdrong jang sư pơm đe đei chih tơ lăm sơ̆p hla bơar hơ'mon gah lu pơtao đe Isơrael?

²²Mênahem lôch thoi tep hiôk hăm lu 'bok kơdră sư. Na Pêkahia, kon drŏ-nglo sư, tŏk pơm pơtao pơgơ̆r pơtrơp sư.

²³Lăm sơnăm mă pơđăm-jĭt chăl Asaria pơm pơtao đe Juđa, Pêkahia kon drŏ-nglo Mênahem tŏk pơm pơtao pơgơ̆r đe Isơrael lăm Pơlei Samari, sư pơgơ̆r lăm 'bar sơnăm.

²⁴Sư pơm kơnê̆ 'bơ̆t anăp Kră Yang, sư ưh kơ achăng lê̆ ôh tơdrong yoch Jêrôbôam kon drŏ-nglo Nêbat, noh tơdrong yoch mă pơm ăn kơ Isơrael pơm yoch.

²⁵Pêka kon drŏ-nglo Rêmalia, yŏng linh pơtao, chă đon wă pơm kơnê̆ kơ sư, hơdai hăm pơđăm-jĭt 'nu đơ̆ng tơring Gileat, blah kơđông kơjăp tơ Pơlei Samari, pơlôch sư hơdai hăm Argôp, Arie na sư tŏk pơm pơtao tơplih Pêkahia.

²⁶Lu tơdrong jang Pêkahia păng dôm tơdrong jang sư mă pơm boih, đei chih ngăl boih tơ lăm sơ̆p hla bơar tơdrong hơ'mon gah lu pơtao đe Isơrael.

²⁷Lăm sơnăm mă pơđăm-jĭt 'bar, chăl Asaria, pơtao đe Juđa pơgơ̆r, na Pêka, kon drŏ-nglo Rêmalia, tŏk pơm pơtao đe Isơrael lăm Pơlei Samari păng sư pơgơ̆r 'bar-jĭt sơnăm.

²⁸Sư pơm kơnê̆ 'bơ̆t anăp Kră Yang, sư ưh kơ achăng lê̆ tơdrong yoch Jêrôbôam, kon drŏ-nglo Nêbat, noh tơdrong yoch mă đei pơm kơ lu bơngai Isơrael pơm yoch.

²⁹Lăm chăl Pêka, pơm pơtao đe Isơrael, Tiglat Pileser, pơtao đe Asiri năm tơgar iŏk pơlei Ijôn, Abel Bêt Maaka, Janôa, Kêđes, Hasor, tơring Gileat tơring Galilê păng tơring Naptali hai dơ̆ng. Thoi noh, sư anhăk ba kon pơlei lu dêh ei tŏk tơ dêh char Asiri pơm bơnă.

³⁰Hôsêa kon drŏ-nglo Êlah, chă đon blah Pêka, kon drŏ-nglo Rêmalia păng pơlôch sư đơ̆ng noh tŏk pơm pơtao tơplih sư. 'Blep kơ sơnăm mă 'bar-jĭt, chăl Jôtham kon drŏ-nglo Ussia pơgơ̆r.

³¹Dôm lu tơdrong hơ'mon nai gah Pêka, đĭ-đăng lu tơdrong jang sư pơm, đei chih ngăl boih lăm sơ̆p hla bơar hơ'mon gah lu pơtao đe Isơrael.

³²Lăm sơnăm mă 'bar chăl Pêka, kon drŏ-nglo Rêmalia, pơtao đe Isơrael, na Jôtham kon drŏ-nglo Ussia, pơtao đe Juđa, tŏk pơm pơtao.

³³Kơplah sư tŏk pơm pơtao, sư 'nao 'bar-jĭt pơđăm sơnăm, sư pơgơ̆r mơjĭt-tơdrâu sơnăm lăm Pơlei Jêrusalem. Mĕ sư anăn Jêrusa kon drŏ-kăn Sađŏk.

³⁴Sư pơm 'lơ̆ng 'bơ̆t anăp Kră Yang, sư pơm dôm tơdrong 'bă sư Ussia hlôi pơm bơih.

³⁵Mă-lei, sư ưh kơ yuih lê̆ hnam kơkuh kơ yang đe pơm tơ anih kơjung, kon pơlei oei nŏng soi sơmah păng soh 'long 'bâu phu tơ noh. Lăm chăl Jôtham pơgơ̆r, sư đei pơm 'măng jang gah kơpơ̆ng Hnam akŭm kơkuh kơ Kră Yang.

³⁶Dôm lu tơdrong hơ'mon nai gah Jôtham păng đĭ-đăng tơdrong jang sư pơm đe chih lê̆ boih tơ lăm sơ̆p hla bơar hơ'mon gah lu pơtao đe Juđa.

³⁷Kơplah noh, Kră Yang ăn kơ Rêsin, pơtao Aram păng Pêka, kon drŏ-nglo Rêmalia, năm wang blah Juđa.

³⁸Jôtham lôch thoi tep hiôk hăm lu 'bok kơdră sư sơ̆, đe 'bŭ sư jê̆ lu 'bok kơdră sư, tơ Pơlei Đawit. Ahas, kon drŏ-nglo sư, tŏk pơm pơtao pơgơ̆r pơtrơp sư.