Read bahnar II Pot 20 Bible Online

II Pot 20 - bahnar bible

II Pot 20

¹Lăm kơplah chăl noh, Hesekia jĭ dêh wă jê̆ lôch. Êsai bơngai khan lê̆ adrol kon drŏ-nglo Amôt năm ngôi lăng Hesekia păng khan: “Kră Yang khan thoi âu: Ih hơmet bĕ tơdrong jang hnam ih, yua kơ ih gô lôch, ih ưh kơ klaih đơ̆ng tơdrong jĭ 'nâu ôh.”

²Na Hesekia tơwih muh măt sư tơ tơnăr hnam păng krao khan kơ Kră Yang:

³“Ơ Kră Yang! Apinh Ih 'blŏk kơ inh, đêl inh yak kiơ̆ Ih tơnăp tơpăt păng đĭ jơhngơ̆m pơm 'lơ̆ng 'bơ̆t anăp Ih.” Đơ̆ng noh Hesekia nhơ̆m hơdrĭ hơdrôi đĭ jơhngơ̆m.

⁴Êsai lĕch tam mă truh tŏk-bŏk pơlei, đei nơ̆r Kră Yang khan kơ sư:

⁵“Wơ̆t brŏk bĕ, khan kơ Hesekia, pơtao lu kon pơlei Inh, Kră Yang 'Bok kei-Dei Đawit 'bok kơdră ih khan: Inh kơtơ̆ng bơih nơ̆r ih krao khan, 'bôh ih nhơ̆m lĕch đak măt; 'nâu Inh gô pơklaih jĭ ih; truh tơ năr mă pêng ih gô năm tơ hnam Kră Yang.

⁶Inh gô ăn thim kơ ih arih pă mơjĭt-pơđăm sơnăm dơ̆ng, Inh gô pơklaih ih păng pơklaih pơlei 'nâu đơ̆ng tơpang ti pơtao đe Asiri, yua kơ Inh hăm Đawit, bơngai mă đĭch đam Inh, na Inh gô dŏng pơlei 'nâu.”

⁷Na Êsai athei: “Iŏk minh pôm 'bĕng pơm păng plei hơra bĕ. Iŏk 'bĕng noh dan 'bơ̆t kơ̆l pơtôch na sư gơh klaih.”

⁸Thoi noh, na Hesekia pơma hăm Êsai: “Hăm tơdra kiơ wă tơbăt Kră Yang gô pơklaih jĭ inh păng truh tơ năr mă pêng, inh gô gơh năm tơ hnam akŭm kơkuh kơ Kră Yang.”

⁹Êsai tơl: “'Nâu bơih tơdra mă Kră Yang ăn kơ ih, Sư gô pơm pơkeh nơ̆r Sư hlôi pơkă. Ih wă kơ 'bôh yơ̆p ngôi păk tơ anăp mơjĭt yak dah wă kơ păk hơlơ̆k tơ rŏng mơjĭt yak?”

¹⁰Hesekia tơl: “Yơ̆p ngôi pơ̆k thim năm tơ anăp mơjĭt yak ưh kơ anat kiơ ôh; inh apinh lê̆ sư păk hơlơ̆k tơ rŏng mơjĭt yak đĕch 'lơ̆ng hloh.”

¹¹Êsai bơngai khan lê̆ adrol, krao apinh Kră Yang; na Kră Yang dui kơdŭn lê̆ yơ̆p ngôi măt 'năr pơchrang kơ kơnao kung Ahas păk hơlơ̆k tơ rŏng mơjĭt yak,

¹²Lăm kơplah noh, Mêrôđak Balađan, kon drŏ-nglo Balađan, pơtao đe Babilôn wơh bơngai năm ăn kơ Hesekia kơthơ păng tơmam yua kơ sư kơtơ̆ng Hesekia jĭ.

¹³Hesekia kơtơ̆ng lu đe ei roi, sư hiôk dêh, na sư chông lu đe ei năm lăng anih mong tơmam sư, maih, hu, tơmam 'bâu phu rơmă ôliwơ gĭt păng lăng anih mong tơmam tơblah păng lăng tôm tơmam lăm hnam sư mong noh. Sư ăn lu đe ei lăng đĭ-đăng tôm tơmam lăm hnam sư păng tôm tơmam lăm dêh char sư đei, sư ăn kơ lu đe ei lăng đĭ, ưh kơ lon minh pôm tơmam kiơ.

¹⁴Na Êsai bơngai khan lê̆ adrol năm tơ pơtao Hesekia păng jet sư: “Lu bơngai noh, roi tơdrong kiơ păng lu sư đơ̆ng dêh char ayơ mă năm truh tơ âu?” Hesekia tơl: “Lu sư đơ̆ng dêh ataih, đơ̆ng char Babilôn.”

¹⁵Êsai khan: “Ih ăn kơ lu sư lăng kiơ tơ hnam pơtao ih?” Hesekia tơl: “Lu sư lăng tôm bơih tơmam lăm hnam inh. Inh tơhlâu tơ'bôh ăn kơ lu sư lăng đĭ-đăng tôm tơmam lăm hnam inh mong, pă đei lon kiơ bơih.”

¹⁶Na Êsai khan kơ Hesekia thoi âu: “Mơ̆ng bĕ nơ̆r Kră Yang khan:

¹⁷Jơ 'năr gô truh, dôm tơmam lăm hnam ih mong dôm lu mŭk tơmam mă yă 'bok ih đei pơsư̆ 'măn lê̆ đơ̆ng sơ̆ truh tơ dang ei đe gô iŏk pơđĭ, chĕp ba tơ dêh Babilôn. Kră Yang khan gô ưh pă đei kiơ oei oei dơ̆ng.

¹⁸Đơ̆ng noh, lu kon drŏ-nglo mă đơ̆ng ih pơjing, đe gô rôp anhăk ba pơđĭ lu sư gô jing lu linh krĕo oei lăm hnam pơtao đe Babilôn.

¹⁹Hesekia tơl Êsai: “Nơ̆r Kră Yang mă ih tơbăt noh 'lơ̆ng dêh.” Yua kơ Hesekia tơchĕng: “Huay ôh kư̆ kơ lăm chăl arih inh, đei hiôk rơnŭk păng hơdơ̆ng kơjăp.

²⁰Dôm lu tơdrong hơ'mon nai gah Hesekia, tơdrong pơgơ̆r, tơdrong sư man pơm đak dơnâu păng pơm hơbong pơro đak tơmơ̆t lăm pơlei, đe đei chih tơ lăm sơ̆p hla bơar hơ'mon gah lu pơtao đe Juđa?

²¹Hesekia lôch thoi tep hiôk hăm lu 'bok kơdră sư sơ̆, Manase, kon drŏ-nglo sư tŏk pơm pơtao pơgơ̆r pơtrơp sư.