Read bahnar II Pot 21 Bible Online

II Pot 21 - bahnar bible

II Pot 21

¹Manase mơjĭt-'bar sơnăm kơplah sư tŏk pơm pơtao. Sư pơgơ̆r pơđăm-jĭt pơđăm sơnăm lăm pơlei Jêrusalem. Mĕ sư anăn Hepsiba.

²Sư pơm kơnê̆ 'bơ̆t anăp Kră Yang, păng kơkuh tơdrong 'mê̆-'mach kiơ̆ thoi lu adrĕch adrung mă Kră Yang hlôi puh tơweh lê̆ đơ̆ng lu bơngai Isơrael.

³Sư hơmet ming lu hnam kơkuh kơ rup yang tơ kơpal kông đêl 'bă sư Hesekia yuih pơrăm lê̆ bơih; sư pơm ming chơnang soi kơkuh kơ yang Baal, pơdơ̆ng pơm ming rup Asêra lei-lăi thoi Ahap, pơtao đe Isơrael hlôi pơm bơih sơ̆, Sư soi sơmah kơ đĭ-đăng lu yang kơpal plĕnh păng bơ̆jang ăn kơ lu sư.

⁴Sư kư̆m pơm tơiung chơnang soi lăm hnam Kră Yang mă Kră Yang đei khan gah hnam akŭm kơkuh ei thoi âu: “Lăm Pơlei Jêrusalem noh, Inh 'măn anăn Inh.”

⁵Sư pơm lu chơnang soi kơkuh kơ đĭ-đăng yang kơpal plĕnh 'bơ̆t 'bar tŏ anih lăm cham hnam akŭm.

⁶Sư soh pơyơ̆r kon drŏ-nglo sư lăm ŭnh pơm yang păng sư pơjuăt tơwir, hơđa sư lui kơ pơjâu krao bơhngol bơngai lôch, sư pơm lơ tơdrong kơnê̆ 'bơ̆t anăp Kră Yang tơblĕk Kră Yang.

⁷Sư dan rup Asêra mă sư đei pơm lăm hnam akŭm mă Kră Yang đei khan bơih kơ Đawit păng Sôlômôn, kon drŏ-nglo sư, noh: “Lăm hnam akŭm 'nâu păng lăm Pơlei Jêrusalem; pơlei mă Inh hlôi rơih lăm lu khŭl Isơrael Inh gô ăn anăn Inh oei lăm noh, ling-lang khŏm khŏm.

⁸Dah lu bơngai Isơrael wei răk dôm tơdrong Inh bơtho khan, dôm tơdrong juăt Môis đĭch đam Inh hlôi bơtho kơ lu sư, lei Inh gô ưh kơ lê̆ lu sư chă năm jơ̆p-jang tơ 'nguaih kơ dêh char mă inh ăn bơih kơ lu yă 'bok lu sư.”

⁹Mă-lei lu sư ưh kơ mơ̆ng ôh, lu sư chu Manase pơhlŭ pơlung lu sư pơm tơdrong kơnê̆ lơ hloh kơ lu adrĕch adrung mă Kră Yang hlôi pơrăm pơtôch bơih 'bơ̆t anăp bơngai Isơrael.

¹⁰Na Kră Yang yua lu bơngai khan lê̆ adrol, lu đĭch đam Sư, bơtho khan kơ lu sư:

¹¹“Manase, pơtao đe Juđa hlôi pơm tơdrong yoch kơnê̆ krưp 'nâu păng pơm tơdrong kơnê̆ hloh kơ đĭ-đăng lu bơngai Amôrit hlôi pơm adrol kơ sư păng sư pơm kơ lu bơngai Isơrael pơm yoch kơkuh kơ lu rup yang đêl sư pơm.

¹²Yua kơ thoi noh, na Kră Yang 'Bok Kei-Dei lu bơngai Isơrael khan thoi âu: Inh gô ăn tơdrong răm truh kơ Pơlei Jêrusalem păng Juđa dĭng mah mă bu bu kơtơ̆ng đe roi tơdrong noh chrêu kơ đon.

¹³Inh gô iŏk tơlei đơ̆ng pơtŏ dêh Samari păng tơlei đơ̆ng pơtŏ adrĕch Ahap, dăng lăm pơlei Jêrusalem dơ̆ng, inh gô sŭt pơgoh lê̆ pơlei Jêrusalem thoi đe ôp sŭt pơnhan, đơ̆ng noh gơsŭp lê̆ sư.

¹⁴Inh gô achăng hŭt lê̆ lu bơngai mă oei arih mă khan lu sư gah Inh ră, păng Inh jao lu sư kơ lu ayăt, lu sư jing tơmam sa lu ayăt păng thoi tơmam đe iŏk đêl tơblah jei bơih.

¹⁵Yua kơ lu sư pơm bơih tơdrong kơnê̆ 'bơ̆t anăp Inh, tơblĕk inh đơ̆ng năr yă 'bok lu sư lĕch đơ̆ng dêh Êyiptơ truh tơ dang ei.”

¹⁶Hloh kơ noh dơ̆ng, Manase kư̆m pơlôch lơ bơngai ưh kơ đei yoch dĭng mah pham 'bĕnh-'bang kơ pơlei Jêrusalem, đơ̆ng pah âu truh tơ pah to, 'nguaih kơ tơdrong pơm kơ lu bơngai Juđa pơm yoch păng pơm kơnê̆ 'bơ̆t anăp Kră Yang hai dơ̆ng.

¹⁷Dôm lu tơdrong hơ'mon nai gah Manase, lu tơdrong jang đêl sư pơm, păng tơdrong yoch sư hlôi pơm đe đei chih lê̆ ngăl bơih tơ lăm sơ̆p hla bơar hơ'mon gah lu pơtao đe Juđa?

¹⁸Manase lôch thoi tep hiôk hăm lu 'bok kơdră sư, đe 'bŭ sư tơ lăm pơgar pơkao Usa. Pơgar pơkao lăm anih pơtao. Ammôn kon drŏ-nglo sư pơgơ̆r pơtrơp sư.

¹⁹Kơplah Ammôn tŏk pơm pơtao, sư 'nao 'bar-jĭt 'bar sơnăm; sư pơgơ̆r 'bar sơnăm tơ lăm Pơlei Jêrusalem. Mĕ sư anăn Mesulemet, kon drŏ-kăn Harus, đơ̆ng Pơlei Jôtba.

²⁰Sư pơm tơdrong kơnê̆ 'bơ̆t anăp Kră Yang lei-lăi thoi Manase 'bă sư hlôi pơm bơih.

²¹Sư năm rok kiơ̆ pôm trong 'bă sư rok bơih, bơ̆jang kơ rup yang mă đêl 'bă sư hlôi bơ̆jang bơih păng drap kơkuh bơih kơ lu rup yang noh.

²²Sư achăng lê̆ Kră Yang 'Bok Kei-Dei lu yă 'bok sư, sư ưh kơ năm kiơ̆ trong Kră Yang ôh.

²³Thoi noh, lu đĭch đam Ammôn chă đon blơ̆ sư păng pơlôch lê̆ sư lăm hnam pơtao sư.

²⁴Mă-lei, kon pơlei lăm dêh char sư pơlôch lê̆ đĭ-đăng bơngai mă pơlôch pơtao Ammôn ei, păng pôk Jôsia, kon drŏ-nglo sư, tŏk pơm pơtao tơplih sư.

²⁵Dôm lu tơdrong hơ'mon nai gah Ammôn păng tơdrong jang đêl sư pơm, đe đei chih bơih tơ lăm sơ̆p hla bơar hơ'mon gah lu pơtao đe Juđa

²⁶Đe 'bŭ sư tơ lăm bơsat tơ pơgar pơkao Usa; đơ̆ng noh Jôsia kon drŏ-nglo sư pơgơ̆r pơtrơp sư.