Read bahnar II Pot 23 Bible Online

II Pot 23 - bahnar bible

II Pot 23

¹Na pơtao wơh bơngai akŭm pơpôi đĭ-đăng lu kră pơlei đe Juđa păng đe Jêrusalem năm tơ'bơ̆p sư.

²Đơ̆ng noh pơtao năm tơ Hnam akŭm Kră Yang, lơ bơngai kiơ̆ sư đei đĭ-đăng lu bơngai Juđa, lăm Pơlei Jêrusalem, đĭ-đăng lu 'bok soi, lu bơngai khan lê̆ adrol păng đĭ-đăng kon pơlei, 'lơ̆p 'lŏ kiơ̆ sư. Sư đŏk ăn kơ lu đe ei mơ̆ng dôm lu nơ̆r lăm sơ̆p hla bơar Kră Yang pơgơ̆p pơkă mă đêl đe chă 'bôh đơ̆ng lăm Hnam akŭm kơkuh kơ Kră Yang.

³Pơtao dơ̆ng tơ anăp 'bơ̆t anih kơjung pơgơ̆p pơkă dơ̆ng 'bơ̆t anăp Kră Yang, wă năm kiơ̆ Kră Yang, đĭ jơhngơ̆m tơdrong tơchĕng wei răk dôm tơdrong Kră Yang tơtă, dôm khôi juăt Sư, păng pơm pơkeh nơ̆r Kră Yang pơgơ̆p pơkă mă đe đei chih lăm sơ̆p hla bơar 'nâu. Đĭ-đăng kon pơlei, bu bu kư̆m drơ̆ng lăp đon kơ nơ̆r pơgơ̆p pơkă noh ngăl.

⁴Na pơtao tơtă kơ Hilkia 'bok soi tơm, wơh lu 'bok soi nai păng wơh lu bơngai wei 'măng Hnam akŭm, athei lu sư chĕp ba đĭ dôm lu tơmam đơ̆ng Hnam Kră Yang lu tơmam mă đe pơm wă soi sơmah kơ yang Baal yang Asêra păng đĭ-đăng tơmam kơkuh kơ yang kơpal anê̆ rơwơ̆ng, sư athei đe soh lê̆ dôm tơmam 'noh tơ jih Pơlei Jêrusalem, lăm thŭng Kidrôn, đơ̆ng noh chĕp ba rơnok tơnuh sư tơ Pơlei Bethel.

⁵Sư kư̆m puh tơweh lê̆ lu 'bok soi jang kơ lu rup yang, mă đêl pơtao đe Juđa hlôi pơkă wă pôk lu sư soh 'long 'bâu phu tơ anih kơjung, pơm jơ̆p-jang kơ dêh char Juđa păng pơm tơ anih tăp dăr Pơlei Jêrusalem. Sư kư̆m puh tơweh lê̆ lu 'bok soi soh 'long 'bâu phu ăn kơ yang Baal, măt 'năr, măt khei păng đĭ-đăng lu sơnglŏng kơpal plĕnh.

⁶Sư iŏk lê̆ rup yang Asêra đơ̆ng lăm Hnam akŭm kơkuh kơ Kră Yang, chĕp ba tơ jih Pơlei Jêrusalem, truh tơ thŭng Kidrôn, soh lê̆ tơ ei dĭng rơnok đĭ, đơ̆ng noh prôi rơnok ei kơpal bơsat kon pơlei.

⁷Sư kư̆m yuih hŭt teh pơchah lê̆ anih drŏ-nglo ngôi pơm kư̆ kă lăm Hnam akŭm kơkuh kơ Kră Yang, tơ anih noh lu drŏ-kăn tanh che ăn kơ yang Asêra.

⁸Sư kư̆m chông tơlĕch đĭ-đăng lu 'bok soi mă oei đơ̆ng jơ̆p-jang pơlei lăm dêh char Juđa, na pơm pơ'mê̆ lê̆ anih kơkuh kơ rup tơ anih kơjung anih mă lu sư ngăl soh 'long 'bâu phu, đơ̆ng Pơlei Gêba dĭng truh tơ Pơlei Bêrsêba; đơ̆ng noh sư kư̆m teh pơchah lu chơnang soi kơ yang tơ 'nguaih 'măng dur pơlei, noh 'bơ̆t jê̆ 'măng Jôsuê yŏng wei pơlei, tơ gah 'ngiĕo kơ 'măng jang pơlei.

⁹Mă-lei, lu 'bok soi gah anih kơjung, lu sư ưh kơ gơh soi tơ chơnang soi Kră Yang tơ Pơlei Jêrusalem; mă-lei lu sư gơh sa 'bĕng ưh kơ đei 'buih pông, hơdai hăm lu 'nhŏng oh sư đĕch.

¹⁰Pơtao kư̆m pơm pơ'mê̆ lê̆ anih Tôphêt lăm Thŭng Ben Hinôm, wă kơ đơ̆ng âu tơ anăp, ưh kơ đei bu gơh soh pơyơ̆r kon drŏ-nglo dah kon drŏ-kăn sư soi sơmah kơ yang Mơlek.

¹¹Lu sư teh pơpuh lu aseh mă lu pơtao đe Juđa pơyơ̆r ăn kơ yang măt 'năr, pơdơ̆ng 'bơ̆t 'măng mơ̆t tơ Hnam akŭm kơkuh kơ Kră Yang, jê̆ hnam linh krĕo anăn sư Nathan Mêlek, 'bơ̆t cham Hnam akŭm,’ Jôsia soh rŭk lê̆ đĭ lu gre aseh pơyơ̆r kơ yang măt 'năr.

¹²Pơtao Jôsia kư̆m teng lê̆ lu chơnang soi mă lu pơtao đe Juđa pơm kơpal bơbŭng hnam kơjung, hnam pơtao Ahas; na gah lu chơnang soi mă Manase đei pơdơ̆ng 'bơ̆t 'bar tŏ cham hnam akŭm kơkuh kơ Kră Yang, sư tơlơ̆ păng teh pơchah lê̆, na chĕp ba săi lê̆ kơcheh sư lăm thŭng Kidrôn.

¹³Sư pơm pơ'mê̆ lê̆ lu hnam kơkuh kơ yang nai pơm tơ anih kơjung gah hơlĕch Pơlei Jêrusalem, gah gơal kơ Kông lôch răm, lu anih kơkuh kơ yang noh Sôlômôn pơtao đe Isơrael pơm wă soi sơmah kơ yang Astoret rup yang mă kơnê̆ krưp dêh lu bơngai Siđôn, pơm yang Kêmôs rup yang mă kơnê̆ krưp dêh lu bơngai Môap, pơm yang Mơlek rup yang mă kơnê̆ dêh lu bơngai Ammôn.

¹⁴Sư teh pơchah lê̆ lu rup yang pơm păng tơmo, kăl tơpăk lê̆ gơ̆ng rup yang yă Asêra păng tuh pơlŭl lê̆ kơting bơngai tơ noh.

¹⁵Sư kư̆m teh pơchah lê̆ chơnang soi tơ Pơlei Bethel păng hnam kơkuh kơ yang mă Jêrôbôam, kon drŏ-nglo Nêbat hlôi pơm, bơngai noh pơm kơ lu bơngai Isơrael pơm yoch; sư teh pơchah lê̆ chơnang soi, soh rŭk lê̆ Hnam kơkuh kơ yang tơ anih kơjung, teh pơhĕch lê̆ dĭng kơ'mey. Sư kư̆m soh lê̆ rup yang yă Asêra.

¹⁶Lăp Jôsia hue lăng, 'bôh hĭ lu bơsat tơ kơpal kông; na sư wơh bơngai năm iŏk kơting đơ̆ng lăm bơsat noh, đơ̆ng noh soh tơ kơpal chơnang soi, pơm kơ chơnang soi kơnê̆ 'mê̆-'mach thoi nơ̆r Kră Yang, mă đơ̆ng bơngai 'Bok Kei-Dei yua tơ'ngla mă roi tơbăt lê̆ adrol bơih kơ tơdrong noh.

¹⁷Đơ̆ng noh pơtao jet. “Bơsat to noh bơsat bu kih?” Lu bơngai lăm pơlei noh tơl: “'Noh bơsat bơngai 'Bok Kei-Dei yua, sư đơ̆ng char Juđa năm roi tơbăt lê̆ adrol gah tơdrong mă ih hlôi pơm 'nâu, wă blah chơnang soi tơ Bethel.”

¹⁸Pơtao khan: “'Nĕ kơ iŏk kơting sư, lê̆ sư lăm noh bơih.” Na lu sư lê̆ kơting bơngai khan lê̆ adrol tơ noh, hơdai hăm kơting 'bok khan lê̆ adrol đơ̆ng Samari.

¹⁹Pơtao Jôsia kư̆m yuih lê̆ đĭ lu chơnang soi kơkuh kơ yang pơm tơ kơpal anih kơjung, tơ lăm lu pơlei tơring Samari, mă lu pơtao đe Isơrael hlôi pơm wă tơblĕk Kră Yang, sư teng pơchah lê̆ đĭ lu chơnang soi noh kư̆m thoi sư hlôi pơm bơih tơ Pơlei Bethel mơ̆n.

²⁰Sư pơlôch lê̆ lu 'bok soi mă jang lăm anih yang pơm kơpal anih kơjung, sư pơlôch kơtă kơpal chơnang soi hloi, soh rŭk lê̆ kơting đe noh. Đơ̆ng noh sư brŏk tơ Pơlei Jêrusalem.

²¹Na pơtao Jôsia tơtă athei đĭ-đăng lu kon pơlei: “Iĕm athei 'blŏk hơdơ̆r kơ năr giĕng Năm Brih kơ Kră Yang lu iĕm, kiơ̆ thoi dôm nơ̆r đei chih lăm sơ̆p hla bơar Kră Yang pơgơ̆p pơkă 'nâu.”

²²Yua kơ lăm chăl lu 'bok sek tơlang lu bơngai Isơrael, mă lăm chăl lu pơtao đe Isơrael, mă chăl lu pơtao Juđa, lu sư tam mă biơh 'bôh pơm giĕng Năm Brih thoi noh.

²³Mă-lei lăm sơnăm mă mơjĭt-tơhngam, chăl pơtao Jôsia pơgơ̆r, lu sư đei pơm giĕng Năm Brih kơ Kră Yang tơ Pơlei Jêrusalem.

²⁴Jôsia kư̆m pơrăm pơpuh lê̆ đĭ lu bơngai pơjâu krao bơhngol bơngai lôch păng lu pơjâu tơwir, lu rup yang kơdih rim hnam păng lu rup yang hăm đĭ-đăng lu tơdrong kơnê̆ 'mê̆-'mach mă Kră Yang areh đei 'bôh lăm char Juđa păng tơ Pơlei Jêrusalem, wă pơm kiơ̆ kơjăp tơdrong juăt đei chih bơih lăm sơ̆p hla bơar mă 'bok soi Hilkia đei chă 'bôh đơ̆ng lăm hnam akŭm kơkuh kơ Kră Yang.

²⁵Adrol kơ Jôsia ưh kơ đei minh 'nu pơtao ayơ thoi sư, 'mêm kơ Kră Yang đĭ jơhngơ̆m đĭ tơdrong tơchĕng đĭ tơdrong pran sư, pơm kiơ̆ tôm khôi juăt Môis păng đơ̆ng rŏng kơ sư kư̆m ưh kơ đei bu lei-lăi thoi sư.

²⁶Mă-lei, Kră Yang oei blĕk, Sư hil mĭl kơ lu bơngai Juđa ưh kơ hơi ôh, oei ơh blĕk yua kơ tơdrong yoch mă Manase oei pơm

²⁷Na Kră Yang khan: “Inh gô puh tơweh lê̆ lu bơngai Juđa đơ̆ng Inh, thoi Inh puh tơweh bơih lu bơngai Isơrael păng Inh gô pơrăm lê̆ Pơlei Jêrusalem mă Inh rơih bơih păng kư̆m pơrăm Hnam akŭm tơm mă Inh hlôi khan: Anăn Inh gô oei tơ noh.”

²⁸Dôm lu tơdrong hơ'mon nai gah Jôsia, đĭ-đăng lu tơdrong jang đêl sư pơm, đe đei chih lê̆ tơ lăm sơ̆p hla bơar tơdrong hơ'mon gah lu 'bok pơtao đe Juđa

²⁹Lăm chăl Jôsia pơgơ̆r, 'bok Pharaôn Nêkô, pơtao đe Êyiptơ năm tơ đak Krong Ơphrat, tơgŭm pơtao đe Asiri tơblah. Na Jôsia năm găn tơblah hăm sư. Mă-lei lăp Pharaôn Nêkô tơ'bơ̆p sư, na pơlôch lê̆ sư tơ pơlei Mêgiđô.

³⁰Lu đĭch đam sư chơ atâu sư lăm gre aseh đơ̆ng pơlei Mêgiđô brŏk tơ Pơlei Jêrusalem, đơ̆ng noh 'bŭ sư lăm bơsat sư kơdih. Kon pơlei lăm dêh char sư rơih iŏk Jêhôahas, kon drŏ-nglo sư, đe tuh đak 'bâu phu kơpal kơ̆l, păng pôk Jêhôahas pơm pơtao pơtrơp 'bă sư.

³¹Kơplah Jêhôahas tŏk pơm pơtao, sư 'bar-jĭt pêng sơnăm; sư pơgơ̆r pêng khei lăm Pơlei Jêrusalem. Mĕ sư anăn Hamuta, kon drŏ-kăn Jêrêmi oei tơ pơlei Lipna.

³²Sư pơm tơdrong kơnê̆ 'bơ̆t anăp Kră Yang, pơm lei-lăi tôm tơdrong thoi đêl lu 'bok sư pơm bơih sơ̆.

³³Pharaôn Nêkô chĭt kron lê̆ sư tơ Risla, lăm dêh Hamat wă kơ sư ưh kơ đei pơgơ̆r Pơlei Jêrusalem dơ̆ng. Đơ̆ng noh sư pơgŏ athei dêh ei ra ăn kơ lu sư minh-hrĕng hlak talâng hu păng minh talâng maih.

³⁴Na Pharaôn Nêkô pôk Êliakim kon drŏ-nglo Jôsia, pơm pơtao tơplih Jôsia 'bă sư. Păng tơplih Êliakim anăn sư jing Jêhôiakim. Na Jêhôahas pơtao Pharaôn Nekô rôp ba sư tơ Êyiptơ păng sư lôch tơ noh.

³⁵Jêhôiakim ăn kơ Pharaôn Nêkô hu maih kiơ̆ thoi pơtao ei athei ăn, mă-lei sư hiơ̆k chă ra wă kơ tôm hu maih thoi Pharaôn Nêkô athei. Pơtao pơtơm chă ra hu maih đơ̆ng kon pơlei lăm dêh char sư, sư hơgăt ra hu maih rim kơ̆l bơngai, khŏm ăn kiơ̆ thoi sư đei, na ăn kơ Pharaôn Nêkô.

³⁶Kơplah Jêhôiakim tŏk pơm pơtao, sư 'bar-jĭt pơđăm sơnăm, păng sư pơgơ̆r mơjĭt-mônh sơnăm lăm Pơlei Jêrusalem. Mĕ sư anăn Sêbiđa, kon drŏ-kăn Pêđaia oei tơ Ruma.

³⁷Sư pơm tơdrong kơnê̆ 'bơ̆t anăp Kră Yang, pơm lei-lăi tôm tơdrong thoi đêl lu 'bok sư pơm boih sơ̆.