Read bahnar II Pot 24 Bible Online

II Pot 24 - bahnar bible

II Pot 24

¹Lăm chăl Jêhôiakim pơgơ̆r, Nebukatnessar, pơtao đe Babilôn, blah iŏk dêh char Juđa, Jêhôiakim chu jang kơ sư lăm pêng sơnăm, đơ̆ng noh sư tơplih đon tơchĕng sư iung blah pơtao đe Babilôn dơ̆ng.

²Kră Yang ăn lu khŭl linh đe Kalđê, khŭl linh đe Asiri, păng khŭl linh đe Môap năm blah pơrăm char Juđa, wă khŭl linh đe Ammôn pơrăm lê̆ lu sư, kiơ̆ thoi nơ̆r Kră Yang yua nơ̆r lu bơngai khan lê̆ adrol, noh jơ̆ lu đĭch đam sư,

³Tơdrong răm 'nâu truh hloi kơ lu bơngai Juđa yua kơ đơ̆ng nơ̆r Kră Yang tơtă wă tơhiong lê̆ lu sư đơ̆ng anăp Kră Yang, yua kơ đêl tơdrong yoch Manase, kiơ̆ thoi tơdrong sư đei pơm,

⁴Păng yua kơ sư pơlôch pham lĕch đơ̆ng lu bơngai ưh kơ đei yoch; yua kơ sư hlôi pơm kơ Pơlei Jêrusalem 'bĕnh kơ pham lu bơngai ưh kơ đei yoch, lei na Kră Yang ưh kơ mơnat kơ sư ôh.

⁵Dôm lu tơdrong hơ'mon nai gah Jêhôiakim, đĭ-đăng lu tơdrong jang đêl sư pơm, đe đei chih lê̆ bơih tơ lăm sơ̆p hla bơar hơ'mon gah lu pơtao.

⁶Jêhôiakim lôch, tep hiôk hăm lu 'bok kơdră sư păng Jêhôiachin kon drŏ-nglo sư, pơm pơtao pơtrơp sư.

⁷Pơtao đe Êyiptơ ưh kơ pơ̆n lĕch jăk đơ̆ng dêh char sư kơdih, yua kơ pơtao đe Babilôn tơgar iŏk bơih dêh char sư pơgơ̆r noh, đơ̆ng đak glung Êyiptơ truh tơ đak krong Ơphrat.

⁸Jêhôiachin sư mơjĭt-tơhngam sơnăm kơplah sư tŏk pơm pơtao; sư pơgơ̆r pêng khei tơ lăm Pơlei Jêrusalem. Mĕ sư anăn Nêhusta kon drŏ-kăn Êlnathan đơ̆ng Pơlei Jêrusalem.

⁹Jêhôiachin pơm tơdrong kơnê̆ 'bơ̆t anăp Kră Yang pơm kiơ̆ tôm tơdrong thoi đêl 'bă sư pơm.

¹⁰Kơplah noh lu linh Nebukatnessar, pơtao đe Babilôn bơ̆ teh wă tŏk blah Pơlei Jêrusalem.

¹¹Nebukatnessar pơtao dêh Babilôn kư̆m năm truh tơ pơlei, kơplah lu linh sư wă tŏk blah pơlei noh.

¹²Na Jêhôiachin, pơtao đe Juđa, lu sư đe mĕ sư, đĭch đam sư, lu yŏng linh lu 'bok tih linh, năm kŭp kơ̆l yơ̆r ti kơ pơtao đe Babilôn. Lăm sơnăm mă tơhngam chăl pơtao đe Babilôn pơgơ̆r na rôp lu sư pơm bơnă.

¹³Thoi nơ̆r Kră Yang hlôi khan, pơtao Babilôn iŏk lê̆ đĭ dôm lu tơmam kăp đơ̆ng lăm hnam akŭm kơkuh kơ Kră Yang păng dôm lu tơmam gĭt đơ̆ng lăm hnam pơtao, teng iŏk lu tơmam yua lăm hnam akŭm kơkuh kơ Kră Yang mă Sôlômôn pơtao đe Isơrael hlôi pơm hăm maih.

¹⁴Pơtao chông ba đĭ-đăng lu bơngai gơh hơgei lăm Pơlei Jêrusalem, sư kư̆m rôp đĭ-đăng lu thơ̆ hơgei gơh hơjơ̆m đĭ-đăng lu 'bok tih păng lu linh tơblah nuih kơtang, đĭ-đăng lu sư mơjĭt-rơbâu 'nu. Lê̆ lăi lu kon pơlei dơnuh hin đĕch.

¹⁵Sư, chông ba Jêhôiachin tơ Babilôn; sư kư̆m rôp ba mĕ pơtao lu akăn pơtao lu kuan tih, lu bơngai yŏng mơng lăm char, sư chông ba đơ̆ng Pơlei Jêrusalem năm pơm bơnă tơ Pơlei Babilôn.

¹⁶Pơtao Nebukatnessar chông ba lu linh tơblah nuih kơtang, đĭ-đăng lu sư tơpơh-rơbâu 'nu păng minh-rơbâu lu thơ̆ hơgei gơh pơm.

¹⁷Na pơtao Babilôn pôk ăn kơ Mathania tŏk pơm pơtao tơplih Jêhôiachin. Mathania noh sư ma Jêhôiachin, tơplih ăn kơ sư anăn plơ̆ng krao Sêđekia dơ̆ng.

¹⁸Sêđekia sư 'bar-jĭt mônh sơnăm kơplah sư tŏk pơm pơtao păng sư pơgơ̆r mơjĭt-mônh sơnăm tơ lăm Pơlei Jêrusalem. Mĕ sư anăn Hamuta, kon drŏ-kăn Jêrêmi oei tơ Pơlei Lipna.

¹⁹Sư pơm tơdrong kơnê̆ 'bơ̆t anăp Kră Yang păng pơm kiơ̆ dôm tơdrong Jêhôiakim hlôi pơm sơ̆.

²⁰Tơdrong Kră Yang hil mĭl Sư ăn truh bơih kơ Pơlei Jêrusalem păng dêh Juđa, Kră Yang mah puh tơweh lê̆ lu sư đơ̆ng muh măt Kră Yang. Na Sêđekia iung blah pơtao đe Babilôn.