Read bahnar II Pot 25 Bible Online

II Pot 25 - bahnar bible

II Pot 25

¹Lăm sơnăm mă tơsĭn, chăl Sêđekia pơgơ̆r, lăm năr mơjĭt, khei mơjĭt, Nebukatnessar, pơtao đe Babilôn chông đĭ-đăng lu linh sư năm blah Pơlei Jêrusalem. Lu sư wang tăp dăr kơ pơlei, lu sư bơ̆ teh wă tŏk mơ̆t lăm pơlei.

²Lu sư wang pơlei noh đunh dĭng truh tơ sơnăm mă mơjĭt-mônh, chăl pơtao Sêđekia pơgơ̆r.

³Năr tơsĭn, khei puăn, lăm pơlei đei pơngot rơwĕt tih, kon pơlei ưh kơ đei tơmam sa.

⁴Kơplah noh, lu linh đe Kalđê bŏk dur pơlei minh pôm bơlôh kơplah kơmăng, pơtao Juđa păng đĭ-đăng lu linh kơdâu klĕnh trong 'măng jang sơlam 'bar pah dur, jê̆ pơgar pơtao. Mă khan kơplah noh lu linh đe Kalđê oei wang pơlei ră, na lu đe pơtao kơdâu klĕnh trong tơpăt tơklă Araba.

⁵Mă-lei đei khŭl linh đe Kalđê druh 'moi 'bok pơtao, lu sư druh tam đei rôp pơtao tơ tơmăn glă pơlei Jêrikô; đĭ-đăng lu linh sư tơklah tơklang păng achăng lê̆ sư hơdrô̆.

⁶Lu linh đe Kalđê rôp pơtao đe Sêđekia anhăk ba sư tơ pơtao đe Babilôn oei tơ Ribla; tơ noh lu sư sek tơlang pơtao.

⁷Lu sư pơlôch kon drŏ-nglo pơtao Sêđekia tơm măt; na kuek lê̆ măt Sêđekia, chô̆ lê̆ sư hăm glang pơm hăm kong, đơ̆ng noh ba sư tơ Babilôn.

⁸Năr tơpơh, khei pơđăm sơnăm mơjĭt-tơsĭn, chăl Nebukatnessar, pơtao đe Babilôn pơgơ̆r, Nêbusarađan, Yŏng linh pơtao đe Babilôn năm tơ Pơlei Jêrusalem.

⁹Sư soh hnam akŭm kơkuh kơ Kră Yang, soh hnam pơtao păng lu hnam lăm Pơlei Jêrusalem; kư̆m soh lê̆ hnam tih lu yŏng mơng lăm pơlei.

¹⁰Đĭ-đăng khŭl linh đe Kalđê chu nơ̆r 'bok tih linh, lu sư teh pơchah dur war tăp Pơlei Jêrusalem.

¹¹Nêbusarađan, yŏng wei linh pơtao rôp kon pơlei mă oei oei lăm pơlei păng lu bơngai mă hlôi kŭp kơ̆l yơ̆r ti kơ pơtao Babilôn bơih, lu bơngai hơgei hai dơ̆ng, lu sư ba pơđĭ phak tơ dêh char sư.

¹²Mă-lei yŏng linh lê̆ doh oei pă pôm lu bơngai dơnuh hin ngei ngei lăm char wă kơ lu sư pơtăm 'long hơmu păng jang chŭn mir.

¹³Lu linh đe Kalđê teh pơchah, jrăng pơm hăm kong, bơng đak đe pơm hăm kong tơ lăm Hnam akŭm kơkuh kơ Kră Yang, đơ̆ng noh chĕp ba tơmam kong tơ Pơlei Babilôn.

¹⁴Lu sư kư̆m iŏk ba lu gŏ kong, chơ'mŏng gơ'bênh, săng kăt brai ŭnh kơđeng, pơnhan păng đĭ lu tơmam pơm hăm kong wă răk yua lăm hnam kơkuh kơ Kră Yang.

¹⁵Yŏng linh kư̆m iŏk ba lu ge wă soh tơmam 'bâu phu, pơnhan mong đak rơmă 'bâu phu kơthao păng dôm lu tơmam pơm hăm hu maih,

¹⁶Na 'bar tŏ jrăng kong, bơng đak pơm hăm kong, păng dôm lu 'long tơjră hăm kong tơmam mă Sôlômôn pơm lăm Hnam akŭm kơkuh kơ Kră Yang, ưh kơ đei bu gơh kŏng, gơh jô̆ kơsô̆ kong đơ̆ng lăm dôm tơmam.

¹⁷Jrăng minh pôm, kơjung sư mơjĭt-tơhngam hơgăt, kơpal jrăng ei đei kơ̆l jrăng đe pơm hăm kong, noh kơjung sư pơđăm hơgăt, đe pơm tơkon hơdrao pơ̆n tăp dăr, păng plei gărnăt kư̆m pơm hăm kong mơ̆n. Jrăng mă 'bar kư̆m pơm lei-lăi kơ noh mơ̆n pơ̆n tơkon hơdrao hăm kong.

¹⁸Yŏng linh rôp 'bok soi tơm anăn sư Sêraja, 'bok soi kơiĕng anăn sư Sôphôni păng pêng 'nu bơngai gak 'măng hnam akŭm.

¹⁹Sư kư̆m rôp 'bok tih mă wei-lăng lu linh, rôp pơđăm 'nu lăm lu bơngai tơgŭm pơtao chă đon, rôp bơngai mă jang hla bơar, sư bơngai mă hiơ̆k tơdrong mă krao akŭm lu bơngai lăm char sư păng rôp hloi tơdrâu-jĭt 'nu bơngai tơgŭm oei lăm pơlei ei.

²⁰Yŏng linh anăn sư Nêbusarađan rôp anhăk ba đĭ-đăng lu bơngai noh tơ pơtao đe Babilôn oei tơ Ribla.

²¹Pơtao đe Babilôn teh pơlôch lu đe noh tơ lăm Pơlei Riblah, lăm dêh Hamat. Noh đe rôp ba lu bơngai Juđa pơm bơnă tơ 'nguaih kơ dêh char sư.

²²Bê̆ gah lu bơngai Juđa mă Nebukatnessar pơtao Babilôn oei lê̆ lăm dêh char Juđa, na pơtao đe Babilôn jao kơ Gêđalia, kon drŏ-nglo Ahikam, Saphan, pơm tih pơgơ̆r lu sư.

²³Kơplah lu đe yŏng linh anăn lu sư Ismael, kon drŏ-nglo Nêthania, Jôhanan, kon drŏ-nglo 'bok Karêat, Sêraja, kon drŏ-nglo Tanhumet oei tơ pơlei Nêtôpat păng Jaasania kon drŏ-nglo Makathit păng lu linh đe ei kơtơ̆ng pơtao đe Babilôn, jao kơ Gêđalia pơm 'bok tih pơgơ̆r, na lu sư năm tơ Gêđalia tơ Pơlei Mispa.

²⁴Gêđalia pơkă pơkăm hăm lu sư păng hăm lu linh lu sư khan: “'Nĕ kơ hli kơ lu yŏng Kalđê! Bơ̆n athei oei kơtă lăm dêh char chu kŭp kơ̆l yơ̆r ti kơ pơtao Babilôn, lei na bơ̆n gô hiôk rơnŭk.”

²⁵Lăm khei tơpơh Ismael, kon drŏ-nglo Nêthania, sâu Êlisama, sư gah adrĕch pơtao, sư năm tơ Pơlei Mispa, đei mơjĭt 'nu bơngai kiơ̆ sư blah Gêđalia păng pơlôch lê̆ sư hăm lu bơngai Juđa păng lu bơngai Kalđê mă oei hăm sư tơ Pơlei Mispa.

²⁶Na đĭ-đăng lu kon pơlei đơ̆ng 'lơ̆p truh tơ 'lŏ, păng lu 'bok kuan tih, iung jăk tơ dêh Êyiptơ; yua kơ lu sư hli lu bơngai Kalđê iung kơting.

²⁷Lăm sơnăm mă pêng-jĭt tơpơh, jô̆ đơ̆ng sơnăm đe rôp phak Jêhôiachin pơtao đe Juđa. Lăm năr 'bar-jĭt tơpơh, khei mơjĭt-'bar, Êwil Mêrôđak tŏk pơm pơtao Babilôn, na sư tơlĕch hĭ Jêhôiachin đơ̆ng hnam phak.

²⁸Pơtao đe Babilôn pơma hăm Jêhôiakin nơ̆r rơngơp hiôk, gơh găt, păng pôk atŏk ăn tang-dŏ sư kơjung hloh sư lu pơtao nai mă oei phak hơdai hăm sư tơ Babilôn.

²⁹Na Jêhôiachin plôh lê̆ ao bơnă sư păng rim năr oei sŏng sa pôm gơ'bang hăm pơtao dĭng đĭ chăl arih sư.

³⁰Pơtao đe Babilôn tơgŭm sư tơmam sa mah ling-lang dĭng đĭ chăl arih sư.