Read bahnar II Pot 3 Bible Online

II Pot 3 - bahnar bible

II Pot 3

¹Jôram sư kon drŏ-nglo Ahap, tŏk pơm pơtao char Isơrael tơ Pơlei Samari, lăm sơnăm mơjĭt-tơhngam, chăl Jêhôsaphat pơm pơtao char Juđa păng pơgơ̆r mơjĭt-'bar sơnăm.

²Sư pơm kơnê̆ 'bơ̆t anăp Kră Yang, mă-lei sư ưh kơ lei-lăi thoi mĕ 'bă sư sơ̆ ôh, yua kơ sư hŭt lê̆ rup yang Baal đơ̆ng 'bă sư man pơdơ̆ng sơ̆.

³Mă khan lei ră, sư kư̆m hưch hanh kiơ̆ tơdrong yoch Jêrôbôam, kon drŏ-nglo Nêbat, noh jơ̆ yoch mă hlôi pơm ăn kơ lu bơngai Isơrael pơm yoch. Sư ưh kơ chu achăng lê̆.

⁴Thoi noh Mêsa pơtao lu bơngai Môap, sư rong triu lơ, rim sơnăm sư ăn kơ pơtao Isơrael minh-hrĕng rơbâu tŏ triu kon păng minh-hrĕng rơbâu tŏ triu tơno đe ưh tam mă yuă sŏk sư.

⁵Mă-lei, lăp Ahap lôch bơih, đei pơtao lu bơngai Môap iung blah pơtao đe Isơrael.

⁶Thoi noh pơtao Jôram weh đơ̆ng Pơlei Samari, sư krao pơtơm đĭ-đăng lu bơngai Isơrael.

⁷Sư wơh lu bơngai năm roi tơbăt ăn kơ Jêhôsaphat pơtao dêh Juđa khan: “Pơtao Môap tơblah hăm inh bơih, ih hăm gơh ưh ba năm blah lu bơngai Môap noh? Jêhôsaphat tơl: “Inh gô năm; inh kư̆m dang ih, kon pơlei inh kư̆m dang kon pơlei ih, aseh inh kư̆m dang aseh ih mơ̆n.”

⁸Sư khan dơ̆ng: “Lei bơ̆n năm trong ayơ?” Jôram tơl: “Bơ̆n năm trong char glă Eđôm.”

⁹Thoi noh, pơtao đe Isơrael, pơtao đe Juđa păng pơtao đe Eđôm wang năm đĭ-đăng, lu sư năm dăr trong char glă noh tơpơh năr kơ trong, na đak nhă ưh kơ đei wă ăn kơ lu khŭl linh păng khŭl sem dơrong kiơ̆ lu sư.

¹⁰Na pơtao đe Isơrael khan: “Kră Yang krao iŏk lu bơ̆n pêng 'nu pơtao 'nâu wă jao lê̆ lăm ti lu bơngai Môap bơih.

¹¹Mă-lei, Jêhôsaphat khan: “Tơ âu ưh kơ đei bơngai khan lê̆ adrol mă Kră Yang wă kơ bơ̆n gơnang kơ sư 'noh jet apinh Kră Yang tơgŭm bơ̆n hă?” Minh 'nu bơngai jang kơ pơtao đe Isơrael tơl thoi âu: “Tơ âu đei Êlisê, kon drŏ-nglo Saphat, bơngai mă đêl tuh đak ăn kơ Êli ôp ti.”

¹²Jêhôsaphat khan: “Nơ̆r Kră Yang pơma oei lăm sư.” Thoi noh, pơtao đe Isơrael, Jêhôsaphat, păng pơtao Eđôm jur năm hloi tơ Êlisê.

¹³Êlisê khan kơ pơtao Isơrael: “Ih hăm inh đei tơdrong kiơ? Ih athei jet apinh bĕ bơngai khan lê̆ adrol mă mĕ 'bă ih yua sư noh:” Mă-lei pơtao Isơrael tơl: “Ưh ôh, yua kơ Kră Yang krao bơih pêng 'nu nhôn pơtao 'nâu wă jao lê̆ lăm ti lu bơngai Môap đĕch.”

¹⁴Na Êlisê khan: “Inh pơkă 'bơ̆t anăp Kră Yang tih hloh, Sư arih ling-lang Tơ'ngla mă inh bơ̆jang, tơdah inh ưh kơ chu yom kơ Jêhôsaphat, pơtao đe Juđa, inh ưh kơ wă lăng ih ôh, păng kư̆m ưh kơ wă sơng ih mơ̆n.

¹⁵Mă-lei dang ei, ba kơ inh minh 'nu bơngai gơh reh brŏ dung bĕ:” Kơplah bơngai ei oei reh brŏ dung na tơdrong mơsêh Kră Yang jur oei hơdai hăm Êlisê.

¹⁶Sư khan: “Kră Yang khan thoi âu: Sir hơlŭng mă lơ bĕ, sir jơ̆p kơ thŭng thong 'nâu”

¹⁷Yua kơ Kră Yang khan thoi âu: “Iĕm gô ưh kơ 'bôh kial, kư̆m ưh kơ 'bôh 'mi, mă-lei thŭng thong 'nâu gô 'bĕnh kơ đak na lu iĕm, khŭl rơmo triu iĕm, hăm aseh dôm sem dơrong iĕm, gô nhă đak 'noh.

¹⁸Mă-lei Kră Yang lăng tơdrong noh iĕ đĕch. Sư gô jao hloi lu bơngai Môap lăm tơpang ti lu iĕm.

¹⁹Gô jei iĕm pơrăm đĭ-đăng lu pơlei tih, kơđông kơjăp, lu pơlei tih rŏ kăl pơđĭ dôm lu 'long sa plei 'lơ̆ng, bơ̆ găn lê̆ lu tu đak păng iŏk tơmo hơtat pơrăm đĭ dôm lu chŭn teh 'lơ̆ng.”

²⁰Pơgê dơning, kơplah jơ đe pơyơ̆r tơmam soi, gip kơ đak ro đơ̆ng Eđôm truh tơ dêh ei đak 'bĕnh jơ̆p-jang.

²¹Lăp lu bơngai Môap kơtơ̆ng băt lu pơtao noh năm wă blah lu sư, na lu sư krao akŭm pơpôi đĭ-đăng đơ̆ng 'lơ̆p truh tơ kră dôm lu bơngai mă gơh yua tơmam tơblah, năm dơ̆ng 'bơ̆t sơlam dêh char lu sư wă tơblah.

²²Năr đơ̆ng rŏng, lu bơngai Môap iung đơ̆ng hrôih, 'năr pơchrang tơ đak, lu bơngai Môap 'bôh đak 'bơ̆t anăp lu sư 'breo thoi pham.

²³Na lu sư ôr khan: “'Noh pham bơih, băt jơ̆ pêng 'nu pơtao tơblah tơ'bet băl tơduă bơih 'noh. Dang ei, ơ lu bơngai Môap, mơ̆t blah iŏk mŭk tơmam bĕ.”

²⁴Mă-lei lăp lu sư năm truh tơ anih linh Isơrael lu bơngai Isơrael iung blah lu bơngai Môap, lu bơngai Môap tơrơ, kơdâu 'bơ̆t anăp lu bơngai Isơrael. Lu bơngai Isơrael iung druh blah 'moi lu bơngai Môap truh tơ dêh lu sư, blah pơlôch lu sư tơ noh.

²⁵Lu bơngai Isơrael blah pơrăm lơ lu pơlei tih, lu sư dônh tơmo hơtat 'bŭ lê̆ chŭn teh 'lơ̆ng, chĭt lê̆ dôm lu tu đak păng kăl pơđĭ dôm lu 'long 'lơ̆ng. Oei pă pôm lu dur pơlei Kir Harêsêt đĕch oei đei tơmo. Na lu linh mă iŏk tơmo noh kư̆m drŭt blah klơ̆m pơrăm lu dur noh mơ̆n.

²⁶Pơtao lu bơngai Môap mơn kơdih sư tơblah pă kĕ bơih, na sư chông ba lu linh kiơ̆ sư tơpơh-hrĕng 'nu chĕp đao gưm wă pơih trong drŭt năm tơ pơtao Eđôm; mă-lei ưh kơ kĕ ôh.

²⁷Na sư iŏk kon tơdăm kơdră sư, bơngai mă wă pơgơ̆r pơtrơp đơ̆ng sư, pơyơ̆r sư pơm tơmam soi 'buh kơpal dur pơlei. Na đei hloi tơdrong hil mĭl tih kơ lu bơngai Isơrael, na lu sư weh jăk đơ̆ng pơtao Môap, brŏk tơ dêh lu sư kơdih.