Read bahnar II Pot 5 Bible Online

II Pot 5 - bahnar bible

II Pot 5

¹Naaman 'bok yŏng pơgơ̆r linh pơtao đe Aram, sư noh jơ̆ minh 'nu bơngai đei tơdrong gơh kĕ 'bơ̆t anăp yŏng tơ'ngla sư; đe kư̆m pơyom kơ sư dêh yua kơ Kră Yang yua sư tơblah ăn kơ lu kon Pơlei Aram kĕ jei, bơngai 'nâu sư nuih, pran kơtang, mă-lei sư 'bơm chin.

²Kơplah noh, đei khŭl linh bơngai Aram năm răp blah đei 'bôh minh 'nu adruh 'lơ̆p bơngai Isơrael rôp ba pơm bơnă sư, bơ̆jang awih awăn ăn kơ akăn Naaman.

³Drŏ-kăn 'lơ̆p ei khan kơ yă mă akăn yŏng tơ'ngla sư: “Ô dah yŏng tơ'ngla ĭnh năm tơ 'bok khan lê̆ adrol tơ Pơlei Samari, sư gô pơklaih yŏng tơ'ngla inh đơ̆ng jĭ chin noh.”

⁴Thoi noh Naaman mơ̆t roi kơ pơtao, yŏng tơ'ngla sư dôm nơ̆r drŏ-kăn 'lơ̆p bơngai Isơrael.

⁵Na pơtao đe Aram tơl: “Năm bĕ, inh gô gơih ăn kơ pơtao đe Isơrael kơthơ.” Thoi noh, Naaman năm hĭ, chĕp ba mơjĭt hlak talâng jên hu, tơdrâu-rơbâu hlak maih păng mơjĭt blah ao.

⁶Sư chĕp ba ăn kơ pơtao Isơrael kơthơ, lăm kơthơ đei chih thoi âu: “Ơ pơtao, mưh kơthơ âu truh tơ ih, 'nâu inh wơh Naaman, đam inh năm tơ ih, wă kơ ih pơklaih jĭ chin sư.”

⁷Lăp pơtao đe Isơrael đŏk kơthơ noh, na sư hek hloi ao sư kơdih păng khan: “Inh Kră Yang 'Bok Kei-Dei hă na gơh pơlôch păng gơh pơrih? Na bơngai âu gơih nơ̆r sư khan athei inh pơklaih bơngai jĭ chin. Bơ̆n răp lăng inh băt sư 'maih chă tơdrong pơm ayăt kơ inh 'nâu.

⁸Êlisê kơtơ̆ng băt pơtao đe Isơrael hek ao sư kơdih, sư wơh bơngai năm khan kơ pơtao đe Isơrael: “Yua kơ kiơ ih hek lê̆ ao ih kơdih? Ih athei Naaman năm tơ inh, wă kơ sư gô băt lăm Isơrael đei bơngai khan lê̆ adrol.”

⁹Thoi noh, Naaman hao gre aseh năm tơ noh, dơ̆ng 'bơ̆t 'măng hnam Êlisê.

¹⁰Êlisê wơh bơngai jang kơ sư khan kơ Naaman thoi âu: “Năm tơ đak krong Jôrđăn môch hum akâu ih tơpơh wơ̆t, lei rơka jĭ chin ih dih gô klaih rơgoh đĭ.”

¹¹Mă-lei Naaman hil, sư năm rah jŏk rah: “Inh tơchĕng hli kơ akâu sư kơdih hloi năm sơng inh, dơ̆ng 'bơ̆t ei krao apinh Kră Yang 'Bok Kei-Dei, iŏk ti sư pel hloi 'bơ̆t rơka jĭ chin, hơli 'ma 'ngiĕo, pơklaih jĭ chin inh.

¹²Đak krong Abana păng đak krong Pharpar, 'bar tŏ đak krong tơ Đamas 'noh ưh kơ 'lơ̆ng hloh kơ lu đak krong tơ Isơrael hă? Inh hum đak 'nei ưh kơ klaih hă? Thoi noh sư blĕk dêh, weh hloi tơ nai.

¹³Mă-lei lu đĭch đam sư năm jê̆ sư, khan kơ sư: “Ơ 'bă, dah bơngai khan lê̆ adrol athei ih pơm tơdrong tơnat ih ưh kơ pơm hă? Na tơma 'nâu sư khan: “Hum bĕ, na gơh klaih.”

¹⁴Na Naaman jur hĭ lăm đak krong Jôrđăn păng môch tơpơh wơ̆t kiơ̆ thoi Êlisê bơngai mă 'Bok Kei-Dei yua noh athei sư. Sư klaih hloi kơtă ei, păng akar sư jing lei-lăi dang thoi so dơ̆ng, akar sư thoi akar nge.

¹⁵Naaman hăm đĭ-đăng bơngai mă kiơ̆ sư wơ̆t dơ̆ng tơ Êlisê păng khan thoi âu: “Dang ei inh băt bơih, jơ̆p-jang lăm teh đak ưh kơ đei yang nai hloh kơ Kră Yang 'Bok kei-Dei lu bơngai Isơrael, thoi noh apinh ih iŏk tơmam inh bơngai mă đĭch đam ih 'nâu.”

¹⁶Mă-lei Êlisê tơl khan: “Inh pơkă hăm Anăn Kră Yang mă arih ling-lang, tơ'ngla mă inh bơ̆jang, inh ưh kơ iŏk yă kiơ ôh.” Naaman lung athei Êlisê iŏk, mă-lei Êlisê pơjăng ưh kơ iŏk.

¹⁷Naaman khan dơ̆ng: “Tơdah ih ưh kơ iŏk kiơ inh apinh ih asong inh kôch iŏk hơya 'bar bai teh lăp kơ 'bar tŏ aseh iĕ chơ kĕ; yua kơ đơ̆ng âu tơ anăp inh bơngai mă đĭch đam ih, ưh pă pơyơ̆r kơ yang nai ôh dôm tơmam soi 'buh pơkhôi dah tơmam soi nai 'nguaih kơ Kră Yang.

¹⁸Apinh Kră Yang mơnat pă jô̆ yo kơ inh minh tơdrong 'nâu đĕch: Rim wơ̆t yŏng tơ'ngla inh, mơ̆t lăm hnam yang Rimôn wă kơkuh kơ yang ei, dui ba kơkŏng ti inh, na mưh sư kơkuh, inh kư̆m drap kơkuh thoi sư mơ̆n. Thoi noh, apinh Kră Yang pă jô̆ kơ inh đĭch đam ih tơdrong noh.

¹⁹Êlisê khan: Năm bĕ, yak kơ ih mă 'lơ̆ng rŏ, hiôk-hian! Lăp Naaman hlôi weh đơ̆ng Êlisê, ataih 'biơ̆ bơih.

²⁰Na Gêhasi đam Êlisê, bơngai mă 'Bok Kei-Dei yua, sư pơma lăm to khan: “To, tơ'ngla inh mơnat ăn huay kơ jô̆ yo Naaman, bơngai Aram, sư ưh kơ iŏk tơmam kiơ đơ̆ng Naaman ăn kơ sư, Inh pơkă 'bơ̆t anăp Kră Yang mă arih ling-lang, Inh gô druh 'moi Naaman, păng khŏm iŏk tơmam kiơ kiơ đơ̆ng sư 'mơ̆i.”

²¹Thoi noh, Gêhasi druh 'moi Naaman! Naaman hue lăng tơ rŏng 'bôh đei bơngai druh 'moi sư, na sư jur đơ̆ng gre aseh, năm tơkan sơng bơngai 'noh păng jet “tôm tơdrong oei hiôk-hian mơ̆n ưh?”

²²Gêhasi tơl: “Tôm tơdrong oei hiôk-hian mơ̆n, yŏng tơ'ngla inh athei roi kơ ih. Hei đei 'bar 'nu tơdăm, đơ̆ng khŭl bơngai khan lê̆ adrol, bre sư đơ̆ng Kông Êphraim 'nao năm truh tơ inh; apinh ih asong sư jên, minh 'nu, mơjĭt kĭ hu, păng 'bar blah ao wă hrŭk tơplih.”

²³Naaman khan: “He bĕ, iŏk 'bar talâng hu 'nâu,” sư pơlŭt athei Gêhasi iŏk 'bar hlak jên hu, păng 'bar blah ao tah lăm 'bar tŏ kơdŭng 'bi ăn kơ bre đam sư athei ăn kơ Gêhasi.

²⁴Lăp truh 'bơ̆t jơ̆ng kông bơih, Gêhasi iŏk 'bar tŏ 'bi đơ̆ng ti bre đam Naaman, tah lê̆ lăm hnam sư kơdih, na lê̆ bre ei brŏk.

²⁵Na sư hăt hot năm hloi tơ Êlisê yŏng tơ'ngla sư, Êlisê jet sư khan; “ơ Gêhasi ih brŏk đơ̆ng yơ noh hei?” Sư tơl: “Inh ưh kơ đei năm tơ yơ ôh”

²⁶Mă-lei, Êlisê khan dơ̆ng: “'Bơ̆t bơngai 'noh jur đơ̆ng gre aseh năm tơkan sơng ih hei, bơhngol inh ưh kơ oei hăm ih tơ noh hă? Dang ei hăm trŏ kơ jơ gơh iŏk jên hu, hơbĕn ao, mir ôliwơ, mir hơmu, rơmo, triu, đĭch đam drŏ-nglo drŏ-kăn đe dah ưh?

²⁷Yua kơ thoi noh bơih, jĭ chin Naaman gô hơpoh tơ ih păng adrĕch adrung ih ling-lang ưh kơ layơ tôch.” Gêhasi weh hloi đơ̆ng Êlisê, 'bơm hloi chin tơbôk thoi prĕl.