Read bahnar I Ho 10 Bible Online

I Ho 10 - bahnar bible

I Ho 10

¹Lu bơngai Philistin tơblah hăm bơngai Isơrael. Kon pơlei Isơrael kơdâu đơ̆ng anăp kon pơlei Philistin, đei lơ bơngai jĭ rơka, pơ̆k lôch tơ kơpal Kông Gilbôa.

²Kon pơlei Philistin, druh Sôl păng lu kon drŏ-nglo sư, pơlôch lu kon drŏ-nglo sư Jônathan, Abinađap păng Malkissua.

³Tơdrong tơblah băl tih dêh tơpă tăp kơ Sôl, lu linh chĕp hră druh prah 'bơm hloi sư rơka.

⁴Sôl athei bơngai mă chĕp tơmam tơblah sư khan: “Ih athei toh đao ih 'bet pơlôch inh, kơnh lu bơngai mă ưh kơ chu kăt tơdra akar 'noh truh pơm kơnê̆ kơ inh.” Mă-lei bơngai chĕp mă wei sư 'noh ưh kơ pơ̆n yua kơ sư hli dêh. Na Sôl iŏk đao sư glơ̆m kơdih sư.

⁵Na lăp bơngai chĕp wei sư 'noh 'bôh Sôl lôch boih, na sư kư̆m iŏk đao glơ̆m sư kơdih mơ̆n.

⁶Na Sôl păng pêng 'nu kon drŏ-nglo sư lôch păng đĭ-đăng hnam dơnŏ sư kư̆m lôch.

⁷Kon pơlei Isơrael bơngai lăm anih thŭng glă 'bôh lu linh kơdâu, Sôl hăm lu kon drŏ-nglo sư lôch boih, lu sư achăng lê̆ pơlei sư na kơdâu ôn; kon pơlei Philistin mơ̆t blah iŏk oei tơ lăm lu pơlei noh.

⁸Năr đơ̆ng rŏng, kon pơlei Philistin năm iŏk mŭk tơmam lu bơngai lôch, na 'bôh Sôl păng lu kon drŏ-nglo sư lôch tơ Kông Gilbôa.

⁹Lu sư iŏk tơmam Sôl, chơ̆ng iŏk kơ̆l sư, iŏk tơmam tơblah sư, na lu sư wơh bơngai năm jơ̆p-jang dêh Philistin, roi tơbăt ăn kơ lu rup yang păng kon pơlei sư.

¹⁰Lu sư 'măn lê̆ tơmam tơblah Sôl tơ lăm anih kơkuh kơ rup yang lu sư, na kơ̆l sư hơtol lê̆ tơ lăm hnam yang Dagôn.

¹¹Lăp kon pơlei Jabes Gileat kơtơ̆ng dôm tơdrong kon pơlei Philistin pơm kơ Sôl,

¹²na lu sư minh jơhngơ̆m minh đon hơdai iung năm tŏk tơtông iŏk akâu pơtao Sôl păng akâu lu kon drŏ-nglo sư chĕp wih tơ Jabes, 'bŭ kơting lu sư tơ ala tơm 'long kôih tơ Jabes, lu sư grong ơ̆t kơ sŏng sa tơpơh năr.

¹³Pơtao Sôl lôch, yua kơ sư pơm yoch ưh kơ hli gơnang kơ Kră Yang; sư ưh kơ kiơ̆ nơ̆r Kră Yang bơtho pơkă păng kư̆m kiơ̆ bơngai krao apinh yang atâu,

¹⁴Sôl ưh kơ krao apinh Kră Yang; na Kră Yang pơlôch sư, teh đak sư ăn kơ Đawit, kon drŏ-nglo Jese.