Read bahnar I Ho 11 Bible Online

I Ho 11 - bahnar bible

I Ho 11

¹Đĭ-đăng bơngai Isơrael akŭm hơdai hăm Đawit tơ Hêbrôn păng khan: “Lu nhôn âu jơ̆ kơting sĕch akar ih.

²Adrol sơ̆ mă kơplah Sôl oei pơm pơtao, ih boih pơgơ̆r chông kon pơlei Isơrael lĕch; dah wih brŏk. Kră Yang 'Bok Kei-Dei ih đei khan: ‘Ih gô wei rong kon pơlei Isơrael Inh; păng ih gô pơm yŏng pơgơ̆r lu sư.’ ”

³Kơplah noh đĭ-đăng lu kră bơngai Isơrael năm tơ pơtao Đawit tơ Hêbrôn; na Đawit pơgơ̆p hloi hăm lu sư tơ Hêbrôn 'bơ̆t anăp Kră Yang; klaih kơ noh lu sư tuh đak rơmă 'bâu phu pôk Đawit pơm pơtao bơngai Isơrael thoi nơ̆r Kră Yang pơkă hăm Samuel.

⁴Đawit păng đĭ-đăng kon pơlei Isơrael năm tơ pơlei Jêrusalem, 'noh pơlei Jêbus; tơ noh đei lu bơngai Jêbus oei.

⁵Khan kơ Đawit: “Ih ưh kơ gơh mơ̆t tơ âu ôh.” Mă-lei Đawit blah iŏk kơđông kơjăp pơlei Siôn, noh boih pơlei Đawit.

⁶Đawit khan: “Bơngai bu blah kon pơlei Jêbus adrol, sư gô pơm yŏng pơm bơngai pơgơ̆r.” Na Jôap, kon drŏ-nglo Sêruia, năm tŏk blah adrol, na sư pơm yŏng pơgơ̆r.

⁷Đawit oei lăm kơđông 'noh; na đe krao pơlei Đawit.

⁸Sư pơm pơlei jum dăr, đơ̆ng Milô; na Jôap sư pơm pơkeh lu pơlei tam mă pơm.

⁹Đawit rai đunh rai pran kơtang; yua kơ Kră Yang Tih Hloh oei hơdai sư.

¹⁰'Nâu boih lu yŏng bơngai nuih pran kơtang, pơgơ̆r lu linh Đawit, tơgŭm hơdai hăm đĭ-đăng bơngai Isơrael, wă pơm kơ dêh char pơtao Đawit pran kơjăp, thoi nơ̆r Kră Yang đei pơkă.

¹¹'Nâu anăn dôm lu linh nuih pran kơtang kiơ̆ Đawit: Jahôbêam, kon drŏ-nglo Hakmôni, pơm yŏng kơ lu bơngai pơgơ̆r; 'noh bơngai yua đao tơju sư kơdih mă pơlôch pêng-hrĕng 'nu bơngai lăm minh 'măng.

¹²Đơ̆ng rŏng kơ sư Êlêasar kon drŏ-nglo Đôđô bơngai Ahôbit, minh 'nu lăm pêng 'nu, sư bơngai nuih pran kơtang hloh.

¹³Sư oei hơdai hăm Đawit tơ Pas Đammim, lăp lu linh Philistin akŭm băl wă tơblah. Tơ noh đei na chŭn 'ba tơ'bâu, anih mă lu linh kơdâu kơ linh Philistin.

¹⁴Mă-lei lu sư dơ̆ng lăm na chŭn blah drŭt lu linh Philistin kơdâu đĭ thoi noh Kră Yang ăn kĕ jei lu sư tih dêh tơpă.

¹⁵Lăm pêng-jĭt 'nu bơngai pơgơ̆r đei pêng 'nu bơngai năm jur tơ'bơ̆p Đawit lăm hơgơp tơmo tơ Ađulam, kơplah noh lu linh Philistin oei dơ̆ng pơm anih tơ lăm Thŭng Rêphaim.

¹⁶Kơplah 'noh Đawit oei lăm kơđông kơjăp, păng lu linh Philistin oei răp tơ pơlei Betlehem.

¹⁷Đawit rơhing kơ đak na khan: “Ơ rŏ kơ đei bu năm ba kơ inh đak nhă đơ̆ng đak sơlŭng jê̆ 'măng jang pơlei Betlehem!”

¹⁸Na pêng 'nu bơngai 'nâu năm mơ̆t tơpăt kơđông linh Philistin sŏ iŏk đak đơ̆ng lăm sơlŭng jê̆ 'măng jang pơlei Betlehem, chĕp ba ăn kơ Đawit nhă mă-lei sư ưh kơ wă nhă, sư tuh hloi đak 'noh 'bơ̆t anăp Kră Yang,

¹⁹na khan: “Apinh Kră Yang 'Bok Kei-Dei wei inh ưh kơ pơm tơdrong 'nâu; liơ Inh gơh huch pham lu bơngai 'nâu, yua kơ lu sư hŭt akâu kơdih wă kơ iŏk đak âu.” Thoi noh, na Đawit ưh kơ chu nhă đak. Noh mă lu tơdrong jang pêng 'nu bơngai nuih kơtang đei pơm.

²⁰Abisai, oh Jôap pơm yŏng kơ pêng 'nu bơngai nuih kơtang; sư yua tơju na blah pơlôch pêng-hrĕng 'nu bơngai, na đe ư-ang anăn sư thoi pêng 'nu 'noh.

²¹Lăm pêng 'nu bơngai nuih kơtang 'noh sư đe ư-ang hloh na pơm kơ̆l wei-lăng lu sư, mă-lei ưh kơ đei dang pêng 'nu bơngai adrol noh.

²²Bênaia, kon drŏ-nglo Jêhôiada bơngai Kapsel, minh 'nu bơngai linh nuih kơtang đei pơm lơ tơdrong jang tih; sư pơlôch 'bar 'nu bơngai Môap mă pran kơtang hloh; lăm minh năr prĕl jruh sư jur năm tơ minh pôm sơlŭng pơlôch Dăm-brang.

²³Sư kư̆m pơlôch minh 'nu bơngai Êyiptơ kơjung 'bar hlok minh hơgăt mă bơngai Êyiptơ ti sư chĕp tơju tih tŏ 'long hơtơ̆ng brai, Bênaia năm tơblah sư chĕp minh pôm 'long tơnôn, na tơgar iŏk tơju đơ̆ng ti bơngai Êyiptơ na 'bet pơlôch bơngai noh.

²⁴'Noh jơ̆ tơdrong Bênaia, kon drŏ-nglo Jêhôiada đei pơm đe kư̆m ư-ang kơ sư thoi pêng 'nu bơngai nuih kơtang noh.

²⁵Lăm pêng-jĭt 'nu bơngai nuih kơtang, sư đe kư̆m ư-ang hloh, mă-lei ưh kơ gơh jô̆ mơ̆t lăm pêng 'nu noh. Đawit iŏk sư mơ̆t pơgơ̆r wei-lăng linh mă wei sư.

²⁶Lu bơngai nuih kơtang 'noh: Asahel oh Jôap; Êlhanan kon drŏ-nglo Đôđô đơ̆ng pơlei Betlehem;

²⁷Sammôt bơngai Harôt; Hêlês bơngai Pelônit;

²⁸Ira kon drŏ-nglo Ikês đơ̆ng pơlei Têkôa; Abiêser đơ̆ng pơlei Anothôt.

²⁹Sibêkai bơngai Husatit; Ilai bơngai Ahôhit;

³⁰Maharai bơngai Nêtôphatit; Hêlêt, kon drŏ-nglo Baana bơngai Nêtôphatit;

³¹Ithai, kon drŏ-nglo Ribai đơ̆ng pơlei Gibêah, kon Sâu, Bênjamin, Bênaia bơngai Phirathônit;

³²Hurai đơ̆ng thong đak Gaas; Abiel bơngai Arba;

³³Asmawet bơngai Baharum; Êliahba bơngai Saalbônit;

³⁴lu kon drŏ-nglo Hasem bơngai Gisônit; Jônathan, kon drŏ-nglo Sage bơngai Hararit;

³⁵Ahiam, kon drŏ-nglo Sakar bơngai Hararit; Eliphal, kon drŏ-nglo Ur;

³⁶Hêpher bơngai Mêkêrathit; Ahija bơngai Phelônit;

³⁷Hêsrô bơngai Karmel, Naarai kon drŏ-nglo Êsbai.

³⁸Jôel oh Nathan; Miphar, kon drŏ-nglo Hagri;

³⁹Sêlek bơngai Ammôn; Naharai bơngai Bêrôt, bơngai chĕp tơmam tơblah Jôap, kon drŏ-nglo Sêruia;

⁴⁰Ira bơngai Ithrit; Garep kư̆m bơngai Ithrit;

⁴¹Uri bơngai Hêtit; Sabat, kon drŏ-nglo Ahlai;

⁴²Ađina kon drŏ-nglo Sisa, bơngai Rubên, yŏng kơdră adrĕch Rubên, păng đei pêng-jĭt 'nu linh kiơ̆ sư;

⁴³Hanan, kon drŏ-nglo Maaka; Jôsaphat bơngai Mitnit;

⁴⁴Usia bơngai Asterathit. Sama păng Jêiêl, kon drŏ-nglo Hôtham bơngai Arôe;

⁴⁵Jêđiael, kon drŏ-nglo Simri; Jôha, oh sư bơngai Thisit;

⁴⁶Êliel bơngai Mahawit, Jêribai păng Jôsawia, kon drŏ-nglo Êlnaam; Itma bơngai Môap;

⁴⁷Êliel, Ôbêt, păng Jaasiel bơngai Mêtsôbait.