Read bahnar I Ho 14 Bible Online

I Ho 14 - bahnar bible

I Ho 14

¹Hiram, pơtao Tirơ, wơh bơngai năm tơ pơtao Đawit, hăm gơih ăn kơ sư 'long hơngo, bơngai man, bơngai jang 'long, wă pơm hnam pơtao ăn kơ sư.

²Đawit băt kơ Kră Yang ăn kơ sư pơm pơtao lu bơngai Isơrael. Teh đak sư rai tih rai să yua kơ Isơrael kon pơlei Kră Yang.

³Lăm Jêrusalem Đawit đei iŏk lơ akăn plơ̆ng, păng pơjing kơ lơ kon drŏ-nglo kon drŏ-kăn.

⁴'Nâu anăn lu kon sư pơjing tơ Jêrusalem: Sammua, Sôbap, Nathan, Sôlômôn,

⁵Iphar, Êlisua, Êlpêlek,

⁶Nôga, Nêphet, Japhia,

⁷Êlisama, Bêeliađa păng Êliphêlet.

⁸Lăp kon pơlei Philistin kơtơ̆ng Đawit đe tuh pơgang 'bâu phu pôk pơm pơtao kơ đĭ-đăng lu bơngai Isơrael, na đĭ-đăng bơngai Philistin năm chă sư; pơtao Đawit kơtơ̆ng tơdrong noh, sư năm sơng hloi lu sư.

⁹Kon pơlei Philistin năm truh, blah pơrăm Thŭng Rêphaim.

¹⁰Đawit krao apinh Kră Yang 'Bok Kei-Dei khan: “Inh hăm gơh năm blah kon pơlei Philistin ưh? Ih hăm pơjao lu sư lăm ti inh ưh?” Kră Yang tơl nơ̆r sư: “Năm bĕ; Inh gô pơjao lu sư lăm ti ih.”

¹¹Na Đawit hăm lu buăl sư tŏk năm tơ Baal Phêrasim, na tơ noh Đawit blah lu linh Philistin jei sư; Đawit khan: “Kră Yang 'Bok Kei-Dei đei yua ti inh blah pơchah lê̆ lu bơngai ayăt kơ inh, nhen thoi đak blŭng kơ bơnơ̆ pơchah.” Thoi noh na đe krao anih noh Baal Pêrasim.

¹²Bơngai Philistin achăng hŭt lê̆ lu rup yang lu sư tơ anih 'noh; na Đawit athei soh pơđĭ lê̆ lăm ŭnh.

¹³Lu bơngai Philistin năm pơrăm lăm thŭng dơnă.

¹⁴Na Đawit krao apinh Kră Yang 'Bok Kei-Dei dơ̆ng; Kră Yang 'Bok Kei-Dei tơl nơ̆r sư: “Ih 'nĕ kơ năm tơpăt lu sư, athei năm dăr đơ̆ng rŏng na blah lu sư tơ anăp kơdrơ̆ng 'long hơngo bri.

¹⁵Lăp ih kơtơ̆ng jơ̆ng sư nơnăm yak lăm kơdrơ̆ng 'long hơngo bri, lei ih năm blah hloi, yua kơ Kră Yang 'Bok Kei-Dei năm adrol kơ ih wă tơblah lu linh Philistin.”

¹⁶Na Đawit pơm thoi nơ̆r Kră Yang 'Bok Kei-Dei pơkă ăn; păng lu sư blah pơrăm lu linh Philistin đơ̆ng Gibeôn truh tơ Geser.

¹⁷Anăn Đawit kơtơ̆ng ư-ang jơ̆p-jang kơ teh đak; Kră Yang pơm ăn kơ lu khŭl kon pơlei pơla hli kơ Đawit.