Read bahnar I Ho 15 Bible Online

I Ho 15 - bahnar bible

I Ho 15

¹Đawit pơm hnam pơtao kơ sư kơdih lăm pơlei Đawit păng hơmet lê̆ minh anih wă 'măn Hom Pơgơ̆p Kră Yang 'Bok Kei-Dei.

²Kơplah noh Đawit khan 'nguaih kơ bơngai Lêwi, ưh kơ đei bơngai bu gơh tung Hom Pơgơ̆p Kră Yang 'Bok Kei-Dei, yua kơ Kră Yang 'Bok Kei-Dei rơih iŏk boih lu sư wă tung Hom Pơgơ̆p Kră Yang 'Bok Kei-Dei păng bơ̆jang kơ Kră Yang ling-lang.

³Đawit krao akŭm đĭ-đăng bơngai Isơrael brŏk tơ pơlei Jêrusalem, wă iŏk Hom Pơgơ̆p Kră Yang 'Bok Kei-Dei 'măn tơ anih mă sư hơmet boih.

⁴Đawit krao akŭm lu kon sâu Arôn păng Lêwi.

⁵Gah adrĕch adrung Kôhat đei Uriel, pơm yŏng pơgơ̆r păng lu 'nhŏng oh sư, đei minh-hrĕng 'bar-jĭt 'nu;

⁶Đơ̆ng adrĕch adrung Mêrari đei Asaia, bơngai pơgơ̆r păng lu 'nhŏng oh sư, đei 'bar-hrĕng 'bar-jĭt 'nu.

⁷Đơ̆ng adrĕch adrung Gersôm đei Jôel, yŏng pơgơ̆r păng lu 'nhŏng oh sư, đei minh-hrĕng pêng-jĭt 'nu.

⁸Đơ̆ng adrĕch adrung Êlisaphan đei Sêmaia, yŏng pơgơ̆r păng lu 'nhŏng oh sư, đei 'bar-hrĕng 'nu.

⁹Đơ̆ng adrĕch adrung Hêbrôn đei Êliel, yŏng pơgơ̆r păng lu 'nhŏng oh sư đei tơhngam-jĭt 'nu;

¹⁰đơ̆ng adrĕch adrung Usiel đei Aminađap, yŏng pơgơ̆r păng lu 'nhŏng oh sư đei minh-hrĕng mơjĭt-'bar 'nu.

¹¹Đawit krao 'bok soi Sađok, Abiathar păng lu bơngai Lêwi đei Uriel, Asaia, Jôel, Sêmaia, Êliel păng Aminađap.

¹²Sư khan kơ đe noh: “Lu iĕm bơngai yŏng pơgơ̆r lăm adrĕch adrung Lêwi; iĕm athei hơmet akâu iĕm hăm lu 'nhŏng oh iĕm mă 'lơ̆ng rơgoh wă tung Hom Pơgơ̆p Kră Yang 'Bok Kei-Dei Isơrael ba tơ anih mă inh đei hơmet lê̆ boih.

¹³Yua kơ adrol ki, lu iĕm ưh kơ tung ba hom Kră Yang yua kơ lu bơ̆n ưh kơ đei krao apinh Sư thoi Sư đei pơkă, na Kră Yang 'Bok Kei-Dei hil mĭl pơrăm lê̆ lu bơ̆n.”

¹⁴Na lu 'bok soi păng bơngai Lêwi hơmet akâu kơdih 'lơ̆ng rơgoh na tung ba Hom Pơgơ̆p Kră Yang 'Bok Kei-Dei Isơrael.

¹⁵Lu bơngai Lêwi iŏk 'long tơnung tung Hom Pơgơ̆p Kră Yang 'Bok Kei-Dei tơ kơpal hơngiĕng, thoi Môis bơtho khan kiơ̆ kơ nơ̆r Kră Yang.

¹⁶Đawit pơkă ăn kơ lu bơngai pơgơ̆r lăm lu bơngai Lêwi, athei rơih iŏk lăm 'nhŏng oh lu sư, lu bơngai hơri, reh brŏ dung, tĭng-nĭng, preh chhar hơri chơt hiôk.

¹⁷Na bơngai Lêwi athei hloi Hêman kon drŏ-nglo Jôel đơ̆ng lăm lu 'nhŏng oh sư, Asap, kon drŏ-nglo Bêrekia, đơ̆ng lu bơngai Mêrari, iŏk Êthan, kon drŏ-nglo Kusaia;

¹⁸hơdai hăm lu sư kư̆m đei lu 'nhŏng oh sư lăm khŭl mă 'bar, Sachari, Jaasiêl, Sêmiramôt, Jêhiêl, Unni, Êliap, Bênaia, Maasêia, Matithia, Êliphêlêhu, Miknêia, Ôbêt Eđôm păng Jêiêl, mă bơngai gak 'măng jang.

¹⁹Lu bơngai hơri, Hêman, Asap păng Êthan, preh chhar kong.

²⁰Sachari, Asiêl, Sêmiramôt, Jêhiêl, Unni, Êliap, Maasêia păng Bênaia, yua tĭng-nĭng reh kiơ̆ kơ tơ'nguơ̆ Alamôt;

²¹Matithia, Êliphêlêhu, Miknêia, Ôbêt Eđôm, Jêiêl păng Asasia, lu sư yua reh brŏ dung kiơ̆ kơ tơ'nguơ̆ Semini.

²²Kênania yŏng pơgơ̆r bơngai Lêwi, wei-lăng tơdrong hơri păng noh tơdrong jang sư, yua kơ sư gơh hơgei gah tơdrong noh.

²³Bêrekia păng Êlkana, gak 'măng anăp kơ hom pơgơ̆p.

²⁴Sêbania, Jôsaphat, Nêthanêl, Amasai, Sachari, Bênaia, păng Êliêser, lu 'bok soi, hlôm keng 'bơ̆t anăp Hom Pơgơ̆p Kră Yang 'Bok Kei-Dei. Ôbêt Eđôm păng Jêhiia gak 'măng 'bơ̆t anăp hom pơgơ̆p.

²⁵Na, Đawit, lu kră bơngai Isơrael păng lu yŏng pơgơ̆r minh-rơbâu linh, năm tung ba Hom Pơgơ̆p Kră Yang 'Bok Kei-Dei đơ̆ng hnam Ôbêt Eđôm hăm tơdrong hiôk chơt.

²⁶Yua kơ Kră Yang 'Bok Kei-Dei tơgŭm lu bơngai Lêwi tung ba Hom Pơgơ̆p Kră Yang, na pơyơ̆r tơmam soi tơpơh tŏ rơmo tơno, păng tơpơh tŏ triu tơno.

²⁷Đawit păng lu bơngai Lêwi tung hom pơgơ̆p, lu bơngai hơri, Kênania, yŏng pơgơ̆r lu bơngai hơri, tă kơ hrŭk ao tai che 'bui ngăl; Đawit kư̆m hrŭk tơ akâu sư minh blah ao êphot păng che 'bui.

²⁸Na đĭ-đăng bơngai Isơrael năm tung Hom Pơgơ̆p Kră Yang hăm nơ̆r jreo tơkĕch hiôk chơt, kơtơ̆ng jơwa hlôm keng păng jơwa tơgiĕp preh chhar reh tĭng-nĭng păng brŏ dung.

²⁹Lăp Hom Pơgơ̆p Kră Yang truh mơ̆t tơ lăm pơlei Đawit, na Mikal, kon drŏ-kăn Sôl, lăng đơ̆ng 'măng-'mŏk, 'bôh pơtao Đawit yŭn suang hiôk chơt, na lăm jơhngơ̆m sư areh ưh kơ lăp đon.