Read bahnar I Ho 16 Bible Online

I Ho 16 - bahnar bible

I Ho 16

¹Lu sư tung ba Hom Pơgơ̆p Kră Yang 'Bok Kei-Dei păng dan 'măn sư lăm bơsŭn mă Đawit pơdơ̆ng. Lu sư kư̆m pơyơ̆r tơmam soi 'buh păng tơmam soi pơyơ̆r hiôk-hian 'bơ̆t anăp Kră Yang 'Bok Kei-Dei.

²Đang kơ pơyơ̆r tơmam soi 'buh hăm tơmam soi pơyơ̆r tơdrong hiôk-hian, Đawit sư yua hăm anăn Kră Yang, sơkat pŭn hiôk ăn kơ kon pơlei pơla.

³Na asong ăn kơ đĭ-đăng kon pơlei Isơrael drŏ-nglo drŏ-kăn rim 'nu minh pôm 'bĕng mi, minh kơnăt 'nhĕm, păng minh pôm 'bĕng plei hơmu kro.

⁴Sư ăn mơ'nah lu bơngai Lêwi bơ̆jang awih awăn 'bơ̆t anăp Hom Pơgơ̆p Kră Yang, wă krao khan bơnê kơkuh kơ Kră Yang 'Bok Kei-Dei Isơrael.

⁵Asap pơgơ̆r tơm Sachari kơiĕng tơgŭm sư, păng đei Jêiel, Sêmiramôt, Jêhiel, Mathihia, Êliap, Bênaia, Ôbêt, Êdôm hăm Jêiêl tơdrong jang sư reh brŏ reh tĭng-nĭng păng brŏ dung Asap preh chhar,

⁶Bênaia hăm Jahasiêl bre sư 'bok soi lu hlôm keng ling-lang 'bơ̆t anăp Hom Pơgơ̆p Kră Yang 'Bok Kei-Dei.

⁷'Bơ̆t năr noh Đawit pơjao ăn blŭng-a kơ Asap hăm lu 'nhŏng oh sư jang hơri bơnê kơ Kră Yang.

⁸Bơnê bĕ kơ Kră Yang, krao khan hăm anăn Sư. Roi tơbăt bĕ tơdrong jang Sư pơm boih lăm lu kon pơlei.

⁹Hơri bĕ kơ sư, hơri bơnê bĕ kơ sư. Ră roi bĕ dôm tơdrong jang hlĭch chrơp Sư!

¹⁰Ư-ang bĕ anăn rơgoh 'lơ̆ng Sư; Ăn jơhngơ̆m lu đe bu chă Kră Yang đei tơdrong chhôk hơnôk.

¹¹Chă bĕ Kră Yang hăm tơdrong pran kơtang Sư. Chă bĕ muh măt Sư ling-lang!

¹²'Blŏk bĕ tơdrong jang hlĭch chrơp Sư đei pơm bơih. Tơdrong hlĭch chrơp Sư păng tơdrong Sư sek tơlang.

¹³Ơ adrĕch adrung Isơrael đĭch đam Sư, ơ lu kon sâu Jakôp mă sư rơih iŏk bơih!

¹⁴Sư boih Kră Yang 'Bok Kei-Dei bơ̆n; Sư sek tơlang jơ̆p-jang kơ teh đak.

¹⁵Sư 'blŏk ling-lang tơdrong Sư pơgơ̆p, nơ̆r Sư pơkă truh tơ rơbâu jơhnơr,

¹⁶Tơdrong Sư pơgơ̆p hăm Abraham, tơdrong sư pơkăm bơih hăm Isăk.

¹⁷Tơdrong juăt Sư pơkăm pơkă bơih hăm Jakôp, tơdrong pơgơ̆p Sư ling-lang hăm Isơrael.

¹⁸Sư khan: “Inh gô ăn kơ lu iĕm char Kanaan. Jing teh lu iĕm jang sa.”

¹⁹Kơplah noh lu sư oei tŏ sĕt đe jô̆ ưh kơ kăl ôh. Păng lu sư chă oei pơdơh tơ noh 'biơ̆ đĕch.

²⁰Chă thông hoang đơ̆ng dêh char âu năm tơ teh đak to, đơ̆ng kon pơlei pơla âu, năm tơ pơlei pơla to.

²¹Sư ưh kơ ăn bu pơjuă kơtĭt lu sư. Sư chrih hil kơ lu pơtao yua kơ lu sư.

²²'Nĕ hơtŭt kơ bơngai Inh đei tuh bơih đak rơmă 'bâu phu. “Păng 'nĕ pơm kơnê̆ kơ lu bơngai khan lê̆ adrol Inh!”

²³Ơ đĭ-đăng bơngai kơpal teh đak, hơri bơnê bĕ kơ Kră Yang. Rim năr roi bĕ tơdrong Sư dŏng pơklaih.

²⁴Roi pơdah bĕ tơdrong ư-ang Sư tơ lăm lu adrĕch adrung bơngai. Tơdrong hlĭch Sư pơm bơih tơ lăm đĭ-đăng kon pơlei.

²⁵Yua kơ Kră Yang tih krưp tơpă, trŏ kơkuh bơnê. Trŏ kơ hli pơyom hloh kơ đĭ-đăng lu yang.

²⁶Yua kơ đĭ-đăng yang lu kon pơlei chă pơm rup đĕch. Mă-lei Kră Yang pơjing lu tăl plĕnh.

²⁷'Bơ̆t anăp Sư noh rang mơnhal 'lơ̆ng rŏ krưp; lăm anih sư oei đei mơsêh mơyang pran kơtang hiôk chơt.

²⁸Ơ lu adrĕch adrung kon pơlei, pôk pơư bĕ kơ Kră Yang. Kră Yang ư-ang pran kơtang!

²⁹Pôk pơư bĕ kơ Kră Yang tơdrong ư-ang lăp kơ anăn Sư. Chĕp ba bĕ tơmam soi pơyơ̆r 'bơ̆t anăp Sư! Kơkuh pơyom bĕ kơ Kră Yang lăm tơdrong 'lơ̆ng rơgoh Sư.

³⁰Hli tơtơ̆ bĕ 'bơ̆t anăp Sư, ơ đĭ-đăng teh đak; Tơpă, Sư pơjing teh đak oei kơjăp, ưh kơ đei tơdrŏ tơdrĕnh.

³¹Ơ lu tăl plĕnh chơt hiôk bĕ, ơ teh đak 'nă hal bĕ. Ơ kon pơlei oei lăm teh đak roi pơdah bĕ. “Kră Yang tơ'ngla pơgơ̆r.”

³²Ăn kơ đak dơsĭ păng đĭ-đăng tơmam lăm dơsĭ ôr bĕ. Ăn kơ chŭn mir păng đĭ-đăng tơmam lăm noh hiôk chơt.

³³Kơplah noh đĭ-đăng 'long pơle lăm bri gô hơri hăm tơdrong chơt hiôk, 'bơ̆t anăp Kră Yang, Yua kơ Sư jur wă sek tơlang kơ teh đak.

³⁴Bơnê bĕ kơ Kră Yang, yua kơ Sư pơm 'lơ̆ng. Tơdrong Sư 'mêm mơnat oei ling-lang khŏm khŏm!

³⁵Khan bĕ. “Pơklaih nhôn bĕ, ơ Kră Yang 'Bok Kei-Dei Tơ'ngla dŏng pơklaih lu nhôn. Akŭm păng pơklaih bĕ lu nhôn đơ̆ng lăm lu dêh char wă kơ nhôn gơh hơri bơnê kơ anăn 'lơ̆ng rơgoh Ih. Na nhôn đei ư-ang kơ Ih lăm tơdrong hơri bơnê kơ Ih.”

³⁶Bơnê kơ Kră Yang, 'Bok Kei-Dei Isơrael. Trŏ hơri ư-ang ling-lang. Đĭ-đăng lu kon pơlei pơla khan bĕ: “A-men! Bơnê kơkuh kơ Kră Yang.”

³⁷Đawit pôk Asap hăm lu 'nhŏng oh sư oei kơtă tơ noh 'bơ̆t anăp hom pơgơ̆p Kră Yang wă bơ̆jang ling-lang 'bơ̆t anăp hom pơgơ̆p kiơ̆ trŏ thoi đêl hơgăt.

³⁸Lei-lăi mơ̆n sư kư̆m pôk Ôbêt Eđôm hăm tơdrâu-jĭt tơhngam 'nu 'nhŏng oh sư Ôbêt Eđôm kon drŏ-nglo Jêđuthun hăm Hôsa ăn kơ sư wei gak 'măng dur.

³⁹Sư lê̆ Sađok 'bok soi hăm lu 'nhŏng oh sư pơm 'bok soi 'bơ̆t anăp bơsŭn anih akŭm Kră Yang lăm anih kơjung tơ pơlei Gibeôn.

⁴⁰Wă kơ pơyơ̆r tơmam soi 'buh kơ Kră Yang tơ kơpal chơnang soi 'buh ling-lang pơgê hăm kơsơ̆, kiơ̆ thoi đei chih lăm tơdrong juăt Kră Yang pơkă bơih kơ lu bơngai Isơrael.

⁴¹Hơdai hăm lu sư đei Hêman hăm Jêđuthun păng lu bơngai nai mă đei rơih hăm 'măn lu sư jang kơkuh bơnê kơ Kră Yang “kơ tơdrong sư 'mêm mơnat oei oei ling-lang khŏm khŏm.”

⁴²Hêman hăm Jêđuthun hlôm keng, preh chhar, hăm yua lu tơmam nai wă hơri kơkuh kơ Kră Yang 'Bok Kei-Dei. Lu kon drŏ-nglo Jêduthun tơdrong jang lu sư wei gak 'măng jang.

⁴³Đĭ-đăng lu kon pơlei wih brŏk tơ hnam lu sư kơdih; gah Đawit wih tơ hnam wă sơkat pŭn hiôk kơ hnam dơnŏ sư.