Read bahnar I Ho 17 Bible Online

I Ho 17 - bahnar bible

I Ho 17

¹Lăp Đawit oei lăm hnam pơtao sư boih, Đawit khan kơ Nathan bơngai khan lê̆ adrol: “Âu inh oei lăm hnam pơtao pơm păng 'long hơngo, mă-lei Hom Pơgơ̆p Kră Yang tơ lăm bơsŭn.”

²Nathan tơl Đawit. “Pơm bĕ tơdrong kiơ ih wă, yua kơ Kră Yang 'Bok Kei-Dei oei hơdai hăm ih.”

³Lăm măng noh mơ̆n Kră Yang pơma dơnuh hăm Nathan na khan.

⁴“Năm roi bĕ kơ đĭch đam Inh Đawit,” 'Nâu Kră Yang khan: Ih ưh kơ đei pơm ăn kơ Inh hnam wă oei ôh.

⁵Inh ưh tam mă oei ôh lăm hnam đơ̆ng năr Inh chông tơlĕch lu bơngai Isơrael đơ̆ng dêh Êyiptơ truh tơ năr âu, Inh năm đơ̆ng bơsŭn âu tơ bơsŭn nai, đơ̆ng anih oei âu tơ anih oei nai.

⁶Lăm jơ̆p-jang anih Inh năm hơdai hăm lu bơngai Isơrael bơih. Inh hăm lah pơma hăm kră pơgơ̆r Isơrael, bơngai mă Inh đei athei boih wei kon pơlei Inh khan: “Thoi yơ iĕm ưh kơ đei pơm kơ Inh minh pôm hnam hăm 'long hơngo?”

⁷Na dang ei khan bĕ kơ Đawit đĭch đam Inh Kră Yang Tih Hloh khan: Inh iŏk ih đơ̆ng dơnih 'nhĕt, đơ̆ng bơngai wei triu wă kơ ih pơm kră wei-lăng pơgơ̆r kon pơlei Inh bơngai Isơrael.

⁸Inh đei oei hơdai hăm ih boih tơ rim anih ih năm păng Inh pơlôch đĭ-đăng lu ayăt 'bơ̆t anăp ih; păng Inh gô ăn anăn ih ư-ang nhen thoi anăn lu bơngai pơm tih hloh lăm teh đak,

⁹Inh gô ăn anih kơ kon pơlei pơla Inh Isơrael. Inh gô pơtăm lu sư tơ noh, wă kơ lu sư đei pơlei oei wă kơ đe huay pă đei pơrŭng lu sư boih, hăm wă kơ lu bơngai kơnê̆ pă đei năm pơrăm lu sư dơ̆ng, thoi chăl adrol sơ̆,

¹⁰đơ̆ng chăl Inh ăn đei kră pơgơ̆r wei-lăng kon pơlei pơla Inh Isơrael păng Inh gô ăn đĭ-đăng lu ayăt chu yom kiơ̆ ih. “Inh roi ăn kơ ih băt Kră Yang gô pơm ăn kơ dêh char pơtao ih kơjăp.

¹¹Truh năr ih wă tôch lôch năm oei hơdai hăm lu 'bok ih, Inh gô pôk hơtŏk minh 'nu pơtrơp ih, minh 'nu lăm lu kon drŏ-nglo ih pơtrơp đơ̆ng ih, păng Inh gô ăn kơ dêh char sư kơjăp.

¹²Sư boih gô pơm minh pôm hnam kơ Inh păng Inh gô ăn tang-dŏ pơtao sư kơjăp ling-lang.

¹³Inh jing 'bă sư păng sư jing kon drŏ-nglo Inh, Inh ưh kơ đei pơdrâu iŏk ôh tơdrong Inh 'mêm đơ̆ng sư, thoi inh pơdrâu iŏk đơ̆ng bơngai adrol kơ ih.

¹⁴Inh gô pơm kơ sư kơjăp lăm hnam Inh hăm lăm dêh char pơtao Inh ling-lang, tang-dŏ pơtao sư gô kơjăp ling-lang.”

¹⁵Nathan roi đĭ-đăng tơdrong tơ'bôh nơ̆r tơtă kơ Đawit.

¹⁶Na pơtao Đawit mơ̆t păng hơ-oei 'bơ̆t anăp Kră Yang păng khan: “Ơ Kră Yang 'Bok Kei-Dei inh âu bu păng hnam dơnŏ inh liơ na Ih mah ba inh truh tơ âu?

¹⁷Tơdrong âu Ih lăng thoi oei iĕ đĕch 'bơ̆t anăp Ih, Ơ Kră Yang 'Bok Kei-Dei, Ih kư̆m đei roi mơ̆n kơ dêh char pơtao đĭch đam Ih tơ anăp âu kơnh păng lăng inh thoi bơngai đei đe pơyom hloh, Ơ Kră Yang 'Bok Kei-Dei.

¹⁸“Đawit ưh pă băt wă bơnê kơ Kră Yang thoi yơ dơ̆ng, yua kơ đơ̆ng Ih pơyom kơ đĭch đam Ih? Yua kơ Ih băt nhen kơ đĭch đam Ih.

¹⁹Yua kơ đĭch đam ih boih, Ơ Kră Yang, kiơ̆ thoi Ih wă, Ih đei pơm boih tơdrong tih âu ăn kơ inh băt đĭ-đăng tơdrong pơkă tih âu.

²⁰Ưh kơ đei bu thoi Ih ôh, ơ Kră Yang păng ưh kơ đei Kră Yang 'Bok Kei-Dei nai thoi Ih, kiơ̆ thoi đon lu nhôn đei kơtơ̆ng boih.

²¹Hăm đei kon pơlei ayơ lăm teh đak âu nhen thoi lu kon pơlei Ih Isơrael, Ih năm dơ̆ng pơklaih minh kon pơlei pơla kơ Ih kơdih pơm kơ anăn Ih kơdih tih-tin krưp tơpă trŏ kơ đe hli yom, kơplah Ih pơpuh tơweh lu adrĕch adrung nai 'bơ̆t anăp lu kon pơlei Ih, hăm tơdrong mơsêh mơyang kon pơlei Ih mă đei dŏng pơklaih boih đơ̆ng char Êyiptơ?

²²Ih rơih boih kon pơlei Ih Isơrael jing kon pơlei pơla Ih kơdih ling-lang khŏm khŏm păng Ih boih ơ Kră Yang, 'Bok Kei-Dei lu sư.

²³Dang ei, ơ Kră Yang ăn kơ nơ̆r Ih pơkă pơ'ngam kơ đĭch đam Ih hăm hnam dơnŏ sư oei kơjăp ling-lang khŏm khŏm, apinh Ih pơm bĕ kiơ̆ thoi Ih đei pơkă boih,

²⁴wă kơ Anăn Ih kơjăp tih hăm oei đei ling-lang khŏm khŏm. Đe gô khan: Kră Yang Tih Hloh, 'noh 'Bok Kei-Dei Isơrael, 'noh boih jing Kră Yang 'Bok Kei-Dei Isơrael păng ăn kơ hnam Đawit đĭch đam Ih, mă ih đei pơjing kơjăp ling-lang 'bơ̆t anăp Ih.

²⁵Ih boih Ơ Kră Yang 'Bok Kei-Dei inh, tơ'bôh boih kơ đĭch đam Ih khan Ih gô pơm ăn kơ sư hnam, thoi noh đĭch đam Ih pơ̆n krao khan 'bơ̆t anăp Ih.

²⁶Ơ Kră Yang, Ih boih 'Bok Kei-Dei, Ih pơkă boih tơdrong 'lơ̆ng âu kơ đĭch đam Ih.

²⁷Ih hiôk ăn tơdrong pŭn hiôk kơ hnam đĭch đam Ih, wă kơ sư gơh oei đei ling-lang khŏm khŏm 'bơ̆t anăp Ih, yua kơ, ơ Kră Yang, tơmam kiơ ih ăn pŭn hiôk, gô đei pŭn hiôk ling-lang khŏm khŏm!”