Read bahnar I Ho 18 Bible Online

I Ho 18 - bahnar bible

I Ho 18

¹Đang kơ noh Đawit tơblah hăm lu bơngai Philistin jei sư, păng lu sư chu kiơ̆, păng blah iŏk pơlei Gat hăm đĭ-đăng lu pơlei iĕ jum dăr đơ̆ng lu Philistin.

²Đawit tơblah hăm Môap jei sư, bơngai Môap chu kiơ̆ Đawit păng ra jên ăn kơ sư.

³Đawit tơblah hăm Hadadêser pơtao Sôba truh tơ pơlei Hamat, kơplah sư pơjing kơjăp tơdrong sư wei-lăng truh tơ đak Krong Ơphrat.

⁴Đawit blah tơgar iŏk minh-rơbâu tŏ gre aseh, tơpơh-rơbâu linh hao aseh păng 'bar-jĭt rơbâu linh yak jơ̆ng. Đawit chơ̆ng đĭ huan kơchôp jơ̆ng aseh dui gre, mă-lei oei lê̆ minh-hrĕng tŏ aseh.

⁵Kơplah lu linh Siri đơ̆ng pơlei Đamas năm dŏng Hadadêser pơtao Sôba, Đawit pơlôch 'bar-jĭt 'bar-rơbâu linh Siri.

⁶Đawit pơm kơđông linh lăm char Siri tơ pơlei Đamas hai păng lu bơngai Siri chu kiơ̆ Đawit păng ra jên ăn kơ sư Kră Yang ăn kơ Đawit truh tơ yơ tơblah jei sư tơ noh.

⁷Đawit iŏk lu khêl maih đơ̆ng lu yŏng linh Hadadêser chĕp năm ba tơ pơlei Jêrusalem.

⁸Đawit kư̆m blah iŏk mam kong lơ dêh, đơ̆ng pơlei Tiba hăm pơlei Kun lăm teh đak Hadadêser; mam kong noh pơtao Sôlômôn yua pơm bơng mong đak, jrăng păng lu tơmam yua nai.

⁹Lăp Tou pơtao Hamat, kơtơ̆ng Đawit blah pơrăm lu linh Hadadêser pơtao Sôba jei sư,

¹⁰Tou pơtao Hamat wơh kon drŏ-nglo sư Hadôram năm tơ pơtao Đawit kơkuh bơnê kơ sư yua tơblah hăm Hadadêser jei sư; Hadadêser kư̆m ngăl tơblah hăm Tou ling-lang. Hadôram chĕp ba tôm tơmam pơm hăm maih, hăm hu, hăm kong kơ Đawit.

¹¹Pơtao Đawit pơyơ̆r lu tơmam noh kơ Kră Yang hơdai hăm hu, maih mă sư đei blah iŏk đơ̆ng char Eđôm, char Môap char Ammôn, char Philistin, hăm char Amalek.

¹²Abisai kon drŏ-nglo Sêruia pơlôch mơjĭt-tơhngam rơbâu lu bơngai Eđôm lăm Thŭng dơnă 'Boh.

¹³Sư pơm kơđông linh lăm char Eđôm; păng đĭ lu bơngai Eđôm chu kiơ̆ Đawit. Kră Yang ăn kơ Đawit tơblah jei sư ngăl tơ rim anih mă sư năm.

¹⁴Đawit pơm pơtao pơgơ̆r đĭ-đăng bơngai Isơrael; sư pơm dôm tơdrong 'lơ̆ng tơpăt, tơdrong trŏ hăm đĭ-đăng lu kon pơlei sư.

¹⁵Jôap kon drŏ-nglo Sêruia yŏng kơ đĭ-đăng lu linh, păng Jêhôsaphat, kon drŏ-nglo Ahilut jing tơ'ngla chih răk dôm tơdrong truh.

¹⁶Sadok kon drŏ-nglo Ahitup păng Ahimalek kon drŏ-nglo Abiathar pơm 'bok soi, Sausa jing kră tơm chih hla bơar.

¹⁷Bênaia kon drŏ-nglo Jêhôiada pơgơ̆r lu bơngai Kêrêthit hăm lu Pêlithit; lu kon drŏ-nglo Đawit jing yŏng pơgơ̆r lăm tơdrong jang pơtao.