Read bahnar I Ho 2 Bible Online

I Ho 2 - bahnar bible

I Ho 2

¹Kon drŏ-nglo Isơrael noh: Rubên, Simêôn, Lêwi, Juđa, Isakar, Sebulôn,

²Đan, Jôsep, Bênjamin, Neptali, Gat păng Aser.

³Kon drŏ-nglo Juđa: Er, Ônan păng Sêla. Pêng 'nu âu đơ̆ng akăn bơngai Kanaan kon drŏ-kăn Sua. Er, kon kơdră Juđa, pơm tơdrong kơnê̆ 'bơ̆t anăp Kră Yang, na Kră Yang pơlôch lê̆ sư.

⁴Tamar mŏ mai Juđa, tơpŭ ăn kơ sư Phêrês păng Sêra. Juđa đei pơđăm 'nu kon drŏ-nglo.

⁵Kon drŏ-nglo Phêrês: Hêsrôn păng Hamul.

⁶Kon drŏ-nglo Sêra: Simri, Êthan, Hêman, Kalkôl păng Dara đei pơđăm 'nu.

⁷Kon drŏ-nglo Karmi: Đei Akar,a bơngai pơrŭng lăm Isơrael, pơm glăi kơ tơmam đe pơkăm.

⁸Kon drŏ-nglo Êthan: Asaria.

⁹Kon drŏ-nglo Hêsrôn pơjing: Jêrahmêel, Ram păng Kalep.

¹⁰Ram pơjing Aminađap, Aminađap pơjing Nahsôn, pơm 'bok pơgơ̆r lu bơngai Juđa.

¹¹Nahsôn pơjing Salmôn, Salmôn pơjing 'Bôô,

¹²'Bôô pơjing Ôbêt, Ôbêt pơjing Jese.

¹³Jese pơjing Êliap kon kơdră sư, kon mă 'bar sư Abinađap, mă pêng Simêa,

¹⁴mă puăn Nethanel, mă pơđăm Rađai,

¹⁵mă tơdrâu Ôsem, mă tơpơh Đawit.

¹⁶Mŏ oh lu sư Sêruia păng Abigail. Sêruia đei pêng 'nu kon drŏ-nglo Abisai, Jôap păng Asahel.

¹⁷Abigail pơjing kơ Amasa; 'bă Amasa noh Jêther bơngai Ismael.

¹⁸Kalep kon drŏ-nglo Hêsrôn. Kalep oei kơ Asuba păng Jêriôt kon bre sư noh: Jeser, Sôbap păng Arđôn.

¹⁹Wă Asuba lôch boih, na Kalep iŏk Êphrat pơjing kơ Hur.

²⁰Hur pơjing Uri, Uri pơjing Bêsalel.

²¹Đơ̆ng rŏng kơ 'noh, Hêsrôn iŏk oei tơdrâu-jĭt sơnăm boih, păng 'bĭch hăm kon adruh Makir, 'bă kơ Gileat; na đei hĭ Sêgup kơplah sư đĭ tơdrâu-jĭt sơnăm boih.

²²Sêgup pơjing Jair, bơngai mă pơgơ̆r 'bar-jĭt pêng tŏ pơlei lăm dêh Gileat.

²³Mă-lei kon pơlei Gêsur păng kon pơlei Aram tơgar iŏk pơlei Hawôt Jar păng Kênat, hăm lu pơlei iĕ jê̆ kiơ̆ 'noh đei tơdrâu-jĭt tŏ pơlei. Đĭ-đăng lu bơngai 'noh kon sâu Makir, 'bă Gileat.

²⁴Đơ̆ng rŏng kơ Hêsrôn lôch tơ tơring Kalep Êphratha boih, na akăn sư Abija tơpŭ kơ sư Asur, 'bă Têkôa.

²⁵Jêrahmêel, kon drŏ-nglo kơdră Hêsrôn: Pơjing Ram kon kơdră, Buna, Ôren, Ôsem păng Ahija.

²⁶Jêrahmêel iŏk akăn plơ̆ng dơ̆ng, anăn sư Atara; mĕ kơ Ônam.

²⁷Kon drŏ-nglo Ram, kon kơdră Jêrahmêel: Maas, Jamin păng Êkêr.

²⁸Kon drŏ-nglo Ônam: Sammai păng Jađa. Kon drŏ-nglo Sammai: Nađap păng Abisur.

²⁹Akăn Abisur anăn Abihai, tơpŭ ăn kơ sư Ahban păng Môlit.

³⁰Kon drŏ-nglo Nađap: Sêlet păng Appaim. Mă-lei Sêlet lôch ưh tam đei kon.

³¹Kon drŏ-nglo Appaim Isi. Kon drŏ-nglo Isi noh Sêsan. Kon drŏ-nglo Sêsan noh Ahlai.

³²Kon drŏ-nglo Jađa oh Sammai noh: Jêther păng Jônathan; Jêther lôch kư̆m ưh kơ đei kon.

³³Kon drŏ-nglo Jônathan: Phêlêt păng Sasa. Noh kon sâu Jêrahmêel.

³⁴Na Sêsan ưh kơ đei kon drŏ-nglo, đei kon drŏ-kăn đĕch; kư̆m đei minh 'nu đĭch bơngai Êyiptơ anăn sư Jarha.

³⁵Sêsan pơgơ̆p ăn kon drŏ-kăn sư oei kơ Jarha đĭch sư na pơjing hĭ kơ Attai ăn kơ sư.

³⁶Attai pơjing Nathan, Nathan pơjing Sabat,

³⁷Sabat pơjing Ephal, Ephal pơjing Ôbêt.

³⁸Ôbêt pơjing Jêhu. Jêhu pơjing Asaria.

³⁹Asaria pơjing Hêles. Hêles pơjing Êlêasa,

⁴⁰Êlêasa pơjing Sismai. Sismai pơjing Sallum.

⁴¹Sallum pơjing Jêkamia, păng Jekamia pơjing Êlisama. Adrĕch adrung Kalep

⁴²Kon drŏ-nglo Kalep oh Jêrahmêel: Kon kơdră sư Mêsa, 'bă kơ Sip, păng kon drŏ-nglo Marêsa, 'bă kơ Hêbrôn.

⁴³Kon drŏ-nglo Hêbrôn: Kôra, Tappua, Rêkem păng Sêma.

⁴⁴Sêma pơjing Raham păng Raham 'bă kơ Jôrkêam; Rêkem pơjing Sammai.

⁴⁵Kon drŏ-nglo Sammai noh Maôn păng Maôn 'bă kơ Bêt Sur.

⁴⁶Êpha akăn kơnhŏng Kalep, mĕ kơ Haran, Môsa păng Gases; Haran pơjing Gases.

⁴⁷Kon drŏ-nglo Jahdai: Noh Rêgem, Jôtham, Gêsan, Phêlêt, Êpha păng Saap.

⁴⁸Maaka akăn kơnhŏng Kalep, pơjing kơ Sêber păng Tirhana.

⁴⁹Sư kư̆m pơjing kơ Saap, 'bă kơ Matmanna păng Sêwa 'bă kơ Makbêna păng Gibêa. Aksa kon drŏ-kăn Kalep.

⁵⁰'Nâu lu kon sâu Kalep: Lu kon drŏ-nglo Hur, kon drŏ-nglo kơdră Êphratha: Sôbal, 'bă kơ Kiriat Jêarim.

⁵¹Salma 'bă kơ Betlehem păng Harep 'bă kơ Bêt Gađer.

⁵²Sôbal 'bă kơ Kiriat Jêarim kư̆m đei lu kon drŏ-nglo nai: Harôê păng minh puăt kon pơlei Manahathit,

⁵³lu adrĕch Kiriat Jêarim: Bơngai Ithrit, Phuthit, Sunathit păng Misrait. Đơ̆ng lu adrĕch noh na đei kon pơlei Sôrathit păng kon pơlei Êstaôl.

⁵⁴Kon sâu Salma: Betlehem, bơngai Nêtôphathit, Atrôt Bêt Jôap, minh puăt kon pơlei Manahathit păng Sôrit,

⁵⁵păng adrĕch adrung 'bok thây bơtho khôi juăt oei tơ pơlei Jabes noh bơngai Tirathit, Simeathit, păng Sukathit. 'Noh kon pơlei Kênit, đơ̆ng adrĕch Hammat, 'bă kơ adrĕch Rêkap.