Read bahnar I Ho 20 Bible Online

I Ho 20 - bahnar bible

I Ho 20

¹Bơyan choh pơtăm lăm sơnăm noh kơplah lu pơtao lĕch năm wă tơblah, Jôap ba lu linh pơrăm lăm char Ammôn, sư năm wang pơlei Rapba mă-lei Đawit oei tơ pơlei Jêrusalem. Jôap blah pơlei Rapba păng pơrăm đĭ-đăng.

²Đawit plôh iŏk môk pơtao đơ̆ng kơ̆l pơtao lu sư, trăp pêng-jĭt puăn kĭ maih, yơ̆l kơpal kơ̆l pơtao lăm môk pơtao noh tah găr tơmo gĭt, đe pơyơ̆l môk pơtao noh tơ kơpal kơ̆l Đawit, sư đei blah tơgar iŏk tơmam đơ̆ng lăm pơlei lơ dêh.

³Sư chông ba lu kon pơlei đơ̆ng pơlei noh, ăn kơ lu sư bơ̆jang hăm hơnuă, hăm hơbol bơsei păng sung bơsei. Đawit pơm thoi noh kơ đĭ-đăng pơlei lu bơngai Ammôn. Đang kơ noh Đawit hăm đĭ-đăng kon pơlei sư wơ̆t brŏk tơ pơlei Jêrusalem.

⁴Đơ̆ng rŏng kơ noh đei tơdrong tơblah hăm lu bơngai Philistin tơ pơlei Geser. Sêbêkai bơngai Husatit pơlôch Sipai minh 'nu lăm lu kon sâu bơngai Rephait, hăm lu Philistin mơ̆t kiơ̆ bơ̆jang kơ lu sư.

⁵Păng đei tơblah dơ̆ng hăm lu bơngai Philistin; Êlhanan kon drŏ-nglo Jair pơlôch Lahmi oh drŏ-nglo Gôliat minh 'nu bơngai Gitit. Gơ̆r tơju sư tih tŏ 'long không đe tanh brai.

⁶Đei minh tơdrong tơblah dơ̆ng tơ pơlei Gat. Tơ noh đei minh 'nu drŏ-nglo akâu jăn tih kơjung, đei tơdrâu tŏ hơnglâu ti păng đei tơdrâu tŏ hơnglâu jơ̆ng. Hơnglâu sư đei đĭ-đăng 'bar-jĭt puăn tŏ sư kư̆m kon sâu bơngai Rapha.

⁷Sư blei hiap bơngai Isơrael mă-lei Jônathan kon drŏ-nglo Simêa 'nhŏng Đawit pơlôch sư.

⁸Lu bơngai 'nâu lu kon sâu bơngai Rapha lăm pơlei Gat. Lu sư lôch kơ Đawit păng lu linh sư pơlôch.