Read bahnar I Ho 21 Bible Online

I Ho 21 - bahnar bible

I Ho 21

¹Yang Satan iung pơm kơ Isơrael păng pơdrŭt Đawit wă kơ jô̆ kơ̆l bơngai Isơrael.

²Đawit khan kơ Jôap păng lu yŏng pơgơ̆r linh sư: Năm jô̆ bĕ đĭ lu bơngai Isơrael, đơ̆ng pơlei Bêrsêba truh tơ char Đan. Brŏk roi kơ inh. Wă kơ inh băt dôm yơ lu sư.

³Mă-lei Jôap khan: “Apinh Kră Yang pơthim kon pơlei pơla Sư minh-hrĕng wơ̆t lơ hloh! Ơ yŏng pơtao inh, ưh kơ trŏ đĭ-đăng lu sư jing kon pơlei ih hă? Yua kơ kiơ ih wă pơm tơdrong âu? Ih wă kơ bơngai Isơrael pơm yoch hă?”

⁴Mă-lei jei nơ̆r pơtao tơtă hloh kơ nơ̆r Jôap găn, na Jôap năm tơ jơ̆p-jang kơ dêh char Isơrael wơ̆t brŏk dơ̆ng tơ pơlei Jêrusalem,

⁵Jôap roi ăn gơsô̆ kơ̆l kon bơngai kơ pơtao Đawit. Đĭ kơ bơngai Isơrael đei minh-triê̆u minh-hrĕng rơbâu bơngai drŏ-nglo gơh chĕp đao hơlă lăm noh bơngai Juđa đei puăn-hrĕng tơpơh-jĭt rơbâu 'nu bơngai gơh chĕp đao hơlă.

⁶Mă-lei tam mă đei jô̆ ôh bơngai Lêwi hăm Bênjamin yua kơ Jôap lăng krưp dêh kơ nơ̆r pơtao tơtă.

⁷Nơ̆r tơtă âu jơ̆ minh nơ̆r tơtă kơnê̆ dêh 'bơ̆t anăp Kră Yang 'Bok Kei-Dei na sư phak pơmat lu bơngai Isơrael.

⁸Đawit hơdrĭ 'bơ̆t anăp Kră Yang 'Bok Kei-Dei na khan: “Inh pơm yoch tih dêh bơih inh pơm tơdrong âu. Apinh ih 'nĕ jô̆ kơ tơdrong yoch đơ̆ng đĭch đam Ih, yua kơ inh pơm hăm tơdrong kơhlôh dêh.”

⁹Kră Yang khan kơ Gat, bơngai khan lê̆ adrol kơ Đawit.

¹⁰“Năm khan bĕ kơ Đawit: Kră Yang khan thoi âu. Inh ăn kơ ih pêng tơdrong: Rơih iŏk bĕ minh lăm pêng tơdrong noh wă kơ Inh pơm.”

¹¹Gat năm roi kơ Đawit. Kră Yang khan. ‘Ih athei rơih iŏk.’

¹²Pêng sơnăm pơngot rơwĕt dah pêng khei đei lu ayăt blah pơrăm đĭ, dah pêng năr đei đao gưm Kră Yang phak, đei tơdrong jĭ lôch hơbuh lăm char ih, linh jang 'lơ̆ng đơ̆ng Kră Yang pơrăm jơ̆p-jang dêh char Isơrael. Dang ei ih rơih iŏk ayơ wă kơ inh wih roi kơ Tơ'ngla mă wơh inh năm.

¹³“Đawit khan kơ Gat. Inh glăi dêh; ăn kơ inh huŏng lăm tơpang ti Kră Yang yua kơ tơdrong Sư 'mêm mơnat tih dêh; 'nĕ ăn kơ inh huŏng lăm ti kon bơngai.”

¹⁴Na Kră Yang ăn tơdrong jĭ lôch hơbuh truh tơ lu bơngai Isơrael; đei tơpơh-jĭt rơbâu 'nu drŏ-nglo Isơrael lôch.

¹⁵Kră Yang 'Bok Kei-Dei wơh linh jang 'lơ̆ng năm pơrăm pơlei Jêrusalem. Mă-lei kơplah lu linh jang 'lơ̆ng oei năm pơrăm pơlei Jêrusalem, Kră Yang sơ'ngon 'bôh kơ tơdrong pơrăm tih 'nâu; sư khan kơ linh jang 'lơ̆ng mă oei pơrăm: “Dôm bơih, gơ̆t ti ih.” Kơplah noh linh jang 'lơ̆ng dơ̆ng 'bơ̆t anih preh 'ba Ôrnan bơngai Jêbus.

¹⁶Đawit lăng 'bôh linh jang 'lơ̆ng Kră Yang dơ̆ng tŏk-bŏk teh hăm plĕnh. Ti sư chĕp đao yơ̆r tơ gah pơlei Jêrusalem. Kơplah noh Đawit hăm kră pơlei hrŭk 'bi sơtơ̆p kŭl-tăng kŭp muh măt tơ teh.

¹⁷Đawit Krao Kră Yang 'Bok Kei-Dei: “Hăm trŏ inh athei đe jô̆ kon pơlei? Inh bơih pơm tơdrong yoch kơnê̆ dêh? Bĕ lu triu âu hăm đei pơm kiơ ưh? Ơ Kră Yang 'Bok Kei-Dei inh, apinh ih phak inh păng hnam dơnŏ inh, 'nĕ ăn tơdrong jĭ lôch hơbuh pơm kơ kon pơlei pơla Ih.”

¹⁸Kơplah noh linh jang 'lơ̆ng Kră Yang khan kơ Gat athei khan kơ Đawit: Ih athei năm pơm minh pôm chơnang soi kơ Kră Yang tơ anih pơjuă 'ba Ôrnan bơngai Jêbus.”

¹⁹Thoi noh Đawit tŏk năm kiơ̆ thoi Gat khan hăm anăn Kră Yang.

²⁰Ôrnan oei pơjuă 'ba, sư lăng tơ rŏng 'bôh linh jang 'lơ̆ng, puăn 'nu kon drŏ-nglo sư oei kơdâu ôn.

²¹Đawit năm tơ Ôrnan, Ôrnan lăng wă 'bôh Đawit sư lĕch đơ̆ng anih pơjuă 'ba păng drap bon kơkuh kơ Đawit.

²²Đawit khan kơ Ôrnan: “Tĕch ăn kơ inh anih pơjuă 'ba âu, inh wă man chơnang soi kơ Kră Yang 'bơ̆t âu wă kơ tơdrong lôch hơbuh huay pă truh kơ kon pơlei pơla. Inh răt kiơ̆ kơ ih lăp.”

²³Ôrnan drơ̆ng Đawit: “Iŏk wăi. Apinh yŏng tơ'ngla inh iŏk pơm bĕ kiơ̆ thoi Kră Yang lăp đon Inh kư̆m ăn rơmo pơm tơmam soi pơyơ̆r 'buh tơ̆r lơ̆k pơjuă 'ba pơm 'long ŭnh, 'ba mi pơm tơmam soi phe 'ba, inh gô pơyơ̆r đĭ-đăng.”

²⁴Pơtao Đawit tơl Ôrnan. “Ưh ôh inh ưh kơ wă ôh iŏk tơmam ih wă pơyơ̆r kơ Kră Yang inh gô ăn jên tôm, inh ưh kơ gơh ôh gô pơyơ̆r tơmam soi 'buh mă ưh kơ huach kiơ.”

²⁵Thoi noh Đawit ăn tơdrâu-hrĕng Seikơl maiha wă răt anih noh.

²⁶Đawit pơm minh pôm chơnang soi kơ Kră Yang tơ noh păng pơyơ̆r tơmam soi 'buh păng pơyơ̆r tơmam soi apinh hiôk hiam, krao apinh Kră Yang, Kră Yang tơl tơwih kơ sư hăm ŭnh đơ̆ng plĕnh huŏng 'bơ̆t kơpal chơnang soi pơyơ̆r tơmam soi 'buh.

²⁷Kră Yang athei linh jang 'lơ̆ng, tah lê̆ đao lăm hơnglop sư.

²⁸Kơplah Đawit 'bôh Kră Yang tơl tơwih boih nơ̆r sư krao apinh tơ anih pơjuă 'ba Ôrnan bơngai Jêbus, sư pơyơ̆r tơmam soi tơ noh.

²⁹Yua kơ lăm chăl noh bơsŭn anih akŭm Kră Yang mă Môis đei pơm tơ lăm char glă, păng chơnang soi tơmam soi 'buh tơ anih kơjung tơ pơlei Gibeôn,

³⁰Đawit ưh kơ gơh năm tơ noh wă krao apinh Kră Yang 'Bok Kei-Dei yua kơ sư hli kơ đao gưm linh jang 'lơ̆ng Kră Yang.