Read bahnar I Ho 23 Bible Online

I Ho 23 - bahnar bible

I Ho 23

¹Đawit đĭ kră, sơnăm sư đĭ sot bơih, na sư pơchĕp ăn kơ kon drŏ-nglo sư Sôlômôn pơm pơtao Isơrael.

²Sư krao akŭm đĭ lu kră pơgơ̆r bơngai Isơrael, lu 'bok soi păng bơngai Lêwi.

³Bơngai Lêwi iŏk đơ̆ng pêng-jĭt sơnăm tơ kơpal, đe kư̆m jô̆ đĭ, đĭ-đăng đei pêng-jĭt tơhngam-rơbâu 'nu.

⁴Đawit khan. “Lăm lu bơngai noh, đei 'bar-jĭt puăn-rơbâu 'nu bơngai wei-lăng tơdrong jang lăm hnam Kră Yang; tơdrâu 'nu bơngai pơm bơngai wei-lăng păng pơm kră sek tơlang.

⁵Na puăn-rơbâu 'nu bơngai jang gak wei-lăng 'măng jang; păng puăn-rơbâu 'nu bơngai hơri ư-ang kơ Kră Yang păng brŏ inh ăn kơ bơngai hơri bơnê ư-ang.

⁶Đawit asong lu sư kiơ̆ kơ khŭl lăm pêng 'nu kon drŏ-nglo Lêwi, noh Gersôm, Kôhat păng Mêrari.

⁷Gah kon sâu Gersôm đei: Lađan păng Simêi.

⁸Kon drŏ-nglo Lađan noh: Jêhiêl pơm yŏng kơdră, Sêtham păng Jôel đei pêng 'nu.

⁹Kon drŏ-nglo Simei noh: Sêlômôt, Hasiel păng Haran pêng 'nu. Noh lu yŏng kơdră adrĕch adrung Lađan.

¹⁰Kon drŏ-nglo Simêi noh: Jahat, Sisa, Jêrus păng Bêria. Noh jơ̆ puăn 'nu kon drŏ-nglo Simêi.

¹¹Jahat pơm yŏng mă minh, na Sisa mă 'bar; mă-lei Jêrus păng Bêria, ưh kơ đei kon drŏ-nglo; na đe jô̆ lu sư thoi minh pôm hnam dơnŏ đĕch.

¹²Kon sâu Kôhat kon drŏ-nglo Kôhat noh: Amram, Ishar, Hêbrôn, Usiet, đei puăn 'nu.

¹³Kon drŏ-nglo Amram noh: Arôn păng Môis; Arôn păng kon sâu sư klah asong băl, wă pơyơ̆r lu tơmam soi 'lơ̆ng rơgoh păng ling-lang pơyơ̆r tơmam soi ăn kơ Kră Yang, bơ̆jang 'bơ̆t anăp Kră Yang hăm yua anăn Kră Yang sơkat ăn pŭn hiôk kơ kon pơlei pơla ling-lang.

¹⁴Lu drŏ-nglo Môis, bơngai Kră Yang 'Bok Kei-Dei, chih tơmơ̆t jô̆ lăm adrĕch adrung Lêwi.

¹⁵Kon drŏ-nglo Môis noh Gersôm păng Êliêser.

¹⁶Kon kơdră Gersôm noh: Subael.

¹⁷Kon sâu Êliêser noh: Rehabia kon kơdră; Êliêser ưh kơ đei kon drŏ-nglo dơ̆ng; mă-lei kon drŏ-nglo Rêhabia lơ dêh.

¹⁸Kon drŏ-nglo Ishar noh: Sêlômit kon kơdră.

¹⁹Kon drŏ-nglo Hêbrôn noh: Jêria kon kơdră, Amaria kon mă 'bar, Jahasiêl mă pêng; păng Jêkamêam mă puăn.

²⁰Kon drŏ-nglo Usiêl noh: Mika kon kơdră păng Isia kon mă 'bar.

²¹Kon sâu Mêrari kon drŏ-nglo Mêrari noh: Mahli păng Musi. Kon drŏ-nglo Mahli noh: Êlêasar păng Kis.

²²Êlêasar lôch, ưh kơ đei kon drŏ-nglo, đei lu kon drŏ-kăn đĕch: Lu kon drŏ-nglo Kis 'nhŏng oh lu sư, na iŏk oei kơ lu sư pơm akăn.

²³Kon drŏ-nglo Musi noh: Mahli, Êder păng Jêremôt đei pêng 'nu.

²⁴Noh lu kon sâu Lêwi kiơ̆ kơ adrĕch 'bă lu sư đe đei chih anăn lu yŏng kơdră păng rim 'nu kiơ̆ kơ adrĕch 'bă lu sư, bơngai drŏ-nglo iŏk đơ̆ng 'bar-jĭt sơnăm tơ kơpal, bơ̆jang lăm hnam Kră Yang.

²⁵Yua kơ noh Đawit đei khan: Kră Yang 'Bok Kei-Dei Isơrael đei ăn tơdrong hiôk-hian kơ kon pơlei Sư păng Kră Yang oei tơ Jêrusalem ling-lang.

²⁶Bơngai Lêwi kư̆m ưh pă kăl tung tôi bơsŭn dah lu tơmam gah tơdrong jang bơsŭn dơ̆ng.

²⁷Kiơ̆ nơ̆r tơtă tuch-luch Đawit, đe jô̆ pơnhen kon pơlei bơngai Lêwi, iŏk đơ̆ng 'bar-jĭt sơnăm, tơ kơpal.

²⁸Tơdrong jang lu bơngai Lêwi tơgŭm kon sâu Arôn, wă bơ̆jang lăm hnam Kră Yang, wei-lăng lu cham hnam, păng lu anih cheng, pơm rơgoh lu tơmam 'lơ̆ng rơgoh păng lăng awih awăn lăm hnam Kră Yang 'Bok Kei-Dei.

²⁹Lu sư kư̆m wei-lăng gah dan pôk 'bĕng tơ kơpal gơ'bang, tơpŭng 'ba mi wă pơyơ̆r phe 'ba wă yua pơm tơmam sa sap, 'bĕng klang ưh kơ đei 'buh pông, 'buih phang 'bĕng pơjrâu hăm đak rơmă păng kŏng pơtŏ tih iĕ.

³⁰Rim pơgê păng rim kơsơ̆, lu bơngai Lêwi athei dơ̆ng tơ noh kơkuh bơnê păng hơri ư-ang kơ Kră Yang

³¹păng mưh wă pơyơ̆r tơmam soi 'buh kơ Kră Yang lăm năr Sa'bat, năr Khei Tơ'bang păng năr pơm giĕng tih, kiơ̆ kơ đei hơgăt hơdôm 'nu athei ling-lang dơ̆ng 'bơ̆t anăp Kră Yang.

³²Thoi noh bơngai Lêwi lu sư kư̆m hiơ̆k wei-lăng bơsŭn anih akŭm păng anih rơgoh, pơm kiơ̆ kơ kon sâu Arôn, 'nhŏng oh lu sư, wă bơ̆jang lăm hnam Kră Yang.