Read bahnar I Ho 24 Bible Online

I Ho 24 - bahnar bible

I Ho 24

¹'Nâu khŭl kon sâu Arôn: Kon drŏ-nglo Arôn noh Nađap, Abihu, Êlêasar păng Ithamar.

²Mă-lei Nađap păng Abihu lôch adrol kơ 'bă lu sư păng ưh kơ đei kon; na Êlêasar păng Ithamar pơm 'bok soi.

³Sađôk kon sâu Êlêasar păng Ahimelek kon sâu Ithamar tơgŭm Đawit klah asong khŭl 'bok soi ăn kơ lu sư kiơ̆ kơ tơdrong jang.

⁴Lăm lu kon sâu Êlêasar đei lơ bơngai pơgơ̆r lăm adrĕch adrung hloh kơ lăm kon sâu Ithamar; lei na lu sư asong khŭl thoi âu: Gah kon sâu Êlêasar đei mơjĭt-tơdrâu 'nu bơngai pơgơ̆r lăm adrĕch adrung; na gah kon sâu Ithamar đei tơhngam 'nu bơngai pơgơ̆r lăm adrĕch adrung sư.

⁵Đe asong lu sư kiơ̆ kơ đe hlang lăng lei-lăi yua kơ lu sư đei bơngai wei-lăng lăm anih rơgoh păng lu sư bơngai bơ̆jang kơ Kră Yang 'Bok Kei-Dei lăm kon sâu Êlêasar păng kon sâu Ithamar.

⁶Sêmaia bơngai chih hla bơar, kon drŏ-nglo Nethanel, sư lăm adrĕch adrung Lêwi, chih anăn lu sư tơmơ̆t lăm sơ̆p hla bơar 'bơ̆t anăp pơtao, lu yŏng pơgơ̆r noh 'bok soi Sađôk, Ahimelek, kon drŏ-nglo Abiathar, lu bơngai yŏng kơdră lăm adrĕch 'bă 'bok soi păng bơngai Lêwi; kư̆ rim adrĕch kon sâu Êlêasar hlang iŏk minh 'nu, đơ̆ng adrĕch kon sâu Ithamar kư̆m hlang iŏk minh 'nu.

⁷Hlang mă mônh 'bơm trŏ kơ Jêhôiarip; hlang mă 'bar trŏ kơ Jêđaia.

⁸Hlang mă pêng trŏ kơ Harim; hlang mă puăn trŏ kơ Sêôrim.

⁹Hlang mă pơđăm trŏ kơ Malkija; Hlang mă tơdrâu trŏ kơ Mijamin;

¹⁰hlang mă tơpơh trŏ kơ Hakkôs; hlang mă tơhngam trŏ kơ Abija;

¹¹hlang mă tơsĭn trŏ kơ Jêsua; hlang mă mơjĭt trŏ kơ Sêkania;

¹²hlang mă mơjĭt-mônh trŏ kơ Êliasip; hlang mă mơjĭt-'bar trŏ kơ Jakim.

¹³Hlang mă mơjĭt-pêng trŏ kơ Huppa; hlang mă mơjĭt-puăn trŏ kơ Jêsebeap;

¹⁴hlang mă mơjĭt-pơđăm trŏ kơ Bilga; hlang mă mơjĭt-tơdrâu trŏ kơ Immer;

¹⁵hlang mă mơjĭt-tơpơh trŏ kơ Hêsir; hlang mă mơjĭt-tơhngam trŏ kơ Happiser;

¹⁶hlang mă mơjĭt-tơsĭn trŏ kơ Pêthahia, hlang mă 'bar-jĭt trŏ kơ Jêheskel;

¹⁷hlang mă 'bar-jĭt mônh trŏ kơ Jakin; hlang mă 'bar-jĭt 'bar trŏ Gamul;

¹⁸hlang mă 'bar-jĭt pêng trŏ kơ Đêlaia; hlang mă 'bar-jĭt puăn trŏ kơ Maasia.

¹⁹'Nâu bơih khŭl bơngai bơ̆jang lăm hnam Kră Yang, kiơ̆ kơ tơdrong juăt 'bok lu sư Arôn pơkă bơtho ăn kiơ̆ thoi nơ̆r Kră Yang 'Bok Kei-Dei Isơrael pơkă ăn kơ sư.

²⁰'Nâu bơih kon sâu Lêwi mă oei đei: Đơ̆ng kon sâu Amram đei Subael; kon sâu Subăl đei Jêđeia.

²¹Gah kon sâu Rêhabia đei: Ishia pơm yŏng kơdră.

²²Lăm kon sâu Ishar đei Sêlômôt; gah kon sâu Sêlômôt đei Jahat.

²³Kon sâu Hêbrôn đei: Jêria kon kơdră; Amaria kon mă 'bar, Jahasiêl kon mă pêng, păng Jêkamêam kon mă puăn.

²⁴Kon sâu Usiel đei Mika; gah kon sâu Mika đei Samir.

²⁵'Nhŏng oh Mika noh Isia; gah kon sâu Ishia đei Sacharia.

²⁶Kon drŏ-nglo Mêrari noh: Mahli păng Musi; kon drŏ-nglo Jaasia noh Benô;

²⁷kon drŏ-nglo Mêrari đơ̆ng Jaasia: Benô, Sôham, Sakur, păng Ibri.

²⁸Kon drŏ-nglo Mahli: Êlêasar, bơngai ưh kơ đei kon drŏ-nglo.

²⁹Kon sâu Kis đei: Jêrahmêel.

³⁰Kon drŏ-nglo Musi: Mahli, Êder păng Jêrimôt. 'Noh bơih kon sâu Lêwi, kiơ̆ kơ adrĕch 'bă lu sư.

³¹Lu sư kư̆m hlang iŏk thoi lĕ kơ 'nhŏng oh lu sư, kon sâu Arôn đei hlang lăng 'bơ̆t anăp pơtao Đawit Sađôk păng Ahimelek, hăm 'bơ̆t anăp lu yŏng kơdră adrĕch 'bă lu 'bok soi păng lu bơngai Lêwi: Lu yŏng kơdră adrĕch 'bă kư̆m athei hlang lăng lei-lăi thoi lu oh sư kơdih.