Read bahnar I Ho 27 Bible Online

I Ho 27 - bahnar bible

I Ho 27

¹'Nâu chih anăn lu bơngai Isơrael: Lu yŏng kơdră lăm adrĕch 'bă sư lu yŏng pơgơ̆r minh-rơbâu 'nu păng pơgơ̆r minh-hrĕng 'nu păng lu bơngai yŏng bơ̆jang ăn kơ pơtao, wei-lăng đĭ-đăng khŭl linh oei bơ̆jang dah khŭl lu linh oei pơdơh rim khei lăm minh sơnăm đei 'bar-jĭt puăn-rơbâu 'nu bơngai lăm minh khŭl.

²Yŏng pơgơ̆r khŭl linh mă mônh, lăm khei mônh, noh Jahôbêam, kon drŏ-nglo Sapđiêl. Lăm khŭl sư đei 'bar-jĭt puăn-rơbâu 'nu bơngai.

³Sư adrĕch Pêres, pơm yŏng linh lăm khei mônh.

⁴Yŏng pơgơ̆r khŭl linh khei 'bar noh Đôđai, bơngai Ahôhi; Miklôt pơm yŏng pơgơ̆r lăm khŭl sư; đei 'bar-jĭt puăn-rơbâu 'nu bơngai.

⁵Yŏng pơgơ̆r khŭl linh mă pêng, lăm khei pêng, noh Bênaia, kon drŏ-nglo 'bok soi Jêhôiada; lăm khŭl sư đei 'bar-jĭt rơbâu 'nu bơngai.

⁶Bênaia 'nâu bơngai nuih pran kơtang pêng-jĭt 'nu bơngai nuih kơtang noh sư pơgơ̆r. Ammisabat kon drŏ-nglo sư kư̆m oei lăm khŭl sư.

⁷Yŏng pơgơ̆r khŭl linh mă puăn, lăm khei puăn, noh Asahel, oh Jôap. Sêbapđia, kon drŏ-nglo sư, pơm yŏng pơtrơp sư lăm khŭl sư đei 'bar-jĭt puăn-rơbâu 'nu bơngai.

⁸Yŏng pơgơ̆r khŭl linh mă pơđăm lăm khei pơđăm, noh Samhut, bơngai Israhit, lăm khŭl sư đei 'bar-jĭt puăn-rơbâu 'nu bơngai.

⁹Yŏng pơgơ̆r khŭl linh mă tơdrâu lăm khei tơdrâu, noh Ira, kon drŏ-nglo Ikes, oei đơ̆ng pơlei Têkôit; lăm khŭl sư đei 'bar-jĭt puăn-rơbâu 'nu bơngai.

¹⁰Yŏng pơgơ̆r khŭl linh mă tơpơh lăm khei tơpơh, noh Hêles, bơngai adrĕch adrung Êphraim oei tơ pơlei Pelôn; lăm khŭl sư đei 'bar-jĭt puăn-rơbâu 'nu bơngai.

¹¹Yŏng pơgơ̆r khŭl linh mă tơhngam lăm khei tơhngam, noh Sibêkai, oei tơ pơlei Husa, gah adrĕch adrung Sêra, lăm khŭl sư đei 'bar-jĭt puăn-rơbâu 'nu bơngai.

¹²Yŏng pơgơ̆r khŭl linh mă tơsĭn, lăm khei tơsĭn, noh Abiaser, bơngai adrĕch adrung Bênjamin, oei tơ Anathôt; lăm khŭl sư đei 'bar-jĭt puăn-rơbâu 'nu bơngai.

¹³Yŏng pơgơ̆r khŭl linh mă mơjĭt, lăm khei mơjĭt, noh Maharai, adrĕch adrung Sêra, oei tơ pơlei Netôpha; lăm khŭl sư đei 'bar-jĭt puăn-rơbâu 'nu bơngai.

¹⁴Yŏng pơgơ̆r khŭl linh mă mơjĭt-mônh lăm khei mơjĭt-mônh, noh Bênaia, bơngai adrĕch adrung Êphraim, oei tơ pơlei Pirathôn; lăm khŭl sư đei 'bar-jĭt puăn-rơbâu 'nu bơngai.

¹⁵Yŏng pơgơ̆r khŭl linh mă mơjĭt-'bar, lăm khei mơjĭt-'bar, noh Helđai, adrĕch adrung Ôtniêl, oei tơ pơlei Nêtôpha; lăm khŭl sư đei 'bar-jĭt puăn 'nu bơngai.

¹⁶'Nâu lu bơngai wei-lăng lu adrĕch adrung Isơrael: Êliêser kon drŏ-nglo Sikri, wei-lăng adrĕch Rubên; bơngai wei-lăng adrĕch Simêôn noh Sêphatia, kon drŏ-nglo Maaka;

¹⁷Hasabia kon drŏ-nglo Kêmuel bơngai wei-lăng adrĕch adrung Lêwi: Sađôk sư wei-lăng kon sâu Arôn;

¹⁸Êlihu, 'nhŏng Đawit bơngai wei-lăng adrĕch Juđa; Ômri kon drŏ-nglo Mikael, wei-lăng adrĕch Isakar

¹⁹Ismaia kon drŏ-nglo Ôbadia; bơngai wei-lăng adrĕch Sabulun. Jêremôt kon drŏ-nglo Asriel, bơngai wei-lăng adrĕch Neptali.

²⁰Hôsêa, kon drŏ-nglo Asasia; bơngai wei-lăng adrĕch adrung Êphraim, Jôel kon drŏ-nglo Pêđaia, bơngai wei-lăng minh puăt adrĕch Manase.

²¹Iđô, kon drŏ-nglo Sachari bơngai wei-lăng minh puăt adrĕch adrung Manase tơ dêh Gileat. Jaasiel kon drŏ-nglo Apner bơngai wei-lăng adrĕch Bênjamin.

²²Asarel, kon drŏ-nglo Jêrôham bơngai wei-lăng adrĕch Đan. 'Noh lu bơngai pơgơ̆r wei-lăng lu adrĕch adrung Isơrael.

²³Đawit ưh kơ đei iŏk bơngai Isơrael đơ̆ng 'bar-jĭt sơnăm tơ ala, yua kơ Kră Yang đei pơkă Sư gô ăn kơ kon pơlei Isơrael lơlap lơlang thoi sơnglŏng kơpal plĕnh.

²⁴Jôap kon drŏ-nglo Sêruia pơtơm jô̆ kon pơlei, mă-lei ưh kơ keh đang. Yua kơ tơdrong noh, na Kră Yang 'Bok Kei-Dei hil mĭl truh kơ Isơrael păng lu kon pơlei mă ưh tam jô̆ 'noh ưh kơ đei chih tơmơ̆t lăm Sơ̆p hla bơar tơdrong hơ'mon pơtao Đawit.

²⁵Asmawet, kon drŏ-nglo Ađiêl, wei-lăng lu hnam tah tơmam pơtao; Jônathan kon drŏ-nglo Usia, wei-lăng lu hnam tah tơmam pơlei tih, lăm rim pơlei iĕ păng lăm rim kơđông linh 'nguaih kơ pơlei Jêrusalem;

²⁶Êsri, kon drŏ-nglo Kêlup, wei-lăng lu bơngai jang mir na;

²⁷Simei, bơngai Rama wei-lăng lu pơgar hơmu; Sapđi bơngai Sipha, wei-lăng hnam hmĕt sik hơmu đơ̆ng pơgar hơmu;

²⁸Baal Hanan bơngai Gêđer, wei-lăng lu 'long ôliwơ păng 'long hơra lăm tơring Sephela gah bơmơ̆t; Jôas sư wei-lăng lu hnam tah đak rơmă ôliwơ;

²⁹Sitrai, bơngai Sarôn, wei-lăng lu khŭl rơmo lăm tơmăn glă Sarôn. Saphat kon drŏ-nglo Attai wei-lăng khŭl rơmo lăm thŭng dơnă;

³⁰Ôbil, bơngai Ismael, wei-lăng khŭl aseh lăk-đa; Jêđeia, bơngai Mêranôt, wei-lăng Aseh iĕ

³¹Jasis, bơngai Hagrit, wei-lăng khŭl triu. Đĭ-đăng lu bơngai 'nâu lu bơngai pơm yŏng wei-lăng lu mŭk tơmam pơtao Đawit.

³²Jônathan, ma kơ Đawit, bơngai đei đon gơh hơgei hlôh wao chih hla bơar tơgŭm chă đon pơđâu; Jêhiêl kon drŏ-nglo Hakmôni pơm bơngai wei rong lu kon drŏ-nglo pơtao.

³³Ahithôphel pơm bơngai chă đon pơđâu hăm pơtao; Husai, bơngai Arkit, buăl juăt pơtao.

³⁴Ahithôphel, Jêhôiada, kon drŏ-nglo Bênaia păng Abiathar pơtrơp đơ̆ng Ahithôphel. Jôap pơm yŏng tih hloh pơgơ̆r linh pơtao.