Read bahnar I Ho 28 Bible Online

I Ho 28 - bahnar bible

I Ho 28

¹Đawit krao akŭm đĭ-đăng lu bơngai pơgơ̆r Isơrael, brŏk tơ pơlei Jêrusalem. Lu bơngai yŏng kơdră lăm adrĕch adrung, lu bơngai pơgơ̆r lăm khŭl mă bơ̆jang kơ pơtao, lu yŏng wei-lăng minh-rơbâu păng minh-hrĕng linh, lu bơngai wei-lăng mŭk tơmam lu sem dơrong pơtao hăm lu kon drŏ-nglo sư, hơdai hăm lu bơngai bơ̆jang lăm hnam pơtao păng đĭ-đăng lu bơngai gơh hơgei nuih pran kơtang.

²Pơtao Đawit iung pơma khan: “Ơ lu 'nhŏng oh păng kon pơlei inh, mơ̆ng bĕ inh! Inh đei đon tơchĕng pơm minh pôm hnam Hom Pơgơ̆p Kră Yang, anih Kră Yang 'Bok Kei-Dei sư dan jơ̆ng, inh chă đon hơmet lê̆ tơmam tôm boih wă pơm.

³Mă-lei Kră Yang 'Bok Kei-Dei pơma hăm inh khan: ‘Ih ưh kơ pơm hnam ăn kơ anăn inh ôh, yua kơ ih minh 'nu bơngai tơblah pơlôch tuh pham lơ boih.’

⁴Kră Yang 'Bok Kei-Dei Isơrael đei rơih boih inh đơ̆ng lăm hnam dơnŏ 'bă inh, wă pơm pơtao Isơrael ling-lang. Tơpă sư đei rơih boih adrĕch Juđa pơgơ̆r wei-lăng; đơ̆ng lăm adrĕch Juđa sư rơih iŏk hnam dơnŏ 'bă inh; lăm lu kon drŏ-nglo 'bă inh, Kră Yang lăp đon rơih iŏk inh, pôk inh pơm pơtao kơ đĭ-đăng lu bơngai Isơrael.

⁵Lăm lu kon drŏ-nglo inh, tơpă Kră Yang ăn kơ inh đei lơ kon drŏ-nglo Sư rơih iŏk Sôlômôn, kon drŏ-nglo inh, pơm pơtao lăm dêh char pơtao Kră Yang pơgơ̆r wei-lăng Isơrael.

⁶Sư khan kơ Inh: Sôlômôn kon drŏ-nglo ih, gô pơm hnam păng cham Inh yua kơ Inh rơih iŏk boih sư pơm kon drŏ-nglo Inh, păng Inh gô pơm 'bă sư.

⁷Inh gô ăn kơ dêh char pơtao sư kơjăp ling-lang tơdah sư đei jơhngơ̆m đon kơjăp wei răk dôm nơ̆r Inh păng tơdrong juăt Inh nhen thoi dang ei.

⁸Na dang ei, 'bơ̆t anăp đĭ-đăng bơngai Isơrael kon pơlei Kră Yang păng đei Kră Yang 'Bok Kei-Dei lu bơ̆n mơ̆ng, lu iĕm wei răk bĕ dôm khôi juăt nơ̆r tơtă Kră Yang 'Bok Kei-Dei lu iĕm lei na lu iĕm gơh đei iŏk dêh char 'lơ̆ng rŏ 'nâu păng 'măn ăn kơ kon sâu đơ̆ng rŏng bơ̆jang sa ling-lang.

⁹Bĕ ih, ơ! Sôlômôn, kon drŏ-nglo inh, athei băt kơ Sư Kră Yang 'Bok Kei-Dei inh 'bă ih, athei đĭ jơhngơ̆m đĭ bơhngol bơ̆jang kơ Kră Yang yua kơ Kră Yang băt hlôh 'bôh nhen lăm jơhngơ̆m klơm klak, păng băt dôm đon tơchĕng. Tơdah ih chă Kră Yang, kon gô tơ'bơ̆p; mă-lei tơdah ih achăng lê̆ Kră Yang, sĭt Kră Yang gô achăng lê̆ ih ling-lang.

¹⁰Dang ei, lăng bĕ yua kơ Kră Yang rơih iŏk ih boih wă pơm tơiung minh pôm hnam 'măn anih 'lơ̆ng rơgoh. Nuih pran kơtang bĕ na pơm.”

¹¹Đawit pơjao ăn kơ Sôlômôn kon drŏ-nglo sư, hla bơar rup chhơ̆ tơ'bôh anih trong lăm hnam Kră Yang 'Bok Kei-Dei, hnam tah tơmam, anih tơ kơpal, anih lăm hnam Kră Yang 'Bok Kei-Dei păng anih rơgoh hloh.

¹²Pơtao kư̆m pơjao dơ̆ng đĭ-đăng rup đơ̆ng Yang Bơhngol mă đei ăn lăm kơ̆l đon sư, gah hnam Kră Yang păng gah lu anih puăn pah, gah hnam tah tơmam Kră Yang 'Bok Kei-Dei păng gah lu hnam 'măn tơmam pơyơ̆r,

¹³gah lu 'bok soi păng bơngai Lêwi kơ tơdrong jang lăm hnam Kră Yang păng gah lu tơmam yua lăm hnam Kră Yang;

¹⁴Pơtao kŏng ăn dôm yơ maih gah lu tơmam păng maih yua lăm lu tơdrong jang, kŏng ăn dôm yơ hu kơ lu tơmam wă pơm păng hu, wă yua lăm lu tơdrong jang.

¹⁵Kŏng ăn dôm yơ maih wă pơm lu jơ̆ng ŭnh kơđeng păng akâu kơđeng, kŏng ăn maih kơ rim jơ̆ng ŭnh kơđeng păng akâu sư. Kŏng ăn dôm yơ hu wă pơm jơ̆ng păng akâu ŭnh kơđeng; kŏng ăn tôm kơ wă pơm jơ̆ng păng akâu ŭnh kơđeng păng hu.

¹⁶Sư kư̆m kŏng ăn kơsô̆ maih kơ lu gơ'bang 'măn 'bĕng, kơ gơ'bang 'măn 'bĕng 'lơ̆ng rơgoh păng kŏng ăn hu kơ lu gơ'bang pơm păng hu;

¹⁷Kŏng ăn maih wă pơm chơ'mŏng chơkrơ, pơnhan, kơthao, 'bĭnh păng chhĕr păng maih păng kŏng dôm yơ maih kơ ăn rim pơnhan chhĕr maih păng kŏng ăn hu ăn kơ rim pơnhan chhĕr păng hu.

¹⁸Kŭm kŏng maih se wă pơm chơnang soi soh tơmam 'bâu phu păng kŏng ăn maih pơm tơnglơ̆p đei chêrubim hăm maih bơyar pơnăr klơ̆p kơpal Hom Pơgơ̆p Kră Yang.

¹⁹Đawit pơma khan: “Đĭ-đăng lu 'nâu, inh đei đơ̆ng ti Kră Yang tơhlâu, păng ăn kơ inh hlôh băt đĭ-đăng rim tơdrong wă pơm.”

²⁰Đawit khan kơ Sôlômôn kon drŏ-nglo sư: “Mă pran kơjăp jơhngơ̆m đon na bơ̆jang; 'nĕ kơ hli, 'nĕ kơ bơ̆l hăl, yua kơ Kră Yang 'Bok Kei-Dei 'bă oei hơdai hăm kon; Sư ưh kơ đei layơ achăng hŭt kon, dĭng truh tơ tơiung hnam Kră Yang keh đang.

²¹Đei lu 'bok soi păng bơngai Lêwi, wă jang pơm hnam akŭm 'Bok Kei-Dei; đei lu sư gơh hơgei dôm tơdrong jang tơgŭm noh; lu 'bok pơgơ̆r păng đĭ-đăng kon pơlei, lu sư gô chu yom pơm kiơ̆ nơ̆r kon pơkă ngăl.”