Read bahnar I Ho 29 Bible Online

I Ho 29 - bahnar bible

I Ho 29

¹Đawit khan kơ đĭ-đăng tơpôl akŭm: “Sôlômôn, kon drŏ-nglo inh mă Kră Yang 'Bok Kei-Dei đei rơih iŏk, oei hơ'lơ̆p, sư tam mă biơh băt tơdrong jang âu tih dêh, yua kơ pơm hnam ưh kơ trŏ pơm kơ bơngai ôh, mă-lei hnam 'noh pơm ăn kơ Kră Yang 'Bok Kei-Dei.

²Inh đĭ jơhngơ̆m klơm klak hơmet tơmam wă pơm hnam Kră Yang 'Bok Kei-Dei bơ̆n, maih kơ tơmam kiơ pơm hăm maih, hu kơ tơmam kiơ pơm hăm hu, kong kơ tơmam kiơ pơm hăm kong, bơsei kơ tơmam kiơ pơm hăm bơsei 'long kơ tơmam păng 'long tơmo rang păng lu tơmo gĭt hăm tơmo kok jơk tôm tĕch đak gôh găm.

³Yua kơ đei jơhngơ̆m 'mêm kơ hnam Kră Yang 'Bok Kei-Dei bơ̆n, na 'nguaih kơ dôm tơmam inh ăn wă pơm hnam 'lơ̆ng rơgoh, inh kư̆m pơyơ̆r ăn kơ pơm hnam Kră Yang 'Bok Kei-Dei inh lu tơmam maih hu đơ̆ng hnam tah tơmam inh kơdih.

⁴Inh đei pơyơ̆r boih minh-hrĕng tân maih Ôphir păng 'bar-hrĕng puăn-jĭt tân hu rơgoh, wă lom klơ̆p kơ tơnăr hnam akŭm wă pơm.

⁵Maih wă yua kơ lu tơmam pơm hăm maih, hu wă yua kơ lu tơmam pơm hăm hu păng wă yua lơ tơdrong jang bơngai gơh hơgei wă pơm. Dang ei, bu wă 'maih pơyơ̆r kơdih ăn kơ Kră Yang?”

⁶Thoi noh lu bơngai pơgơ̆r lăm adrĕch adrung, lu bơngai pơgơ̆r lăm adrĕch adrung Isơrael, lu yŏng pơgơ̆r minh-rơbâu linh păng minh-hrĕng linh, lu bơngai pơgơ̆r lăm tơdrong jang hnam pơtao lăp đon kơ pơyơ̆r.

⁷Lu sư pơyơ̆r gah tơdrong jang pơm hnam Kră Yang 'Bok Kei-Dei, minh-hrĕng tơpơh-jĭt tân maih mơjĭt-rơbâu jên maih, darik, pêng-hrĕng puăn-jĭt pơđăm tân hu, tơdrâu-hrĕng mơjĭt tân kong, păng pêng-rơbâu puăn-hrĕng pơđăm-jĭt tân bơsei.

⁸Bơngai bu đei tơmo gĭt, lei pơjao ăn kơ Jêhiêl adrĕch Gersôn, mă pơgơ̆r lăm hnam tah tơmam Kră Yang.

⁹Kon pơlei chơt hiôk gah tơdrong lu sư kơdih akâu đei pơyơ̆r, lu sư đĭ jơhngơ̆m pơyơ̆r kơ Kră Yang; păng pơtao Đawit kư̆m chơt hiôk dêh.

¹⁰'Bơ̆t anăp đĭ-đăng tơpôl, Đawit bơnê kơ Kră Yang khan: Hơri bơnê kơ Ih ơ Kră Yang 'Bok Kei-Dei Isơrael 'bok lu nhôn, đơ̆ng dang ei truh tơ ning-mônh ưh kơ đei layơ tôch!

¹¹Ơ Kră Yang Ih bơih, tih hloh mơsêh mơyang pran kơtang trŏ kơ hơri ư-ang, krưp rang mơnhal. Ơ Kră Yang đĭ-đăng kơpal plĕnh ala teh gah Ih ngăl. Dêh char pơtao gah Ih păng Ih boih yŏng kơ đĭ-đăng.

¹²Tơdrong mơdrŏng mơng, păng tơdrong pơyom lĕch đơ̆ng Ih ngăl, Ih boih wei-lăng đĭ-đăng; tơdrong mơsêh mơyang pran kơtang lăm ti Ih; Ih pơm ăn đei tơdrong pơyom păng ăn jơhngơ̆m pran kơ rim 'nu bơngai.

¹³Dang ei, ơ Kră Yang 'Bok Kei-Dei lu nhôn, lu nhôn bơnê kơ Ih păng hơri ư-ang anăn Ih.

¹⁴Mă-lei inh bu, păng kon pơlei inh kiơ, na mă gơh đei jơhngơ̆m pơyơ̆r thoi noh? Đĭ-đăng dôm tơmam tă kơ đơ̆ng Ih ăn ngăl păng dôm tơmam mă lu nhôn pơyơ̆r ăn kơ Ih noh tă kơ lĕch đơ̆ng ti Ih ngăl.

¹⁵Yua kơ 'bơ̆t anăp Ih lu nhôn păng lu yă 'bok nhôn jơ̆ bơngai tơmoi, chăl arih lu nhôn tơ kơpal teh nhen thoi ngôi ưh kơ đei anih wă hơmĕng.

¹⁶Ơ Kră Yang 'Bok Kei-Dei lu nhôn, dôm lu tơmam mă lu nhôn đei pơyơ̆r wă pơm hnam kơ Anăn 'Lơ̆ng Rơgoh Ih, tă kơ lĕch đơ̆ng ti Ih păng đĭ-đăng tă kơ tơmam ih ngăl.

¹⁷Ơ Kră Yang 'Bok Kei-Dei inh, inh băt kơ Ih 'bôh nhen lăm jơhngơ̆m klơm klak kon bơngai păng Ih hiôk gah tơdrong 'lơ̆ng tơpăt. Gah inh kư̆m kiơ̆ tơdrong 'lơ̆ng tơpăt lăm jơhngơ̆m hiôk pơyơ̆r ăn kơ ih lu tơmam 'nâu. Dang ei inh hiôk dêh inh 'bôh kon pơlei Ih oei tơ âu kư̆m đei pơyơ̆r ăn kơ Ih hăm jơhngơ̆m hiôk.

¹⁸Ơ Kră Yang 'Bok Kei-Dei Abraham, Isăk păng Isơrael, yă 'bok lu nhôn apinh Ih ăn kơ kon pơlei ih wei răk ling-lang lăm Jơhngơ̆m đon 'lơ̆ng păng pơm ăn lăm Jơhngơ̆m lu sư chu kiơ̆ Ih.

¹⁹Apinh Ih ăn kơ Sôlômôn, kon drŏ-nglo inh, đĭ jơhngơ̆m wei răk lu nơ̆r tơtă khôi juăt păng nơ̆r Ih pơkă pơkăm kư̆m pơm tôm tơdrong jang wă, man tơiung hnam mă inh đei chă hơmet lê̆ tơmam bơih.”

²⁰Đawit khan kơ đĭ-đăng tơpôl: “Iĕm athei hơri bơnê kơkuh kơ Kră Yang 'Bok Kei-Dei lu iĕm.” Na đĭ-đăng khŭl tơpôl hơri bơnê hloi kơ Kră Yang 'Bok Kei-Dei yă 'bok lu sư, lu sư kŭp kơ̆l drap kơkuh kơ Kră Yang, păng kơkuh kơ pơtao.

²¹Năr đơ̆ng rŏng, lu sư pơyơ̆r tơmam soi 'buh ăn kơ Kră Yang. Minh-rơbâu rơmo tơno, minh-rơbâu triu tơno păng minh-rơbâu tŏ triu kon, hơdai hăm tơmam soi et păng lơ tơmam soi pơyơ̆r nai kơ đĭ-đăng kon pơlei Isơrael;

²²lăm năr noh, lu sư sa et hiôk chơt 'bơ̆t anăp Kră Yang. Đơ̆ng rŏng noh wơ̆t mă 'bar lu sư pôk pơyom Sôlômôn kon drŏ-nglo Đawit pơm pơtao, lu sư tuh đak pơgang 'bâu phu kơ sư 'bơ̆t anăp Kră Yang, păng pôk ăn Sađôk pơm 'bok soi.

²³Sôlômôn iung pơm pơtao Kră Yang pơtrơp kơ Đawit, 'bă Sư mơdrŏng tih; đĭ-đăng Isơrael chu kiơ̆ nơ̆r sư.

²⁴Đĭ-đăng lu yŏng pơgơ̆r, păng lu bơngai nuih pran kơtang păng đĭ kơ lu kon drŏ-nglo pơtao Đawit pơkă wă chu yom pơm kiơ̆ pơtao Sôlômôn.

²⁵Kră Yang pơm ăn kơ Sôlômôn đei pơyom 'bơ̆t anăp đĭ-đăng kon pơlei Isơrael; Sư ăn kơ dêh char Sôlômôn pơtao 'lơ̆ng rŏ hơbŏ krưp, ưh tam đei minh 'nu pơtao Isơrael ayơ adrol kơ sư mă đei thoi noh.

²⁶Pơtao Đawit kon drŏ-nglo Jese, pơm pơtao pơgơ̆r đĭ-đăng lu bơngai Isơrael.

²⁷Sư pơgơ̆r lu bơngai Isơrael lăm puăn-jĭt sơnăm, sư pơgơ̆r tơpơh sơnăm tơ Hêbrôn păng sư pơgơ̆r pêng-jĭt pêng sơnăm tơ Jêrusalem.

²⁸Sư lôch, sơnăm sư đĭ kơjung, sư arih hrăp jơnap mơdrŏng tih păng đe pơyom. Sôlômôn, kon drŏ-nglo sư, pơtrơp sư pơm pơtao.

²⁹Dôm tơdrong hơ'mon kơ pơtao Đawit đơ̆ng blŭng-a truh tơ tôch, đei chih răk tơ lăm Sơ̆p hla bơar Samuel, 'bok khan lê̆ adrol lăm Sơ̆p hla bơar Nathan, 'bok khan lê̆ adrol păng lăm Sơ̆p hla bơar Gat, 'bok khan lê̆ adrol.

³⁰Kŭm đei chih tơdrong sư pơgơ̆r tơdrong nuih pran kơtang sư, dôm tơdrong truh kơ sư, lăm kon pơlei Isơrael păng dôm lu dêh char nai. 11-Nov-2014@18:29, Backup Description=