Read bahnar II Ho 10 Bible Online

II Ho 10 - bahnar bible

II Ho 10

¹Rêhôbôam năm tơ pơlei Sichem, yua kơ đĭ-đăng lu bơngai Isơrael truh boih tơ Pơlei Sichem wă pôk sư pơm pơtao.

²Lăp Jêrôbôam, kon drŏ-nglo Nêbat kơtơ̆ng tơdrong noh, sư oei oei lăm dêh char Êyiptơ yua kơ sư kơdâu ôn kơ Sôlômôn, na sư wih brŏk đơ̆ng char Êyiptơ.

³Đe wơh bơngai năm krao sư; na Jêrôbôam păng lu bơngai Isơrael năm khan kơ Rêhôbôam.

⁴“'Bă ih tơpŭ ăn kơ lu nhôn tơdrong jang 'long ăt trăp dêh, dang ei ăn kơ lu nhôn pŭ 'long ăt phiơl 'biơ̆ bĕ, na lu nhôn gô bơ̆jang kơ ih.”

⁵Sư tơl đe noh khan: “Pă pêng năr, lu iĕm năm hơlơ̆k tơ inh dơ̆ng.” Lu kon pơlei wih brŏk.

⁶Pơtao Rêhôbôam khan pơđâu hăm lu kră bơngai mă juăt kơ jang hăm 'bă sư Sôlômôn kơplah oei arih: “Lu iĕm tơchĕng inh athei pơma păng drơ̆ng lu kon pơlei âu thoi yơ?”

⁷Lu kră bơngai wei-lăng kon pơlei khan kơ pơtao thoi âu: “Tơdah ih pơm hiôk kơ kon pơlei pơla, oei sa 'lơ̆ng hơiă hăm lu sư, đei jơhngơ̆m hiôk pơma drơ̆ng rơngơp hăm lu sư, lei lu kon pơlei pơla âu bơ̆jang awih awăn kơ ih ling-lang.”

⁸Mă-lei Rêhôbôam ưh kơ kiơ̆ ôh nơ̆r lu kră đei pơđâu, na chă đon pơđâu hăm lu bơngai kră mơlôh 'lŏ sư pơhnŏng kơchŏng sư bơhnơr, mă oei bơ̆jang kơ sư.

⁹Pơtao jet: “Lu kon pơlei âu apinh ăn kơ lu nhôn tôi 'long ăt phiơl 'biơ̆ đơ̆ng 'bă inh ăn kơ lu nhôn trăp dêh; lei na iĕm tơchĕng lăng ăn kơ inh wă pơm liơ tơl hăm lu sư?”

¹⁰Lu kră mơlôh, 'lơ̆p 'lŏ sư hơdai tơl sư: “Ih athei tơl lu kon pơlei lu bơngai mă apinh ih khan: “'Bă ih ăn kơ lu nhôn jang thoi tôi 'long ăt trăp dêh, apinh Ih ăn kơ lu nhôn tôi phiơl 'biơ̆; ih tơl lu sư. Hơnglâu dĕng inh tih hloh kơ kơiĕng 'bă inh.

¹¹Na, 'bă inh ăn kơ lu iĕm tôi 'long ăt trăp dang noh boih, na inh gô ăn kơ iĕm tôi trăp hloh kơ noh dơ̆ng; 'bă inh đei teh phak lu iĕm hăm sơnguĕt, inh gô phak lu iĕm hăm hơguăt.

¹²Pêng năr đơ̆ng rŏng, Jêrôbôam păng đĭ kon pơlei năm dơ̆ng tơ Rêhôbôam kiơ̆ thoi pơtao đei pơkă pă pêng năr athei năm hơlơ̆k tơ inh âu dơ̆ng.

¹³Pơtao Rêhôbôam tơl kon pơlei hăm nơ̆r arăng, ưh pă wă kiơ̆ boih kơ nơ̆r lu kră pơđâu,

¹⁴Kiơ̆ kơ nơ̆r lu kră mơlôh pơđâu, na pơtao khan kơ lu kon pơlei: 'Bă inh ăn kơ lu iĕm tôi 'long ăt trăp dang noh, inh gô ăn kơ lu iĕm tôi 'long ăt trăp hloh kơ noh dơ̆ng, 'bă inh teh phak lu iĕm hăm sơnguĕt, inh gô teh phak iĕm hăm hơguăt.”

¹⁵Thoi noh, pơtao ưh kơ wă mơ̆ng kiơ̆ kon pơlei, yua kơ tơdrong noh trŏ thoi Kră Yang 'Bok Kei-Dei khan wă kơ pơsĭt kơ nơ̆r Kră Yang đei khan kơ Ahija bơngai pơlei Silô khan kơ Jêrôbôam kon drŏ-nglo Nêbat.

¹⁶Wă đĭ-đăng kon pơlei Isơrael 'bôh pơtao Rêhôbôam ưh pă iŏk nơ̆r lu sư boih, lu sư tơl pơtao. “Lu nhôn hăm đei kiơ lăm Đawit? Lu nhôn hăm đei kiơ hăm kon drŏ-nglo Jese Ơ kon pơlei Isơrael wih brŏk bĕ tơ hnam lu iĕm. Ơ Đawit lăng bĕ hnam ih kơdih,” Na đĭ-đăng kon pơlei wih đĭ tơ hnam lu sư.

¹⁷Mă-lei kon pơlei Isơrael mă oei lăm lu pơlei Juđa, Rêhôbôam oei pơgơ̆r lu sư.

¹⁸Pơtao Rêhôbôam wơh Adôniram, bơngai wei-lăng pơgŏ lu bơngai jang trăp, năm tơ kon pơlei Isơrael. Kon pơlei Isơrael klơ̆m tơmo pơlôch Sư. Pơtao Rêhôbôam kơdâu iŏk gre aseh năm kơdâu ôn tơ pơlei Jêrusalem.

¹⁹Lei na adrĕch Isơrael areh blah hăm adrĕch Đawit dĭng truh tơ dang ei.