Read bahnar II Ho 11 Bible Online

II Ho 11 - bahnar bible

II Ho 11

¹Rêhôbôam wih brŏk tơ Jêrusalem, akŭm pơđĭ lu linh bơngai Juđa păng Bênjamin, đei minh-hrĕng tơhngam-jĭt rơbâu 'nu wă tơblah hăm lu bơngai Isơrael, wă kơ pơdrâu iŏk dêh char ăn kơ Rêhôbôam dơ̆ng.

²Mă-lei đei nơ̆r Kră Yang khan kơ Sêmaia, bơngai Kră Yang 'Bok Kei-Dei.

³“Khan bĕ kơ Rêhôbôam kon drŏ-nglo Sôlômôn pơtao đe Juđa păng đĭ-đăng lu bơngai Isơrael oei lăm dêh char Juđa hăm Bênjamin.

⁴Kră Yang khan thoi âu: Lu iĕm lê̆ kơ năm tơblah hăm lu 'nhŏng oh iĕm ôh, wih brŏk tơ hnam iĕm bĕ, yua kơ tơdrong 'nâu lĕch đơ̆ng Inh.” Thoi noh lu sư chu kơ nơ̆r Kră Yang khan, wih brŏk kơdih ưh kơ đei năm tơblah hăm Jêrôbôam ôh.

⁵Rêhôbôam oei lăm pơlei Jêrusalem pơdơ̆ng pơjing pơlei tih kơjăp lăm char Juđa.

⁶Sư man pơdơ̆ng pơlei Betlehem, Êtam, Têkôa,

⁷pơlei Bêt Sur, Sôkô, Ađulam,

⁸pơlei Gat Marêsa, pơlei Sip,

⁹pơlei Adôraim, Lakis, Asêka,

¹⁰Pơlei Sôra, Aijalôn păng pơlei Hêbrôn. Lu pơlei mă đei kơđông linh kơjăp lăm char Juđa păng lăm char Bênjamin.

¹¹Sư pơm kơđông rai kơjăp tơ noh, ăn kơ lu yŏng linh oei lăm noh, tah mong tơmam sa phe 'ba, đak rơmă ôliwơ păng đak sik plei hơmu;

¹²Tơ lăm rim pơlei sư đei tah đao hơlă, khêl wă pơm ăn kơ pơlei noh kơjăp tơpă, lei sư wei pơgơ̆r char Juđa hăm char Bênjamin.

¹³Lu 'bok soi hăm lu bơngai Lêwi đơ̆ng jơ̆p-jang lăm char Isơrael, wih brŏk kiơ̆ Rêhôbôam,

¹⁴Lu bơngai Lêwi mă achăng lê̆ pơlei hăm teh jang sa lu sư năm oei tơ char Juđa păng pơlei tih Jêrusalem, yua kơ Jêrôbôam hăm lu kon drŏ-nglo sư pơpuh lu sư, ưh pă ăn kơ lu sư pơm 'bok soi jang kơ Kră Yang dơ̆ng.

¹⁵Jêrôbôam chă pôk pơjing lu 'bok soi sư kơdih tơ lu anih kơjung, kơ lu rup yang sư man noh bơbe tơno păng kon rơmo

¹⁶Lăm adrĕch bơngai Isơrael, bu đei jơhngơ̆m chă Kră Yang 'Bok Kei-Dei Isơrael, lu sư kiơ̆ lu bơngai Lêwi, năm tơ Jêrusalem wă pơyơ̆r tơmam soi ăn kơ Kră Yang 'Bok Kei-Dei lu 'bok sư.

¹⁷Lăm pêng sơnăm sư bơwei char Juđa kơjăp tơgŭm Rêhôbôam, kon drŏ-nglo Sôlômôn, jing pran kơtang; tơpă lăm pêng sơnăm noh lu sư kiơ̆ trong Đawit păng Sôlômôn.

¹⁸Rêhôbôam oei kơ Mahalat kon adruh Jêrimôt, sâu Đawit; sư kư̆m oei dơ̆ng kơ Abihai, kon adruh Êliap, sâu Jese.

¹⁹Akăn sư tơpŭ ăn kơ sư lu kon drŏ-nglo, Jêrus, Sêmaria păng Saham.

²⁰Đơ̆ng rŏng, sư kư̆m rôp oei dơ̆ng Maaka kon adruh Apsalôm, akăn sư tơpŭ ăn kơ sư lu kon drŏ-nglo noh Abija, Attai, Sisa păng Sêlômit.

²¹Rêhôbôam 'mêm kơ Maaka kon adruh Apsalôm hloh kơ lu akăn sư nai; sư đei mơjĭt-tơhngam 'nu akăn tơm păng tơdrâu-jĭt 'nu akăn kơnhŏng, Sư đei 'bar-jĭt tơhngam 'nu kon drŏ-nglo păng tơdrâu-jĭt 'nu kon drŏ-kăn.

²²Rêhôbôam pôk ăn Abija kon drŏ-nglo Maaka pơm yŏng kơdră kơ lu 'nhŏng oh sư, rơih wă ăn Abija pơtrơp pơm pơtao.

²³Rêhôbôam sư hơgei klah song ăn kơ lu kon drŏ-nglo sư oei tơ jơ̆p-jang kơ char Juđa păng char Bênjamin, tơ lăm lu pơlei kơjăp, asong ăn kơ lu sư tơmam sa rơkah rơkai; chă ăn kơ lu sư akăn lơ.