Read bahnar II Ho 13 Bible Online

II Ho 13 - bahnar bible

II Ho 13

¹Lăm sơnăm mă mơjĭt-tơhngam chăl pơtao Jêrôbôam, Abija pơm pơtao char Juđa.

²Sư pơgơ̆r pêng sơnăm lăm pơlei tih Jêrusalem. Mĕ sư anăn Maaka kon drŏ-kăn Uriel đơ̆ng pơlei Gibêah. Đei tơdrong tơblah Abija hăm Jêrôbôam.

³Abija năm tơblah chĕp ba linh, puăn-hrĕng rơbâu linh nuih pran kơtang; gah Jêrôbôam năm tơblah hăm sư chĕp ba tơhngam-hrĕng rơbâu linh, 'nâu lu linh nuih pran kơtang

⁴Abija sư dơ̆ng tơ kơpal Kông Sêmaraim lăm tơring kông groi Êphraim, na khan: “Ơ Jêrôbôam păng đĭ-đăng bơngai Isơrael mơ̆ng bĕ!

⁵Đơ̆ng tơdrong pơgơ̆p 'boh, Kră Yang 'Bok Kei-Dei Isơrael đei jao boih dêh char Isơrael kơ Đawit păng lu kon drŏ-nglo sư ling-lang hlŏng hloi boih, lu iĕm ưh kơ băt hă?

⁶Mă-lei Jêrôbôam kon drŏ-nglo Nêbat bơngai jang kơ Sôlômôn, kon drŏ-nglo Đawit, iung tơblah hăm yŏng tơ'ngla sư kơdih;

⁷Lu bơngai kơnê̆ kư̆ kă năm kiơ̆ ih; tơblah hăm Rêhôbôam, kon drŏ-nglo Sôlômôn; Rêhôbôam; sư oei mơlôh, ưh kơ kĕ tơblah hăm ih.

⁸Na dang ei lu iĕm tơchĕng khan kĕ mơ̆n hă tơblah hăm char mă Kră Yang đei jao ăn boih kơ lu kon Đawit? Mă khan lu iĕm đei linh lơ chĕp ba rup man rơmo hăm maih mă Jêrôbôam đei man pơm yang iĕm.

⁹Hăm trŏ lu iĕm pơpuh boih lu 'bok soi Kră Yang, kon sâu Arôn păng lu bơngai Lêwi? Lu iĕm pôk pơjing lu 'bok soi kơdih iĕm kiơ̆ thoi lu dêh char nai pơm; kư̆ kơ bơngai bu rôp minh pôm rơmo dăm păng tơpơh tŏ bơbe tơno pơyơ̆r wă apinh pơm 'bok soi na gơh pơm 'bok soi hloi soi kơ yang kư̆ kă.

¹⁰Gah lu nhôn, Kră Yang 'Bok Kei-Dei lu bơ̆n, lu nhôn ưh kơ đei achăng lê̆ Sư; lu 'bok soi bơ̆jang kơ Kră Yang tă kơ kon sâu Arôn păng lu bơngai Lêwi bơ̆jang tơdrong jang lu sư.

¹¹Rim pơgê hrôih păng kơsơ̆ lu sư soh pơyơ̆r tơmam soi 'buh păng pơgang 'bâu phu ăn kơ Kră Yang; lu sư kư̆m dan 'bĕng 'lơ̆ng rơgoh kơpal gơ'bang rơgoh păng kư̆m tơ̆k ŭnh kơđeng tơ rim jơ̆ng kơđeng maih wă kơ sư khơ̆ng kiơ̆ kơmăng. Lu nhôn pơm kiơ̆ nơ̆r Kră Yang 'Bok Kei-Dei lu bơ̆n bơtho khan, gah lu iĕm achăng lê̆ Sư boih.

¹²Kră Yang 'Bok Kei-Dei oei hơdai nhôn, pơgơ̆r lu nhôn, lu 'bok soi Kră Yang chĕp keng hlôm re wă lĕch tơblah hăm lu iĕm. Ơ lu kon sâu Isơrael! 'Nĕ kơ tơblah hăm Kră Yang 'Bok Kei-Dei lu 'bok yă iĕm, ưh kơ kĕ jei iĕm ôh”

¹³Jêrôbôam ăn boih linh sư răp wă blah tơ gah rŏng; thoi noh lu sư dơ̆ng gah anăp lu linh Juđa, mơ'nah răp blah tơ gah rŏng lu linh Juđa.

¹⁴Wă lu linh Juđa 'bôh đei lu linh ayăt tơ gah anăp păng tơ gah rŏng, na lu sư ôr krao Kră Yang. Lu 'bok soi hlôm keng.

¹⁵Lu bơngai Juđa jreo năm tơ anăp tơblah. Kơplah lu kon pơlei Juđa jreo năm tơblah, Kră Yang 'Bok Kei-Dei blah pơrăm Jêrôbôam păng đĭ-đăng linh Isơrael 'bơ̆t anăp pơtao Abija păng bơngai Juđa.

¹⁶Kon pơlei Isơrael kơdâu kơ kon pơlei Juđa păng Kră Yang 'Bok Kei-Dei jao lu kon pơlei Isơrael lăm ti lu kon pơlei Juđa.

¹⁷Abija păng lu linh sư blah pơrăm đĭ lu bơngai Isơrael tih dêh đei pơđăm-hrĕng rơbâu linh nuih kơtang Isơrael lôch,

¹⁸Thoi noh, kơplah noh, lu linh Isơrael thuơ răm, jei lu linh păng kon pơlei Juđa, yua kơ lu sư gơnang kơ Kră Yang 'Bok Kei-Dei yă 'bok lu sư.

¹⁹Abija druh blah Jêrôbôam păng blah iŏk lu pơlei tih Bethel păng lu pơlei iĕ sư pơlei Jesana păng lu pơlei iĕ sư, pơlei tih Êphrôn păng lu pơlei iĕ sư.

²⁰Kơplah chăl Abija oei arih, Jêrôbôam ưh pă đei pran dơ̆ng boih; Kră Yang pơrăm sư, na sư lôch.

²¹Gah Abija rai pran kơtang ling-lang, sư oei kơ mơjĭt-puăn 'nu akăn, tơpŭ kơ sư đei 'bar-jĭt 'bar 'nu kon drŏ-nglo păng mơjĭt-tơdrâu 'nu kon drŏ-kăn.

²²Lu tơdrong jang nai mă Abija jang, lu tơdrong sư pơm păng nơ̆r sư pơma, đei chih răk lăm sơ̆p hla bơar hơ'mon Iđô bơngai khan lê̆ adrol.