Read bahnar II Ho 14 Bible Online

II Ho 14 - bahnar bible

II Ho 14

¹Abija lôch pơdơh oei hơdai hăm lu 'bok yă sư đe 'bŭ sư lăm pơlei Đawit, Asa kon drŏ-nglo sư iung pơgơ̆r pơtrơp sư. Lăm chăl Asa pơgơ̆r char sư đei hiôk-hian mơjĭt sơnăm.

²Asa oei arih 'lơ̆ng păng pơm tơpăt 'bơ̆t anăp Kră Yang 'Bok Kei-Dei sư;

³Sư yuih hŭt lê̆ đĭ chơnang soi kơkuh kơ lu yang bơngai tơmoi păng tơ lăm anih kơjung, sư teh pơchah đĭ lu jrăng gơ̆ng soi păng kăl tơlơ̆ lê̆ rup yang drŏ-kăn Asêra.

⁴Sư athei bơngai Juđa chă bĕ Kră Yang 'Bok Kei-Dei 'bok yă lu sư, kư̆m athei pơm kiơ̆ khôi juăt păng nơ̆r Kră Yang tơtă.

⁵Sư kư̆m hŭt lê̆ đĭ lu jrăng gơ̆ng soi kơkuh kơ yang tơ anih kơjung păng chơnang soi đơ̆ng rim pơlei lăm char Juđa; dêh char sư pơgơ̆r đei hiôk-hian.

⁶Sư đei man pơjing lu pơlei kơjăp lăm char Juđa, yua kơ lăm dôm sơnăm sư pơgơ̆r dêh char sư đei hiôk-hian ưh kơ đei tơblah, Kră Yang ăn hiôk-hian kơ sư.

⁷Sư khan kơ kon pơlei Juđa: “Bĕ bơ̆n pơdơ̆ng tơiung pơlei tih kơjăp, man dur tăp dăr, pơm hnam thôt gak, pơm 'măng jang, 'long chơkăl; char 'nâu oei dêh char bơ̆n, yua kơ lu bơ̆n chă Kră Yang 'Bok Kei-Dei lu bơ̆n; lu bơ̆n chă boih Sư, na Sư ăn kơ bơ̆n đei hiôk-hian tăp dăr.” Lu sư tơiung pơdơ̆ng pơlei keh păng arih sa jơnap.

⁸Asa đei pêng-hrĕng rơbâu linh đơ̆ng bơngai Juđa đei khêl tih păng tơju; đei 'bar-rơbâu 'nu linh đơ̆ng bơngai Bênjamin chĕp khêl iĕ păng hră; đĭ-đăng lu sư tă kơ linh nuih kơtang ngăl.

⁹Sêra, bơngai Êthiôpi năm blah bơngai Juđa chông ba minh-rơbâu rơbâu linh păng pêng-hrĕng tŏ gre aseh, lu sư năm truh tơ pơlei Marêsa.

¹⁰Asa năm sơng tơ'bơ̆p sư, săp linh năm tơblah tơ lăm thŭng Sêphatha jê̆ pơlei Marêsa.

¹¹Asa krao apinh Kră Yang 'Bok Kei-Dei sư khan: “Ơ Kră Yang, ưh kơ đei bu thoi Ih tơgŭm lu bơngai tơrăn kĕ jei đơ̆ng bơngai pran; Ơ Kră Yang 'Bok Kei-Dei nhôn, apinh Ih dŏng tơgŭm lu nhôn, lu nhôn gơnang kơ Ih; nhôn yua hăm anăn Ih na năm blah lu bơngai linh lơ âu. Ơ Kră Yang! Ih boih Kră Yang 'Bok Kei-Dei lu nhôn; 'nĕ ăn kơ kon bơngai jei hloh kơ Ih”

¹²Kră Yang blah pơrăm kon pơlei Êthiôpi 'bơ̆t anăp kon pơlei Juđa păng pơtao Asa; khŭl linh Êthiôpi kơdâu đĭ.

¹³Asa păng lu linh kiơ̆ sư, druh lu linh Êthiôpi truh tơ Gêrar; linh Êthiôpi lôch lơ tơpă, ưh pă đei bu arih, lu sư thuơ 'bơ̆t anăp Kră Yang hăm lu linh Sư. Lu bơngai blah iŏk đei lơ tơmam.

¹⁴Linh Juđa kư̆m đei blah lu pơlei tăp dăr kơ pơlei tih Gêrar, yua kơ đei tơdrong hli krưp dêh đơ̆ng Kră Yang pơm kơ lu pơlei tih noh; păng lu linh Asa blah iŏk đĭ mŭk tơmam đơ̆ng pơlei noh, yua kơ tơ lăm pơlei noh đei mŭk tơmam lơ dêh.

¹⁵Kŭm đei blah tơgar iŏk lu anih wei sem dơrong, rôp ba triu păng lăk-đa lơ tơpă, đơ̆ng noh lu sư wih brŏk tơ pơlei Jêrusalem.