Read bahnar II Ho 15 Bible Online

II Ho 15 - bahnar bible

II Ho 15

¹Yang Bơhngol đơ̆ng Kră Yang 'Bok Kei-Dei tơbăt ăn kơ Asaria, kon drŏ-nglo Ôđet,

²Sư năm tơ'bơ̆p Asa păng khan: “Ơ Asa, păng đĭ bơngai Juđa hăm bơngai Bênjamin, mơ̆ng bĕ nơ̆r inh; lu iĕm oei hơdai hăm Kră Yang dang yơ, Kră Yang oei hơdai iĕm dang noh. Tơdah lu iĕm chă Sư lu iĕm gô tơ'bơ̆p, mă-lei tơdah lu iĕm achăng lê̆ Sư, na Sư kư̆m gô achăng lê̆ lu iĕm.

³Đunh boih lu bơngai Isơrael ưh kơ đei Kră Yang 'Bok Kei-Dei sĭt tơpă. Ưh pă đei 'bok soi bơtho tơ'bôh, kư̆m ưh pă đei khôi juăt;

⁴Mă-lei mưh đei tơdrong gleh pơmat-tat truh lu sư wih tơ Kră Yang 'Bok Kei-Dei Isơrael păng krao chă Kră Yang na Sư ăn tơ'bơ̆p tơpă.

⁵Kơplah noh kon pơlei Isơrael ưh kơ đei rơnŭk ôh, chă nơnăm mơ̆t lĕch, yua kơ đĭ-đăng bơngai đei tơdrong rŭng răng tih tơpă.

⁶Dêh char 'nâu blah pơjuă dêh char nai, pơlei âu blah pơlei to yua kơ Kră Yang 'Bok Kei-Dei ăn đei lơ tơdrong gleh pơmat wă pơrŭng lu sư.

⁷Mă-lei lu iĕm athei đei jơhngơ̆m nuih pran, ti lu iĕm 'nĕ pă rơdu achăng, yua kơ dôm tơdrong jang iĕm pơm gô đei yua.”

⁸Wă Asa kơtơ̆ng boih nơ̆r 'nâu păng nơ̆r khan lê̆ adrol đơ̆ng Asaria kon drŏ-nglo Ôdet, jơhngơ̆m sư hiôk na sư nuih pơ̆n pơrăm lê̆ đĭ lu rup yang kơnê̆ đơ̆ng lăm jơ̆p kơ Juđa păng Bênjamin, hăm đơ̆ng lăm lu pơlei mă đêl lu sư 'nao blah iŏk tơ kơpal kông groi Êphraim; sư pơdơ̆ng hơmet chơnang soi Kră Yang 'bơ̆t anăp kơdeng hnam Kră Yang.

⁹Sư akŭm đĭ bơngai Juđa, lu bơngai Bênjamin păng lu bơngai lăm Êphraim, Manase păng adrĕch Simêôn, mă oei oei hơdai lu sư; đei lơ bơngai Isơrael năm mơ̆t oei tơ gah sư, yua kơ 'bôh đei Kră Yang 'Bok Kei-Dei tơgŭm păng oei hơdai Asa.

¹⁰Lăm khei pêng sơnăm mơjĭt-pơđăm lăm chăl Asa, lu sư akŭm lăm pơlei Jêrusalem;

¹¹Lăm năr noh lu sư iŏk tơpơh-hrĕng tŏ rơmo tơno păng tơpơh-rơbâu tŏ triu hăm bơbe, lu kon sem dơrong mă đơ̆ng lu sư blah iŏk, pơyơ̆r pơm tơmam soi bơnê kơ Kră Yang.

¹²Lu sư pơgơ̆p pơkă băl rim 'nu athei chă Kră Yang 'Bok Kei-Dei 'bok yă lu sư hăm đĭ jơhngơ̆m klơm klak.

¹³Bu mă ưh kơ chă Kră Yang 'Bok Kei-Dei Isơrael gô pơlôch, mă 'lơ̆p mă jŏ, drŏ-nglo dah drŏ-kăn.

¹⁴Lu sư ôr jreo re pơkă pơkăm hăm Kră Yang, chơt hiôk tơkĕch, jreo, hlôm keng, hlôm tơgiĕp.

¹⁵Đĭ kơ bơngai Juđa chơt hiôk dêh kơ nơ̆r pơkă pơkăm noh, yua kơ lu sư đĭ jơhngơ̆m pơkă păng đĭ jơhngơ̆m krao chă Kră Yang na Sư ăn tơ'bơ̆p păng ăn kơ lu sư rơnŭk rơnua hiôk-hian rim pah.

¹⁶Pơtao Asa ưh pă ăn kơ yă sư Maaka jang dơ̆ng yua kơ sư pơm gơ̆ng kơkuh kơ rup yang Asêra. Pơtao Asa teh pơrăm lê̆ gơ̆ng rup yang noh teh pơchah hĕch hoch đĭ păng soh lê̆ tơ thŭng Kidrôn.

¹⁷Mă lu anih tơ kơpal kơjung lu bơngai Isơrael sư ưh kơ đei pơrăm ôh; lei ră, jơhngơ̆m Asa oei arih 'lơ̆ng hăm Kră Yang lăm đĭ chăl arih sư.

¹⁸Sư tah tơmam rơgoh lăm hnam Kră Yang tơmam noh đơ̆ng 'bă sư păng tơmam đơ̆ng sư kơdih mă đei klah 'măn lê̆ pha 'lơ̆ng rơgoh, maih, hu păng dôm pơnhan kơchŏk.

¹⁹Ưh pă đei tơblah boih dĭng truh tơ sơnăm mă pêng-jĭt pơđăm lăm chăl sư pơgơ̆r.