Read bahnar II Ho 16 Bible Online

II Ho 16 - bahnar bible

II Ho 16

¹Lăm sơnăm mă pêng-jĭt tơdrâu chăl Asa pơgơ̆r, Baasa pơtao Isơrael, năm blah lu bơngai Juđa păng pơjing pơlei Rama kơjăp, wă găn ưh kơ ăn bu mơ̆t lĕch ôh tơ lăm teh đak Asa pơtao đe Juđa.

²Asa iŏk hu maih đơ̆ng lăm hnam mong tơmam hnam Kră Yang păng đơ̆ng lăm hnam mong tơmam pơtao, gơih ăn kơ Ben Hadat, pơtao Siri, oei lăm pơlei Đamas păng khan:

³“Bĕ ba pơgơ̆p hơdai ih hăm inh thoi bre 'bă ih hăm 'bă inh sơ̆. 'Nâu, inh gơih ăn kơ ih hu, maih. Apinh ih 'nĕ pă pơgơ̆p hăm Baasa pơtao Isơrael dơ̆ng, wă kơ sư weh đơ̆ng char inh.”

⁴Ben Hadat mơ̆ng kiơ̆ pơtao Asa na wơh lu yŏng linh năm blah iŏk lu pơlei tih bơngai Isơrael; lu sư blah iŏk lu pơlei Ijôn, pơlei Đan, pơlei Abel Maim păng lu pơlei đei hnam mong tơmam char Naptali.

⁵Wă Baasa kơtơ̆ng tơdrong noh, sư pơdơh ưh pă pơm pơjing pơlei Rama.

⁶Pơtao Asa akŭm đĭ bơngai Juđa; lu sư năm iŏk đĭ lu tơmo, tơ̆r 'long mă đêl Baasa đei pơm pơjing pơlei Rama; na Asa iŏk dôm lu tơmam noh pơdơ̆ng pơjing pơlei Gêba păng pơlei Mispa.

⁷Kơplah noh Hanani bơngai khan lê̆ adrol năm tơ Asa pơtao đe Juđa na khan kơ sư: “Yua kơ ih gơnang dêh kơ pơtao Siri, ưh kơ gơnang kơ Kră Yang 'Bok Kei-Dei ih ôh, na lu linh pơtao Siri kơdâu klaih boih đơ̆ng ti ih.

⁸Lu linh Êthiôpi păng linh Libyan hăm trŏ nuih kơtang đei gre aseh păng lu linh hao aseh lơ dêh? Lei ră, pơtao gơnang kơ Kră Yang boih, na Sư jao lu linh noh lăm ti ih.

⁹Măt Kră Yang lăng jơ̆p kơ teh đak, wă tơgŭm jơhngơ̆m pran kơ lu đe bu mă đei jơhngơ̆m gơnang kơ Sư. Tơpă lăm tơdrong 'nâu ih đei pơm kư̆ kă, na đơ̆ng âu tơ anăp ih gô đei tơ'bơ̆p tơdrong tơblah hơnơ̆ng.”

¹⁰Asa sư hil kơ bơngai khan lê̆ adrol noh dêh na rôp phak. Kơplah noh Asa kư̆m pơm kơnê̆ kơ lu kon pơlei hai.

¹¹Tơdrong jang Asa iŏk đơ̆ng blŭng-a truh tơ tôch đei chih răk lê̆ tơ lăm sơ̆p hla bơar lu pơtao đe Juđa păng bơngai Isơrael.

¹²Lăm sơnăm mă pêng-jĭt tơsĭn chăl Asa pơgơ̆r, Asa sư đei jĭ jơ̆ng sư jĭ krưp dêh; kơplah sư jĭ jơ̆ng 'nâu sư ưh kơ chơchă Kră Yang, mă-lei sư chă 'bok pơgang wă ming mang.

¹³Asa lôch năm kiơ̆ 'bok sư, sư lôch sơnăm mă puăn-jĭt mônh lăm chăl sư pơgơ̆r.

¹⁴Đe 'bŭ sư lăm bơsat mă anih sư đei sir boih kơ sư kơdih lăm pơlei Đawit, đe tơ'bĭch lăm bong mă đe đei tah 'bĕnh kơ pơgang 'bâu phu, đe đei hơmet boih kiơ̆ kơ juăt pơm soh, đe soh 'long pơgang 'bâu phu tih dêh lăm năr grong noh.