Read bahnar II Ho 18 Bible Online

II Ho 18 - bahnar bible

II Ho 18

¹Jêhôsaphat mơdrŏng tih đei đe ư-ang pơyom, năm pơm pô̆ 'băn ăn băl kon hăm Ahap.

²Dang 'bar pêng năr đơ̆ng rŏng sư jur năm ngôi tơ Ahap tơ pơlei Samari, Ahap đei 'bet sa lơ triu rơmo et sa hăm Jêhôsaphat hăm lu bơngai kiơ̆ sư, na pơthơr sư tŏk blah lu kon pơlei Ramôt Gileat.

³Ahap pơtao đe Isơrael khan kơ Jêhôsaphat pơtao đe Juđa: “Ih hăm wă năm hăm inh tŏk blah pơlei Ramôt Gileat ưh?” Sư drơ̆ng: “Inh kư̆m thoi ih; kon pơlei inh kư̆m thoi kon pơlei ih; nhôn gô năm hơdai ih tŏk blah.”

⁴Jêhôsaphat kư̆m đei khan hăm pơtao Isơrael: “Mă-lei athei krao apinh Kră Yang adrol 'mơ̆i.”

⁵Pơtao Isơrael krao akŭm lu 'bok khan lê̆ adrol, đei puăn-hrĕng 'nu, na jet lu sư: “Lu bơ̆n hăm gơh năm blah pơlei Ramôt tơ Gileat dah ưh?” Lu sư tơl: “Năm tŏk blah bĕ; Kră Yang 'Bok Kei-Dei gô pơjao pơlei noh lăm ti ih, pơtao.”

⁶Jêhôsaphat jet dơ̆ng: “Tơ âu hăm pă đei bu dơ̆ng 'bok khan lê̆ adrol Kră Yang wă kơ bơ̆n apinh sư?”

⁷Pơtao Isơrael tơl Jêhôsaphat khan: “Oei đei pă minh 'nu anăn sư Mikaia kon drŏ-nglo Imla, apinh sư krao khan apinh Kră Yang; mă-lei inh areh dêh kơ sư, yua kơ sư ưh kơ đei khan lê̆ adrol 'lơ̆ng gah inh tă kơ khan lê̆ adrol kơnê̆ ngăl gah inh.” Jêhôsaphat khan: “Apinh ih 'nĕ pơma thoi noh!”

⁸Pơtao Isơrael krao minh 'nu yŏng linh păng khan: “Năm krao Mikaia kon drŏ-nglo Imla năm tơ âu mă tĕnh.”

⁹Kơplah noh pơtao Isơrael păng Jêhôsaphat pơtao Juđa, bre sư hrŭk hơbĕn ao pơtao sư, hơ-oei 'bơ̆t anih tang-dŏ pơtao sư, tơ anih đe pơjuă 'bơ̆t 'măng dur pơlei Samari; lu 'bok khan lê̆ adrol oei pơma khan lê̆ adrol đĭ 'bơ̆t anăp bre pơtao.

¹⁰Sêđekia kon drŏ-nglo Kênaana sư đei pơm hơke hăm mam păng khan: “'Nâu Kră Yang khan: ‘Hăm hơke 'nâu lu iĕm gô tơ̆m bơngai Siri dĭng truh tơ lu sư lôch răm đĭ.’ ”

¹¹Đĭ-đăng lu 'bok khan lê̆ adrol kư̆m khan lê̆ adrol thoi noh mơ̆n: “Tŏk năm blah bĕ pơlei Ramôt Gileat gô jei ih. Kră Yang gô jao pơlei noh lăm ti ih, pơtao.”

¹²Bơngai năm krao Mikaia khan kơ sư; Âu, lu 'bok khan lê̆ adrol lu sư pơma minh pôm nơ̆r, gô jei ih, pơtao; apinh ih kư̆m pơma 'lơ̆ng thoi lu sư kơ pơtao.

¹³Mă-lei Mikaia khan: “Kiơ̆ kơ thoi Kră Yang arih ling-lang, Kră Yang 'Bok Kei-Dei inh khan liơ, inh gô pơma thoi noh.”

¹⁴Wă sư truh tơ pơtao, pơtao apinh sư: “Ơ Mikaia lu bơ̆n hăm gơh năm blah Ramôt tơ Gileat, dah ưh?” Sư tơl: “Năm blah bĕ, gô jei ih; sư gô jao pơlei noh lăm ti ih.”

¹⁵Pơtao khan kơ sư: “Hơdôm wơ̆t inh đei athei ih pơma tơpăt hăm inh păng anăn Kră Yang?”

¹⁶Mikaia tơl: “Inh 'bôh lu bơngai Isơrael tơklah tơklang tơ kơpal kông groi thoi khŭl triu mă ưh kơ đei bơngai wei; păng Kră Yang đei khan: ‘Lu bơngai noh ưh kơ đei tơ'ngla, lê̆ lu sư wih brŏk tơ hnam lu sư kơdih hiôk-hian bĕ.’ ”

¹⁷Pơtao Isơrael khan kơ Jêhôsaphat: “Inh hăm roi kơ ih khan bơngai noh ưh kơ đei pơma khan 'lơ̆ng gah inh, tă khan tơdrong kơnê̆ ngăl?”

¹⁸Mikaia pơma dơ̆ng: “Thoi ei mơ̆ng bĕ nơ̆r Kră Yang khan: Inh 'bôh Kră Yang hơ-oei tơ kơpal tang-dŏ pơtao Sư, lu linh jang đĭ-đăng dơ̆ng kơkuh 'bar pah gah 'ma păng gah 'ngiĕo.

¹⁹Kră Yang jet: ‘Bu gô năm pơhlŭ Ahap, pơtao Isơrael, năm tŏk blah Ramôt tơ Gileat na gô lôch tơ noh?’ Đei mơ'nah pơma thoi âu mơ'nah khan thoi noh.

²⁰Blư đei minh 'nu yang lĕch năm dơ̆ng 'bơ̆t anăp Kră Yang khan: ‘Inh năm pơhlŭ sư.’ Kră Yang jet. ‘Ih pơhlŭ liơ?’

²¹Yang noh tơl: “Inh gô năm pơm thoi minh 'nu yang pơma hơlĕnh lăm 'bơ̆r lu 'bok khan lê̆ adrol sư.” Kră Yang khan: “Trŏ boih, ih gơh năm pơhlŭ sư. Năm bĕ pơm thoi nơ̆r ih khan.”

²²“Thoi noh Kră Yang ăn yang hơlĕnh pơma lăm 'bơ̆r lu bơngai khan lê̆ adrol pơtao păng Kră Yang kư̆m đei pơkă wă ăn tơdrong răm truh kơ pơtao.”

²³Sêdêkia, kon drŏ-nglo Kênaana, năm jê̆ tap tơ'bŏk Mikaia păng jet: “Trong ayơ Yang Bơhngol Kră Yang lĕch đơ̆ng inh năm roi kơ ih?”

²⁴Mikaia tơl: “Ih gô 'bôh 'bơ̆t năr ih kơdâu mơ̆t tơ lăm anih hlơp wă ôn,”

²⁵Pơtao Isơrael athei đe rôp Mikaia ba sư tơ Ammôn bơngai pơgơ̆r pơlei păng ăn kơ Jôas, kon drŏ-nglo pơtao,

²⁶na khan: “Pơtao khan thoi âu: ‘Athei phak bơngai âu păng ăn kơ sư lăp 'bĕng sa đak nhă đĕch dĭng truh tơ inh wih brŏk hiôk-hian.’ ”

²⁷Mikaia khan: “Tơdah pơtao wih brŏk hiôk-hian, lei Kră Yang ưh kơ đei wă yua inh khan.” Sư khan dơ̆ng: “Ơ kon pơlei, đĭ-đăng iĕm mơ̆ng nơ̆r inh.”

²⁸Na pơtao Isơrael păng Jêhôsaphat pơtao Juđa tŏk năm tơ pơlei Ramôt Gileat.

²⁹Pơtao Isơrael khan kơ Jêhôsaphat: “Inh gô hrŭk ao pha pơm thoi bơngai hmă na năm tŏk blah; gah ih athei hrŭk ao pơtao ih.” Pơtao Isơrael hrŭk hơbĕn ao hmă, dơ̆ng noh na bre sư năm tơblah.

³⁰Pơtao Siri pơkă tơtă kơ lu yŏng linh hao gre aseh sư: “'Nĕ kơ blah bu hŏ mă 'lơ̆p, dah 'lŏ, mă-lei blah rĕng kơ minh 'nu pơtao Isơrael đĕch.”

³¹Wă lu yŏng linh hao gre aseh 'bôh Jêhôsaphat, na khan: “Noh boih pơtao Isơrael.” Na lu sư dăr wă blah sư. Jêhôsaphat krao ôr, Kră Yang dŏng pơklaih sư păng Kră Yang ăn kơ lu đe noh weh ataih đơ̆ng sư.

³²Wă lu yŏng linh hao gre aseh 'bôh boih noh ưh kơ trŏ kơ pơtao Isơrael, na lu sư kơdŭn tơ rŏng ưh pă druh blah dơ̆ng.

³³Mă-lei đei minh 'nu iŏk hră chă prah kư̆ kă tă kơ 'bơm pơtao Isơrael 'bơ̆t kơtơh sơlam ao bơsei; Ahap khan kơ linh chĕp ba gre aseh sư: “Wih bơkuĕch tơ rŏng năm chơ ba inh lĕch đơ̆ng anih tơblah âu, inh 'bơm 'brơ̆m boih.

³⁴Lăm năr noh tơdrong tơblah rai dêh; na pơtao Isơrael oei lăm gre aseh sư muh măt sư tơwih tơ khŭl linh Siri dĭng truh kơsơ̆ măng; sư lôch 'bơ̆t 'năr mơ̆t boih.