Read bahnar II Ho 20 Bible Online

II Ho 20 - bahnar bible

II Ho 20

¹Klaih kơ noh đei lu bơngai Môap, Ammôn păng kư̆m đei bơngai Mêunit năm hơdai blah Jêhôsaphat.

²Đei bơngai năm roi tơbăt ăn kơ Jêhôsaphat thoi âu: “Đei minh khŭl linh lơ tơpă đơ̆ng char Eđôm pah to dơsĭ lu sư năm wă tơblah hăm ih; to lu sư oei lăm pơlei Hasasôn Tamar, (kư̆m anăn pơlei Êngêđi)

³Jêhôsaphat hli, na hơmet jơhngơ̆m sư chă Kră Yang, na kư̆m roi tơbăt jơ̆p kơ dêh char athei ơ̆t kơ sŏng sa.

⁴Lu bơngai Juđa akŭm băl wă krao chă Kră Yang dŏng tơgŭm; lu Sư năm đơ̆ng jơ̆p pơlei oei lăm dêh char Juđa krao chă Kră Yang.

⁵Jêhôsaphat dơ̆ng tŏk-bŏk akŭm hơdai lu bơngai Juđa đơ̆ng rim pơlei păng pơlei Jêrusalem 'bơ̆t cham 'nao anăp hnam akŭm tơm Kră Yang.

⁶Sư krao khan: “Ơ Kră Yang 'Bok Kei-Dei 'bok lu nhôn Ih hăm Kră Yang 'Bok Kei-Dei oei kơpal plĕnh? Ih boih Kră Yang 'Bok Kei-Dei wei pơgơ̆r đĭ kon bơngai păng đĭ kơ teh đak Lăm tơpang ti Ih đei tơdrong mơsêh pran kơtang ưh kơ đei bu kĕ tơblah hăm Ih.

⁷Ơ Kră Yang 'Bok Kei-Dei lu nhôn Hăm trŏ Ih boih pơpuh tơweh lu kon pơlei oei lăm tơring âu 'bơ̆t anăp bơngai Isơrael Ih, na jao ăn dêh char kơ adrĕch adrung Abraham, buăl juăt Ih, oei jang sa tơ âu ling-lang hlŏng hloi?

⁸Lu sư oei lăm dêh char 'nâu păng pơdơ̆ng pơjing hnam akŭm 'lơ̆ng rơgoh kơ Anăn Ih păng khan:

⁹‘Dah đei tơdrong kơnê̆ truh kơ lu nhôn, đao gưm, phak pơmat, dah lôch hơbuh, pơngot rơwĕt, lu nhôn gô năm dơng 'bơ̆t anăp hnam 'nâu, na lu nhôn krao apinh Ih lăm năr pơmat-tat, Ih mơ̆ng păng dŏng pơklaih nhôn.’

¹⁰'Nâu to lu bơngai Ammôn, kon pơlei Môap păng lu bơngai oei kơpal Kông Sêir; lu bơngai mă kơplah kon pơlei Isơrael lĕch đơ̆ng Êyiptơ Kră Yang ưh kơ ăn lu sư blah, na lu sư weh ưh kơ pơrăm đe noh ôh.

¹¹Lăng to, lu sư pơm plơ̆ kơ lu nhôn, 'maih wă puh tơweh lu nhôn đơ̆ng lăm teh jang sa mă đơ̆ng Ih ăn kơ lu nhôn boih,

¹²Ơ Kră Yang 'Bok Kei-Dei lu nhôn, lei Ih ưh kơ phak lu sư hă? Tơpă, lu nhôn ưh pă đei jơhngơ̆m pran wă blah hăm lu linh lơ kơdrâ̆m noh mă oei wă wang blah lu nhôn păng lu nhôn kư̆m đĭ pă băt wă pơm liơ; mă-lei măt lu nhôn lăng chang gô Ih đĕch.”

¹³Đĭ-đăng bơngai Juđa hăm lu kon akăn lu sư dơ̆ng 'bơ̆t anăp Kră Yang.

¹⁴Kơplah noh, Yang Bơhngol 'lơ̆ng Kră Yang jur mơ̆t lăm Jahasiêl, kon drŏ-nglo Sachari, sâu Bênaia, sâu i Jêiêl, sâu ach Matania, bơngai Lêwi adrĕch adrung Asap; sư dơ̆ng tŏk-bŏk lu bơngai tơpôl oei akŭm.

¹⁵Sư khan: “Ơ pơtao Jêhôsaphat, bơngai Juđa đơ̆ng jơ̆p pơlei păng kon pơlei oei lăm pơlei Jêrusalem, mơ̆ng bĕ! Kră Yang khan: ‘Lu iĕm 'nĕ kơ hli, 'nĕ tơrơ kơ lu linh lơ kơdrâ̆m 'nâu, yua kơ tơdrong tơblah 'nâu ưh kơ sĭ kơ lu iĕm ôh, 'nâu kơ Kră Yang 'Bok Kei-Dei.’

¹⁶Pơgê dơning jur năm tơblah lu sư; to, lu sư tŏk rok trong kuĕl Sis, lu iĕm gô tơ'bơ̆p lu sư tơ tôch kơ thŭng, lăm tơmăn glă Jeruel.

¹⁷Lu iĕm huay kơ kăl kơ tơblah; săp bĕ, lu linh oei hreh tơ noh, na lăng tơdrong Kră Yang, Tơ'ngla oei hơdai iĕm gô dŏng pơklaih iĕm. Ơ bơngai Juđa păng kon pơlei Jêrusalem 'nĕ kơ hli 'nĕ kơ tơrơ. Dơning năm tơ'bơ̆p lu sư bĕ! Kră Yang oei hơdai iĕm.”

¹⁸Jêhôsaphat kŭp kơ̆l drap tơ teh; đĭ-đăng bơngai Juđa păng bơngai oei lăm pơlei Jêrusalem kư̆m kŭp kơ̆l drap tơ teh 'bơ̆t anăp Kră Yang păng kơkuh kơ Kră Yang.

¹⁹Lu bơngai Lêwi gah adrĕch Kôhat păng lu adrĕch Kôra lu sư iung dơ̆ng pơma 'bơ̆r re păng khan bơnê kơkuh kơ Kră Yang 'Bok Kei-Dei Isơrael.

²⁰Truh pơgê đơ̆ng rŏng, lu sư iung đơ̆ng hrôih lĕch năm tơ tơmăn glă Têkôa; kơplah lu sư oei yak, Jêhôsaphat dơ̆ng tơ noh, khan: “Ơ lu bơngai Juđa păng kon pơlei oei lăm pơlei Jêrusalem mơ̆ng bĕ inh: Lui gơnang bĕ kơ Kră Yang 'Bok Kei-Dei lu iĕm, na lu iĕm pran kơjăp; lui bĕ kơ 'bok khan lê̆ adrol Kră Yang, lei na lu iĕm kĕ jei,”

²¹Đang kơ sư đei pơma pơđâu hăm kon pơlei pơla boih, na sư rơih iŏk đei khŭl hơri wă ư-ang kơ Kră Yang rang rŏ hơri bơnê ư-ang Kră Yang 'lơ̆ng rơgoh rang rŏ, lu sư yak adrol kơ khŭl linh, ôr khan: “Bơnê bĕ kơ Kră Yang. Tơdrong Sư 'mêm mơnat oei oei ling-lang.”

²²Kơplah lu sư oei hơri kơkuh bơnê, Kră Yang hơmet minh khŭl răp blah bơngai Ammôn, bơngai Môap păng lu bơngai oei 'bơ̆t Kông Sêir oei năm blah bơngai Juđa ră na păng lu sư thuơ đĭ.

²³Kon pơlei Ammôn păng kon pơlei Môap năm blah kon pơlei oei 'bơ̆t Kông Sêir, wă pơlôch pơrăm đĭ lê̆ lu sư; dang kơ lu sư blah pơlôch kon pơlei oei 'bơ̆t Kông Sêir boih, na lu sư wih tơblah pơlôch băl tơduă.

²⁴Wă kon pơlei Juđa truh tơ anih kơjung, tơmang 'bôh lăm thŭng glă đei khŭl tơpôl linh lơlang lơlap, na kư̆m 'bôh lu akâu bơngai lôch sơ̆k glơch glach kơpal teh ưh kơ đei bu arih.

²⁵Jêhôsaphat păng lu kon pơlei sư năm wă iŏk tơmam, 'bôh đei tơmam păng akâu bơngai lôch lơ tơpă păng đei tơmam gĭt lơ tơpă dônh iŏk mah pă kĕ đĭ; lu sư dônh mah pêng năr, yua kơ tơmam lơ tơpă.

²⁶Truh năr mă puăn lu sư akŭm băl tơ lăm Thŭng Bêraka, tơ noh lu sư hơri kơkuh ư-ang kơ Kră Yang; yua kơ thoi noh na đe krao anih noh thŭng Bêraka truh tơ dang ei.

²⁷Đơ̆ng noh pơtao Jêhôsaphat yak adrol kơ đĭ-đăng bơngai Juđa păng lu bơngai oei lăm pơlei Jêrusalem chơt hiôk wih tơ pơlei Jêrusalem; Kră Yang ăn kơ lu sư chơt hiôk, yua kơ Kră Yang blah pơrăm đĭ boih linh ayăt.

²⁸Lu sư brŏk truh mơ̆t lăm pơlei Jêrusalem, năm truh tơ hnam akŭm tơm Kră Yang reh brŏ dung, tĭng-nĭng păng hlôm keng.

²⁹Wă lu kon pơlei pơla kơtơ̆ng kơ tơdrong Kră Yang blah pơrăm lu ayăt kơ bơngai Isơrael, na lu sư hli tơpă kơ Kră Yang 'Bok Kei-Dei.

³⁰Thoi noh, dêh char pơtao Jêhôsaphat hiôk-hian rơnŭk rơnua, yua kơ Kră Yang 'Bok Kei-Dei ăn kơ sư pơdơh hiôk-hian puăn pah.

³¹Thoi noh Jêhôsaphat pơm pơtao pơgơ̆r dêh char Juđa iŏk đơ̆ng sư 'nao pêng-jĭt pơđăm sơnăm pơgơ̆r oei lăm pơlei tih Jêrusalem 'bar-jĭt pơđăm sơnăm mĕ sư anăn Asuba kon drŏ-kăn Silhi.

³²Sư yak pơm kiơ̆ trong 'bă sư Asa, sư ưh kơ weh yak trong nai ôh; sư pơm 'lơ̆ng trŏ 'bơ̆t anăp Kră Yang.

³³Mă-lei sư ưh tam mă pơrăm ôh anih kơjung păng kon pơlei ưh tam mă jao jơhngơ̆m kơ Kră Yang 'bok lu sư.

³⁴Dôm tơdrong jang nai Jêhôsaphat pơm đơ̆ng blŭng-a truh tơ tôch đei chih răk lăm sơ̆p hla bơar hơ'mon Jêhu, kon drŏ-nglo Hanani, tơdrong hơ'mon noh đei chih răk boih lăm sơ̆p hla bơar lu pơtao Isơrael.

³⁵Đơ̆ng rŏng kơ noh Jêhôsaphat pơtao Juđa pơgơ̆p hăm Ahasia pơtao Isơrael, bơngai mă pơm kơnê̆.

³⁶Bre sư pơgơ̆p băl pơm duk tơ Êsiôn Gêber wă năm tơ pơlei Tarsis.

³⁷Kơplah noh Êliêser kon drŏ-nglo Dôdawahu đơ̆ng pơlei Marêsa khan lê̆ adrol gah Jêhôsaphat khan; “Yua kơ ih đei pơgơ̆p boih hăm Ahasia, Kră Yang gô pơrăm lê̆ tơdrong jang mă ih đei pơm boih.” Duk mă lu sư pơm noh pơchah, lei na duk noh ưh kơ gơh năm truh tơ Tarsis ôh.