Read bahnar II Ho 21 Bible Online

II Ho 21 - bahnar bible

II Ho 21

¹Jêhôsaphat lôch năm oei hơdai hăm lu 'bok sư, đe 'bŭ sư hơdai hăm lu 'bok sư lăm Pơlei Đawit; Jêhôram kon drŏ-nglo sư iung pơgơ̆r pơtrơp sư.

²Sư đei lu oh sư, kon drŏ-nglo Jêhôsaphat noh Asaria, Jêhiêl, Secharia, Asariahu, Michael păng Sêphatia; đĭ-đăng lu đe noh kon drŏ-nglo Jêhôsaphat pơtao Isơrael.

³'Bă sư pơtao đei ăn boih kơ lu sư lơ mŭk tơmam, hu maih, lu mŭk tơmam gĭt păng jao ăn lu pơlei kơjăp lăm char Juđa; mă-lei jao ăn kơ Jêhôram pơm pơtao, yua kơ sư kon kơdră.

⁴Kơplah Jêhôram tŏk pơm pơtao pơtrơp đơ̆ng 'bă sư, wă sư pran kơjăp boih sư iŏk đao gưm pơlôch đĭ lu oh sư hăm lu yŏng pơgơ̆r Isơrael.

⁵Jêhôram 'nao pêng-jĭt 'bar sơnăm kơplah sư tŏk pơm pơtao păng sư pơgơ̆r đei tơhngam sơnăm lăm pơlei tih Jêrusalem.

⁶Sư yak kiơ̆ trong lu pơtao Isơrael, kiơ̆ thoi Ahap đei pơm boih, yua kơ sư iŏk oei kơ kon adruh Ahap pơm akăn; sư pơm tơdrong kơnê̆ dêh 'bơ̆t anăp Kră Yang.

⁷Lei ră Kră Yang ưh kơ wă pơlôch Sư adrĕch pơm pơtao, yua kơ Sư đei pơgơ̆p boih hăm Đawit, Sư đei pơkă boih wă ăn minh pôm ŭnh kơđeng kơ adrĕch Đawit kon sâu sư ling-lang, hlŏng hloi.

⁸Lăm chăl Jêhôram pơgơ̆r, char Eđôm iung blah lu bơngai Juđa păng pôk pơtao kơdih lu sư.

⁹Jêhôram hăm lu yŏng pơgơ̆r linh păng lu gre aseh sư, năm blah Eđôm mă-lei linh Eđôm đĭ wang tăp kơ sư păng lu linh hao gre aseh sư mă-lei lu sư iung kơdâu lĕch hlôi kơmăng.

¹⁰Lei na bơngai Eđôm iung blah Juđa dĭng truh dang ei. Kŭm lăm kơplah noh kon pơlei Lipna kư̆m iung blah Jêhôram dơ̆ng, yua kơ sư achăng lê̆ Kră Yang 'Bok Kei-Dei lu 'bok sư.

¹¹Sư kư̆m pơm ming lu anih kơjung tơ kơpal groi char Juđa, pơhlŭ pơtơm kon pơlei mă oei lăm pơlei tih Jêrusalem pơm kơnê̆ oei sa kư̆ kă pơm kơ Juđa wơ̆l jrok.

¹²Êli bơngai khan lê̆ adrol chih hla bơar ăn kơ Jêhôram, khan: “Kră Yang 'Bok Kei-Dei Đawit, 'bok ih, khan: ‘Yua kơ ih ưh kơ yak kiơ̆ kơ trong Jêhôsaphat 'bă ih păng kư̆m ưh kơ kiơ̆ trong Asa, pơtao Juđa,

¹³Na đĭ kiơ̆ trong lu pơtao bơngai Isơrael, pơhlŭ pơtơm kon pơlei Juđa păng kon pơlei lăm Jêrusalem ngôi kư̆ kă kơkuh kơ rup Yang thoi adrĕch Ahap đei pơm boih păng kư̆m pơlôch boih lu oh ih đơ̆ng hnam 'bă ih, lu sư arih sa 'lơ̆ng hloh kơ ih,

¹⁴Lăng âu Kră Yang gô ăn tơdrong truh pơmat lu kon pơlei ih, lu kon sâu ih, truh tơ lu akăn ih, kư̆m pơrăm truh lu mŭk tơmam ih.

¹⁵Gah ih gô jĭ pơmat dêh rim năr rai dêh dĭng mah klơm klak ih ôm lĕch tơ 'nguaih.’ ”

¹⁶Kră Yang kư̆m pơm ăn jơhngơ̆m lu bơngai Philistin păng kon pơlei Arâp mă oei jê̆ kon pơlei Êthiôpi, iung blah Jêhôram.

¹⁷Lu sư wang blah iŏk char Juđa, blah iŏk đĭ hloi mŭk tơmam lăm hnam pơtao, rôp ba pơm bơnă đĭ lu kon drŏ-nglo lu akăn sư, oei lê̆ pă minh 'nu kon hơdruch sư Ahasia.

¹⁸Đơ̆ng rŏng kơ lu tơdrong noh, Kră Yang pơm kơ sư jĭ lăm klak ưh kơ layơ klaih.

¹⁹Lăm khei 'năr ei, 'bơ̆t wă jê̆ đĭ sơnăm mă 'bar klơm klak sư ôm lĕch tơ 'nguaih, sư lôch pơmat dêh; kon pơlei kư̆m ưh pă đei soh 'long 'bâu phu thoi 'bă sư.

²⁰Sư pơm pơtao kơplah sư 'nao pêng-jĭt 'bar sơnăm sư pơgơ̆r đei tơhngam sơnăm lăm pơlei tih Jêrusalem; sư lôch ưh kơ đei bu 'mêm kơ sư, đe 'bŭ sư lăm Pơlei Đawit, mă-lei ưh kơ đei 'bŭ hơdai lăm bơsat lu pơtao ôh.