Read bahnar II Ho 23 Bible Online

II Ho 23 - bahnar bible

II Ho 23

¹Lăm sơnăm mă tơpơh, Jêhôiada iung đei jơhngơ̆m nuih pran, pơgơ̆p hơdai hăm lu yŏng pơgơ̆r minh-hrĕng 'nu linh, noh Asaria kon drŏ-nglo Jêrôham, Ismael kon drŏ-nglo Jêhôhanan, Asaria kon drŏ-nglo Ôbet, Maaseia kon drŏ-nglo Ađaia păng Êlisaphat kon drŏ-nglo Sikri.

²Lu sư chă năm jơ̆p kơ dêh char Juđa lu sư akŭm lu bơngai Lêwi păng lu yŏng kơdră adrĕch bơngai Isơrael đơ̆ng jơ̆p pơlei lăm char Jut; na lu sư năm tơ pơlei Jêrusalem.

³Đĭ khŭl akŭm lu sư pơm tơdrong pơgơ̆p hăm pơtao lăm hnam Kră Yang 'Bok Kei-Dei. Jêhôiada pơma hăm lu sư: “'Nâu kon drŏ-nglo pơtao sư gô pơgơ̆r kiơ̆ thoi nơ̆r Kră Yang đei khan lê̆ gah kon sâu Đawit.

⁴'Nâu tơdrong lu iĕm athei pơm: Minh lăm pêng 'nu lu iĕm, lu 'bok soi păng lu bơngai Lêwi, bơ̆jang lăm năr Sa'bat, athei lu wei 'măng jang;

⁵minh lăm pêng lu iĕm gô gak lăm hnam pơtao păng minh lăm pêng dơ̆ng gô dơ̆ng 'bơ̆t 'Măng Jang Hơnă; păng đĭ-đăng lu kon pơlei gô dơ̆ng 'bơ̆t cham hnam Kră Yang.

⁶'Nĕ ăn kơ minh 'nu bu mơ̆t lăm hnam Kră Yang ôh 'nguaih kơ lu 'bok soi păng lu bơngai Lêwi mă awih awăn; lu sư gô mơ̆t, yua kơ lu sư 'lơ̆ng rơgoh; đĭ-đăng kon pơlei athei wei răk nơ̆r Kră Yang tơtă.

⁷Lu bơngai Lêwi dơ̆ng tăp dăr kơ pơtao, rim 'nu chĕp khêl đao; bơngai bu mơ̆t lăm hnam Kră Yang gô pơlôch; lu iĕm athei bơwei pơtao mă sư mơ̆t dah sư lĕch.”

⁸Lu bơngai Lêwi păng đĭ-đăng lu kon pơlei bơngai Juđa pơm kiơ̆ nơ̆r Jêhôiada 'bok soi đei athei tơtă; rim 'nu lu sư athei pơkeh rim tơdrong jang năr Sa'bat hơdai hăm lu bơngai mă oei wă mơ̆t jang lăm năr Sa'bat, yua kơ Jêhôiada 'bok soi ưh kơ ăn kơ minh 'nu bu pơdơh.

⁹Jêhôiada 'bok soi đei asong ăn kơ lu yŏng pơgơ̆r minh-hrĕng 'nu linh chĕp tơju, khêl tih iĕ đơ̆ng Đawit tah lê̆ lăm hnam Kră Yang 'Bok Kei-Dei.

¹⁰Sư ăn kơ lu linh noh chĕp khêl đao dơ̆ng tăp dăr kơ pơtao, iŏk đơ̆ng gah yă-nơ̆m kơ hnam akŭm truh tơ gah gơal kơ hnam akŭm jê̆ chơnang soi.

¹¹Jêhôiada hăm lu kon drŏ-nglo Sư chông kon pơtao lĕch, pơyơ̆l ăn kơ sư môk pơtao păng ăn kơ sư sơ̆p hla bơar khôi juăt, na pôk sư pơm pơtao; sư tuh đak rơmă tơ kơ̆l Jôas păng khan: “Pơtao arih ling-lang!”

¹²Wă Athalia kơtơ̆ng jơwa kon pơlei kơdâu, ôr kơkuh ư-ang kơ pơtao, sư năm tơ kon pơlei tơ hnam Kră Yang.

¹³Sư 'bôh pơtao dơ̆ng jê̆ jrăng 'bơ̆t trong wă mơ̆t; lu yŏng linh păng lu bơngai hlôm keng dơ̆ng jê̆ pơtao; đĭ-đăng kon pơlei oei lăm char chơt hiôk 'nă hal hlôm keng, kư̆m đei lu bơngai hơri pơtơm pôk pơư reh brŏ, na kơkuh bơnê ư-ang kơ pơtao. Athalia hơloh hek ao sư kơdih na ôr re khan: Blah blơ̆, blơ̆ boih.

¹⁴'Bok soi Jêhôiada athei lu yŏng pơgơ̆r minh-hrĕng linh păng khan kơ lu sư: “Chông tơlĕch yă âu tơ 'nguaih bĕ, bơngai bu kiơ̆ sư gô pơlôch hăm đao gưm.” 'Bok soi đei khan boih: “'Nĕ kơ pơlôch sư tơ lăm hnam Kră Yang ôh.”

¹⁵Na đe rôp yă ei 'bơ̆t 'Măng Jang Aseh, na đe pơlôch hloi sư tơ noh.

¹⁶Jêhôiada pơgơ̆p hăm lu kon pơlei păng pơtao, wă kơ lu sư jing kon pơlei pơla Kră Yang.

¹⁷Đĭ-đăng lu kon pơlei năm tơ hnam yang Baal, pơrăm lê̆ lu chơnang soi păng rup man sư păng pơlôch Matan 'bok soi kơ yang Baal 'bơ̆t anăp chơnang soi.

¹⁸Jêhôiada jao kơ lu 'bok soi bơngai Lêwi wei-lăng hnam akŭm Kră Yang, wă pơyơ̆r tơmam soi 'buh kơ Kră Yang, rok thoi lăm sơ̆p hla bơar Khôi Juăt Môis đei chih boih, hơdai hăm hơri ư-ang chơt hiôk kiơ̆ kơ Đawit đei pơkă boih.

¹⁹Sư kư̆m pơjao ăn kơ lu bơngai gak wei-lăng lu 'măng jang hnam Kră Yang, wă ưh kơ đei bơngai bu 'mê̆-'mach kơnê̆ mơ̆t tơ noh.

²⁰Sư pơtơm lu yŏng pơgơ̆r minh-hrĕng linh, lu kră mă đe pơyom păng lu yŏng pơgơ̆r kon pơlei, hăm kon pơlei lăm tơring char, năm ba pơtao lĕch đơ̆ng lăm hnam Kră Yang jur năm tơ hnam pơtao mơ̆t rok trong 'Măng Jang Kơpal, wă ăn kơ sư hơ-oei 'bơ̆t tang-dŏ pơtao pơgơ̆r dêh char.

²¹Thoi noh đĭ-đăng kon pơlei oei lăm char ei chơt hiôk chhôk 'nă hal păng lăm pơlei tih Jêrusalem hiôk-hian, đang kơ pơlôch lê̆ Athalia hăm đao gưm.