Read bahnar II Ho 24 Bible Online

II Ho 24 - bahnar bible

II Ho 24

¹Jôas 'nao tơpơh sơnăm năr sư pơm pơtao; sư pơgơ̆r puăn-jĭt sơnăm lăm pơlei tih Jêrusalem; mĕ sư anăn Sibia đơ̆ng pơlei Bêrsêba,

²Jôas pơm tơdrong 'lơ̆ng tơpăt 'bơ̆t anăp Kră Yang lăm đĭ sơnăm Jêhôiada pơm 'bok soi.

³Jêhôiada chă ăn kơ Jôas 'bar 'nu akăn, sư đei kon hơ'lơ̆p drŏ-nglo drŏ-kăn.

⁴Đơ̆ng rŏng kơ noh, Jôas wă pơdơ̆ng ming Hnam Kră Yang.

⁵Sư krao akŭm lu 'bok soi păng lu bơngai Lêwi, na khan: “Năm tơ jơ̆p-jang kơ pơlei Juđa bĕ, ra pơpôi jên kăk đơ̆ng lu bơngai Isơrael 'măn rim sơnăm wă hơmet ming Hnam Kră Yang 'Bok Kei-Dei lu iĕm; pơm bĕ tơdrong 'nâu mă kuăng.” Mă-lei lu bơngai Lêwi pơhiơ̆ dêh.

⁶Pơtao krao Jêhôiada 'bok soi tơm păng khan: “Yua kơ kiơ ih ưh kơ pơkă kơ lu bơngai Lêwi chĕp ba jên lu bơngai Juđa păng lu bơngai oei lăm pơlei Jêrusalem ra ăn kiơ̆ kơ Môis đĭch đam Kră Yang 'Bok Kei-Dei mă đei pơkă boih hăm lu kon pơlei Isơrael athei pơyơ̆r ăn kơ Bơsŭn Roi Tơbăt?”

⁷Đơ̆ng lu kon drŏ-nglo Athalia yă pơm kơnê̆ dêh noh, teh 'măng mơ̆t tơtông lăm hnam Kră Yang 'Bok Kei-Dei lu sư kư̆m iŏk đĭ tơmam rơgoh đơ̆ng Hnam Kră Yang pơyơ̆r ăn kơ yang Baal.

⁸Thoi noh pơtao athei đe pơ̆ng minh pôm hom, lê̆ 'bơ̆t 'măng jang Hnam Kră Yang.

⁹Đơ̆ng noh năm roi tơbăt tơ jơ̆p lăm char Juđa păng pơlei Jêrusalem rim 'nu athei năm pơyơ̆r jên ăn kơ Kră Yang kiơ̆ thoi Môis đĭch đam Kră Yang 'Bok Kei-Dei đei pơkă ăn boih kơ lu bơngai Isơrael tơ lăm tơmăn glă.

¹⁰Đĭ-đăng lu yŏng pơgơ̆r păng lu kon pơlei chơt hiôk năm pơyơ̆r ba jên tah lăm hom noh mah 'bĕnh.

¹¹Rim wơ̆t lu bơngai Lêwi tung tơmơ̆t hom, na năm ba ăn kơ lu bơngai yŏng bơ̆jang kơ pơtao, lu Sư 'bôh jên 'bĕnh, bơngai chih hla bơar lăm hnam pơtao păng lu bơngai bơ̆jang kơ 'bok soi tơm năm tuh jên đơ̆ng lăm hom noh, đơ̆ng noh năm dan 'măn lê̆ 'bơ̆t anih đêl dơ̆ng. Rim năr lu sư pơm thoi noh, na đei ra pơpôi jên lơ tơpă.

¹²Pơtao păng Jêhôiada jao jên noh ăn kơ lu bơngai wei-lăng bơ̆jang lăm Hnam Kră Yang; lu sư apah lu bơngai jang man păng lu bơngai ot 'long, wă pơdơ̆ng ming Hnam Kră Yang; păng wă apah lu bơngai hơjơ̆m bơsei păng kong wă hơmet ming Hnam Kră Yang.

¹³Lu bơngai wei-lăng bơ̆jang, pơtơm bơ̆jang, Tơdrong jang rai 'lơ̆ng đơ̆ng lu sư pơm hơmet. Lu Sư hơmet ming hnam Kră Yang kiơ̆ thoi so păng pơm ming kơjăp hloh.

¹⁴Đang kơ lu sư pơm keh boih lu sư năm ba lu jên mă rơkah noh kơ pơtao păng Jêhôiada; lu sư yua lu jên noh pơm tơmam wă yua lăm Hnam Kră Yang, thoi wă pơyơ̆r tơmam soi 'buh, lu pơnhan chhĕr păng lu tơmam đe pơm păng hu maih. Đĭ lăm chăl Jêhôiada đe năm pơyơ̆r tơmam soi lăm Hnam Kră Yang ling-lang.

¹⁵Jêhôiada đĭ kră sơnăm đĭ lơ, sư arih đei minh-hrĕng pêng-jĭt sơnăm na Sư lôch.

¹⁶Đe 'bŭ sư hơdai hăm lu pơtao lăm Pơlei Đawit, yua kơ sư jang 'lơ̆ng tơgŭm lu bơngai Isơrael, bơ̆jang kơ Kră Yang 'Bok Kei-Dei păng đei pơdơ̆ng hơmet ming hnam akŭm Tơm Sư.

¹⁷Đơ̆ng rŏng kơ Jêhôiada lôch boih, lu yŏng pơgơ̆r bơngai Juđa năm kơkuh pơtơm pơtao. Na pơtao lui kiơ̆ nơ̆r lu sư pơhlŭ.

¹⁸Lu sư achăng lê̆ Hnam Kră Yang 'Bok Kei-Dei 'bok lu sư, na kơkuh kơ yang Asêra păng kơkuh kơ lu rup man; đơ̆ng tơdrong yoch 'nâu, na đei Kră Yang 'Bok Kei-Dei hil mĭl kơ lu bơngai Juđa păng kon pơlei Jêrusalem.

¹⁹Kră Yang wơh lu 'bok khan lê̆ adrol năm tơ lu sư, wă dui lu sư wih brŏk tơ Kră Yang; mă-lei lu sư ưh kơ wă mơ̆ng.

²⁰Yang Bơhngol 'lơ̆ng đơ̆ng Kră Yang 'Bok Kei-Dei pơdrŭt Sachari, kon drŏ-nglo Jêhôiada 'bok soi, sư iung dơ̆ng 'bơ̆t anăp lu kon pơlei na khan: “Kră Yang 'Bok Kei-Dei khan thoi âu: ‘Yua kơ kiơ lu iĕm ưh kơ kiơ̆ nơ̆r Kră Yang tơtă? Thoi noh lu iĕm ưh kơ đei pŭn hiôk ôh. Yua kơ lu iĕm achăng lê̆ Kră Yang boih păng Sư kư̆m achăng lê̆ lu iĕm.’ ”

²¹Lu sư hil plơ̆ kơ Sachari, kiơ̆ đơ̆ng pơtao athei klơ̆m pơlôch hăm tơmo 'bơ̆t cham Hnam Kră Yang.

²²Thoi noh, pơtao Jôas đĭ hiơt boih kơ Jêhôiada 'bă Sachari đei pơm 'lơ̆ng kơ sư, mă-lei sư pơlôch lê̆ kon Jêhôiada. 'Bơ̆t Sachari wă jê̆ lôch sư khan. “Hơpơi apinh Kră Yang lăng păng iung kơting.”

²³Lăp sơnăm noh wă jê̆ tôch, đei lu linh char Siri iung blah Jôas; lu bơngai năm blah truh tơ char Juđa păng pơlei Jêrusalem, pơlôch đĭ lu yŏng pơgơ̆r lăm kon pơlei păng chơ ba dôm tơmam mă đêl lu sư blah iŏk ăn kơ pơtao lu sư tơ Đamas.

²⁴Khŭl linh Siri năm blah lăp tŏ sĕt đĕch ră, mă-lei Kră Yang jao boih lu linh lơ noh lăm ti lu sư, yua kơ lu bơngai Juđa achăng lê̆ Kră Yang 'Bok Kei-Dei 'bok lu sư. Na lu sư rôp sek tơlang Jôas.

²⁵Wă lu linh Siri weh tơ nai boih, lê̆ Jôas đei rơka jrŭ dêh. Lu Yŏng bơ̆jang kơ sư pơđâu wă pơm kơnê̆ kơ sư, wă tơiung kơting pơm 'mong pham kơ kon drŏ-nglo Jêhôiada 'bok soi, na đe pơlôch hloi Jôas 'bơ̆t kơpal giơng tep sư; đe 'bŭ sư tơ lăm Pơlei Đawit, mă-lei ưh kơ 'bŭ hơdai lu pơtao.

²⁶Lu đe mă iung blah sư noh: Sabat kon drŏ-nglo yă Simêa bơngai Ammôn, Jêhôsabat, kon drŏ-nglo yă Simrit bơngai Môap.

²⁷Roi tơdrong lu kon drŏ-nglo sư, đei nơ̆r khan lê̆ adrol gah sư păng roi kơ tơdrong wă kơ pơm hơmet ming hnam Kră Yang, đei chih răk lăm sơ̆p hla bơar hơ'mon lu pơtao. Amasia kon drŏ-nglo sư pơgơ̆r pơtrơp đơ̆ng sư.