Read bahnar II Ho 26 Bible Online

II Ho 26 - bahnar bible

II Ho 26

¹Đĭ-đăng kon pơlei Juđa pôk Usia pơm pơtao pơgơ̆r pơtrơp 'bă sư Amasia, sư 'nao lăp mơjĭt-tơdrâu sơnăm.

²Đơ̆ng rŏng kơ 'bă sư lôch pơdơh wih hơdai lu 'bok sư, sư pơjing ming pơlei Êlat wă tơwih ăn kơ char Juđa.

³Usia 'nao lăp mơjĭt-tơdrâu sơnăm 'bơ̆t sư pơm pơtao, sư pơgơ̆r pơđăm-jĭt 'bar sơnăm tơ pơlei Jêrusalem; mĕ sư anăn Jêkôlia đơ̆ng pơlei Jêrusalem.

⁴Sư pơm tơdrong 'lơ̆ng tơpăt 'bơ̆t anăp Kră Yang, rok thoi 'bă sư Amasia đei pơm boih.

⁵Sư chă Kră Yang 'Bok Kei-Dei đĭ lăm chăl Sachari, bơngai bơtho sư băt hli yom kơ Kră Yang 'Bok Kei-Dei. Sư chă Kră Yang dang yơ Kră Yang 'Bok Kei-Dei ăn kơ sư đei hiôk jơnap dang noh.

⁶Sư iung tơblah hăm lu bơngai Philistin, blah tơlơ̆ dur pơlei Gat, blah pơchah dur Japnê păng dur Asdôt: Sư man pơdơ̆ng ming lơ pơlei lăm tơring Asdôt păng tơ anih nai lăm teh đak Philistin.

⁷Kră Yang 'Bok Kei-Dei tơgŭm sư kĕ jei blah lu kon pơlei Philistin, bơngai Arâp oei tơ lăm pơlei Gur Baal, klaih kơ noh lu bơngai Mêunit.

⁸Kon pơlei Ammôn kư̆m athei ra ăn jên kơ Usia; đe pơư kơ sư jơ̆p-jang đe ang kơ sư jơ̆p truh tơ dêh Êyiptơ, yua kơ sư rai pran kơtang tơpă.

⁹Usia kư̆m pơm tơiung lu hnam thôt lăm pơlei Jêrusalem, 'bơ̆t 'Măng Jang Mum, 'Măng Jang Thŭng, 'bơ̆t dur suăn pơm kơjăp hloh.

¹⁰Sư kư̆m pơm lơ hnam thôt tơ lăm tơmăn glă păng đei sir sơlŭng đak, yua kơ sư đei sem dơrong tơ kơpal groi tơ lăm thŭng glă; kư̆m đei lơ bơngai pơm mir, pơgar hơmu tơ kơpal kông groi păng tơ teh mơ̆r, pơtao sư 'maih jang mir 'ba.

¹¹Usia đei khŭl linh hơmet pơhrăm gơh năm tơblah, asong kơ khŭl năm kiơ̆ thoi bre Jêiêl bơngai chih hla bơar păng Maaseia yŏng jô̆ linh bơ̆jang ala kơ Hanania pơgơ̆r. Sư minh 'nu lăm yŏng pơgơ̆r bơ̆jang kơ pơtao.

¹²Jô̆ đĭ-đăng lu yŏng kơdră adrĕch 'bă, wă khan lu bơngai nuih pran đei 'bar-rơbâu tơdrâu-hrĕng 'nu.

¹³Lu sư pơgơ̆r khŭl linh đei pêng-hrĕng tơpơh-rơbâu pơđăm-hrĕng 'nu, lu bơngai nuih ngăl, wă tơgŭm pơtao tơblah hăm lu bơngai ayăt.

¹⁴Usia hơmet pơchĕp ăn kơ khŭl linh, khêl, đao tơju, môk mam, ao lŏ mam, hră păng 'brơ̆m tơmo wă prah.

¹⁵Lăm pơlei Jêrusalem pơtao athei lu bơngai hơgei hơjơ̆m pơm kơmăi wă prah 'brơ̆m păng prah tơmo tih, tah tơ rim hnam thôt păng tơ rim mum pơlei. Đe ư-ang kơ sư tơ jơ̆p dêh char tơ tơring ataih; yua kơ sư đei Kră Yang tơgŭm sư hlĭch chrơp tơpă dĭng sư pran kơtang tơpă.

¹⁶Wă sư pran kơtang boih jơhngơ̆m sư pơang truh tơ sư pơm yoch, pơm glăi hăm Kră Yang 'Bok Kei-Dei sư kơdih; sư mơ̆t lăm hnam Kră Yang, soh tơmam 'bâu phu 'bơ̆t chơnang 'bok soi juăt kơ soh tơmam 'bâu phu.

¹⁷'Bok soi Asaria hơdai hăm tơhngam-jĭt 'nu 'bok soi Kră Yang bơngai nuih kơtang mơ̆t kiơ̆ Sư.

¹⁸Lu sư găn pơma kơ pơtao Usia: “Ơ pơtao Usia, ih ưh kơ trŏ gơh soh ôh tơmam 'bâu phu ăn kơ Kră Yang, 'nâu tơdrong jang lu 'bok soi pơm, lu kon sâu Arôn, đei 'măn lê̆ lu sư phara rơgoh wă kơ lu sư soh tơmam 'bâu phu. Lĕch bĕ đơ̆ng lăm anih rơgoh 'nâu, ih pơm yoch boih, yua kơ ih pơm 'nâu ih ưh pă đei ư-ang đơ̆ng Kră Yang boih.”

¹⁹Usia hil, ti sư oei chĕp get wă soh tơmam 'bâu phu; kơplah sư hil dêh kơ lu 'bok soi, đei hloi jĭ chin lĕch 'bơ̆t klĕng sư tơm măt lu 'bok soi, lăm hnam Kră Yang 'bơ̆t jê̆ chơnang soh tơmam 'bâu phu.

²⁰Asaria 'bok soi tơm păng đĭ-đăng lu 'bok soi nai lăng tơ sư, 'bôh sư đei jĭ chin 'bơ̆t klĕng na tơlĕch hloi sư đơ̆ng lăm noh păng kơdih akâu sư kư̆m 'maih lĕch, yua kơ Kră Yang phak sư.

²¹Usia jĭ chin dĭng truh tơ sư lôch hloi; mưh jĭ chin athei oei hnam hơdrô̆ pha, ưh pă gơh mơ̆t lăm hnam Kră Yang dơ̆ng boih. Jôthan kon drŏ-nglo sư wei hnam pơtao păng pơgơ̆r kon pơlei pơla lăm char sư.

²²Dôm tơdrong jang nai pơtao Usia đơ̆ng blŭng-a truh tơ tôch đei Êsai 'bok khan lê̆ adrol kon drŏ-nglo Amôt chih răk.

²³Pơtao Usia lôch oei hơdai hăm 'bok yă, đe 'bŭ sư tơ bơsat lu pơtao jê̆ lu 'bok yă sư, đe khan; “sư jĭ chin.” Kon tơdăm sư Jôtham pơm pơtao pơtrơp sư.