Read bahnar II Ho 32 Bible Online

II Ho 32 - bahnar bible

II Ho 32

¹Đơ̆ng rŏng kơ lu tơdrong noh tơdrong mă Hesekia pơm 'lơ̆ng tơpăt noh, na Senacherip pơtao Asiri năm mơ̆t lăm char Juđa, wang lu pơlei tih kơjăp wă blah iŏk.

²Wă Hesekia 'bôh Senacherip năm wă kơ blah iŏk pơlei Jêrusalem,

³na sư krao akŭm lu yŏng pơgơ̆r păng lu bơngai yŏng linh nuih kơtang wă bơ̆ tu đak tơ 'nguaih kơ pơlei; đe noh tơgŭm sư mơ̆n.

⁴Kon pơlei đei akŭm băl lơ tơpă, bơ̆ găn lê̆ lu tu đak ro rok tơring păng khan: “Liơ lu bơ̆n lê̆ lu pơtao Asiri năm chă 'bôh đak lơ dêh?”

⁵Sư adrin, man tơiung ming dur mă đĭ păk hơlih lap gleh tơpă; hăm man lu hnam thôt kơpal noh! Sư kư̆m man minh tăl dur plơ̆ng tơ đaih kơ pơlei noh. Sư kư̆m man ming kơjăp Milô pơlei Đawit păng tuh hơjơ̆m lơ khêl đao tơmam tơblah.

⁶Sư kư̆m pơjao ăn chă yŏng linh wă pơgơ̆r wei-lăng kon pơlei na pơpôi akŭm lu sư hơdai lăm cham să 'bơ̆t 'măng jang pơlei, pơma pơlung hơtŏk jơhngơ̆m lu sư khan:

⁷“Athei chơ̆n jơhngơ̆m nuih pran, 'nĕ kơ hli, 'nĕ kơ tơrơ 'bơ̆t anăp pơtao Asiri păng 'bơ̆t anăp lu linh kiơ̆ sư yua kơ đei Kră Yang Tih Hloh oei hơdai bơ̆n pran hloh kơ lu bơngai oei hăm sư:

⁸Oei hăm lu sư noh kon bơngai hmă đĕch; bĕ gah bơ̆n đei Kră Yang 'Bok Kei-Dei lu bơ̆n wă tơgŭm păng tơblah tang lu bơ̆n.” Kon pơlei đei jơhngơ̆m nuih đơ̆ng nơ̆r Hesekia pơtao Juđa.

⁹Đang kơ noh, Senacherip, pơtao Asiri, hơdai hăm lu linh sư oei wang blah pơlei Lakis, kư̆m đei wơh lu Yŏng linh sư năm tơ pơtao Hesekia păng kon pơlei Juđa tơ pơlei Jêrusalem păng khan:

¹⁰“Senacherip, pơtao Asiri, khan: ‘Lu iĕm gơnang kơ tơdrong kiơ, mă oei pơjăng pơlei Jêrusalem mă nhôn wang tăp boih thoi noh!

¹¹Hăm trŏ Hesekia pơhlŭ pơlung wă jao iĕm pơngot rơhing na lôch dah kiơ? Sư khan: Kră Yang 'Bok Kei-Dei lu bơ̆n gô dŏng pơklaih lu bơ̆n đơ̆ng ti pơtao Asiri noh.

¹²Hăm trŏ kơ đơ̆ng Hesekia mă đei pơrăm lê̆ lu anih kơjung păng chơnang soi kơ Kră Yang păng krao pơtơm kon pơlei Juđa păng kon pơlei Jêrusalem khan: Lu iĕm athei kơkuh păng soh tơmam 'bâu phu 'bơ̆t anăp kơ minh pôm chơnang soi 'nâu đĕch?

¹³Lu iĕm ưh kơ băt hă tơdrong inh păng lu 'bok inh đei pơm kơ đĭ-đăng kon pơlei dêh char nai? Yang lu sư hăm gơh pơklaih char lu sư đơ̆ng ti inh?

¹⁴Lăng lăm lu yang dôm dêh char mă lu 'bok inh đei pơrăm đĭ boih, hăm đei yang bu mă gơh dŏng pơklaih kon pơlei sư đơ̆ng ti inh? Lei liơ mă iĕm hơmĕng dêh khan Kră Yang 'Bok Kei-Dei lu iĕm gơh dŏng pơklaih lu iĕm đơ̆ng ti inh?

¹⁵Thoi ei na, dang ei lê̆ pă ăn kơ Hesekia pơhlŭ lu iĕm, pơthơr chông lu iĕm, lu iĕm 'nĕ pă lui kơ sư, yua kơ ưh kơ đei yang char kiơ mă dêh ayơ gơh pơklaih kon pơlei sư đơ̆ng ti inh, dah đơ̆ng ti lu 'bok inh sơ̆; tơma kiơ Kră Yang 'Bok Kei-Dei lu iĕm khan gơh dŏng pơklaih lu iĕm đơ̆ng ti inh!’ ”

¹⁶Lu Yŏng linh Senacherip kang pơma kơnê̆ kơ Kră Yang 'Bok Kei-Dei păng Hesekia đĭch đam sư.

¹⁷Pơtao kư̆m chih hla bơar pơjăm Kră Yang 'Bok Kei-Dei Isơrael păng khan: “Lu yang lăm dêh char nai ưh kơ kĕ dŏng pơklaih kon pơlei char lu sư đơ̆ng ti inh kư̆m lei-lăi mơ̆n Kră Yang 'Bok Kei-Dei Hesekia kư̆m ưh kơ kĕ pơklaih kon pơlei sư đơ̆ng ti inh!”

¹⁸Lu sư ôr tơkĕch re hăm nơ̆r Hêbrơ khan kơ lu kon pơlei Jêrusalem oei tơ kơpal dur pơlei kơtơ̆ng, wă kơ lu sư hli tơrơ na blah iŏk pơlei.

¹⁹Lu sư khan kơ Kră Yang 'Bok Kei-Dei pơlei Jêrusalem thoi lu yang kon pơlei đơ̆ng ti kon bơngai pơm.

²⁰Pơtao Hesekia păng Êsai 'bok khan lê̆ adrol kon drŏ-nglo Amôt, krao khan kơ tơdrong 'nâu, krao khan ôr tŏk truh tơ plĕnh.

²¹Kră Yang ăn minh 'nu linh jang 'lơ̆ng năm pơlôch pơrăm lê̆ lu linh pran kơtang lu yŏng pơgơ̆r lu linh lăm kơđông pơtao Asiri. Pơm kơ pơtao kơdŭn wih brŏk tơ char sư kơdih, mơlâu pă băt. Kơplah sư mơ̆t tơ hnam yang sư, đei mơ'nah lăm lu kon drŏ-nglo sư iŏk đao pơlôch hloi sư tơ lăm noh.

²²Thoi noh Kră Yang pơklaih Hesekia păng kon pơlei lăm Jêrusalem đơ̆ng ti Senacherip pơtao Asiri păng đơ̆ng ti lu bơngai ayăt nai, ăn kơ lu sư hiôk-hian đơ̆ng puăn pah.

²³Đei lơ bơngai năm pơyơ̆r lu tơmam soi kơ Kră Yang păng năm ba pơyơ̆r ăn tơmam gĭt kơ Hesekia pơtao Juđa tơ pơlei Jêrusalem; iŏk đơ̆ng năr noh năm tơ anăp Hesekia đe ư-ang pơyom tơ jơ̆p-jang kơ dêh char.

²⁴Kơplah noh Hesekia đei tơdrong jĭ wă jê̆ lôch; sư krao khan apinh Kră Yang păng Kră Yang ăn kơ sư hlĭch tơpă.

²⁵Mă-lei Hesekia ưh kơ đei bơnê kơ Kră Yang mă đei ăn kơ sư boih yua kơ jơhngơ̆m sư pơang dêh; lei na Kră Yang hil mĭl hloi kơ sư hăm kon pơlei Juđa păng kon pơlei Jêrusalem.

²⁶Na Hesekia kư̆m wih tơjur akâu sư păng tơbral, kon pơlei Jêrusalem kư̆m lei-lăi, na lăm chăl Hesekia tơdrong Kră Yang hil mĭl ưh kơ đei truh tơ lu sư dơ̆ng.

²⁷Hesekia mơdrŏng mơng păng đei đe pơyom tơpă, sư đei man hnam mong hu, maih, tơmo gĭt, tơmam 'bâu phu, đei khêl păng lu đao hơlă tơmam tơblah 'lơ̆ng 'lơ̆ng.

²⁸Sư kư̆m pơm pơk tah phe 'ba, sik plei hơmu, đak rơmă ôliwơ păng pơm hơdrong chĭt lu sem dơrong, khŭl triu bơbe păng rơmo.

²⁹Sư kư̆m pơm lu pơlei tih kư̆m đei lơ lu rơmo, triu, bơbe, yua kơ Kră Yang 'Bok Kei-Dei ăn kơ sư lơ mŭk tơmam.

³⁰Hesekia 'nâu mơ̆n đei bơ̆ chĭt tu đak Gihôn na pơchoh lê̆ sư ro tơ gah bơmơ̆t cheng kơ Pơlei Đawit. Hesekia gơh đei jing ngăl lăm rim tơdrong jang sư.

³¹Kŭm thoi noh đei bơngai mă đơ̆ng pơtao Babilôn wơh athei năm apinh kơ tơdrong hlĭch mă đei truh tơ lăm char sư, kơplah Kră Yang 'Bok Kei-Dei oei achăng wă pơlong lăng sư wă kơ băt dôm tơdrong lăm jơhngơ̆m sư.

³²Dôm lu tơdrong jang nai Hesekia păng dôm lu tơdrong 'lơ̆ng sư pơm đei chih răk đĭ lăm sơ̆p hla bơar tơdrong tơ'bôh Êsai 'bok khan lê̆ adrol, kon drŏ-nglo Amôt păng kư̆m chih răk lăm Sơ̆p hla bơar lu pơtao Juđa păng pơtao Isơrael.

³³Hesekia lôch pơdơh hơdai hăm lu 'bok sư, đe 'bŭ sư tơ lăm bơsat kơpal groi lu kon sâu Đawit, đĭ-đăng bơngai Juđa păng kon pơlei Jêrusalem grong ư-ang kơ sư tih tơpă kơplah sư lôch Manase kon drŏ-nglo sư pơgơ̆r pơtrơp sư.