Read bahnar II Ho 33 Bible Online

II Ho 33 - bahnar bible

II Ho 33

¹Manase 'nao mơjĭt-'bar sơnăm kơplah sư pơm pơtao păng sư đei pơgơ̆r pơđăm-jĭt pơđăm sơnăm tơ pơlei Jêrusalem.

²Sư pơm tơdrong kơnê̆ 'bơ̆t anăp Kră Yang kiơ̆ lu tơdrong kơnê̆ krưp dêh lu kon pơlei pơla mă Kră Yang puh tơweh boih đơ̆ng anăp lu bơngai Isơrael.

³Sư man pơdơ̆ng ming dơ̆ng lu anih kơjung mă 'bă sư Hesekia đei pơrăm lê̆, pơm tơiung chơnang soi ăn kơ yang Baal păng man rup yang Asêra, kơkuh kơ đĭ-đăng lu khei sơnglŏng tơ plĕnh, drap păng kơkuh kơ lu tơmam noh.

⁴Sư man lu chơnang soi tơ lăm hnam Kră Yang, tơ anih mă Kră Yang đei khan: “Anăn inh gô oei lăm pơlei Jêrusalem ling-lang.”

⁵Sư kư̆m pơm chơnang soi ăn kơ lu khei sơnglŏng tơ plĕnh 'bơ̆t 'bar pah cham hnam Kră Yang.

⁶Sư 'buh pơyơ̆r kon drŏ-nglo sư pơm tơmam soi tơ lăm Thŭng Ben Hinôm sư chă tơdrong apo, lăng ti wă kơ băt adrol, chă lu pơjâu tơwir, kiơ̆ lu bơngai krao pơma dơnuh hăm atâu. Sư pơm yoch kơnê̆ rai dêh 'bơ̆t anăp Kră Yang pơm tơblĕk Sư.

⁷Sư tah rup yang đe traih lăm hnam Kră Yang tơ anih mă Kră Yang 'Bok Kei-Dei đei khan hăm Đawit păng Sôlômôn kon drŏ-nglo sư khan: “Lăm hnam 'nâu păng pơlei Jêrusalem pơlei, mă inh đei rơih iŏk boih đơ̆ng lăm adrĕch bơngai Isơrael, wă 'măn anăn Inh lăm âu ling-lang;

⁸Tơdah Isơrael rok kiơ̆ khôi juăt, nơ̆r tơtă pơkă athei mă Inh yua boih Môis bơtho khan kơ lu sư, lei Inh huay kơ toh lê̆ jơ̆ng lu sư đơ̆ng lăm teh đak mă Inh đei ăn boih kơ lu 'bok lu sư.”

⁹Mă-lei Manase pơhlŭ bơngai Juđa păng kon pơlei Jêrusalem dĭng mah lu sư pơm yoch kơnê̆ hloh kơ lu bơngai adrĕch mă Kră Yang pơrăm pơlôch đĭ 'bơ̆t anăp lu bơngai Isơrael.

¹⁰Kră Yang bơtho khan kơ Manase păng kon pơlei sư; mă-lei lu sư ưh kơ wă mơ̆ng.

¹¹Na Kră Yang ăn kơ lu yŏng linh, pơtao Asiri năm wang rôp Manase, chô̆ sư hăm tơlei glang păng tôt muh sư, na chông ba tơ dêh char Babilôn.

¹²Kơplah sư đei tơdrong gleh truh pơmat-tat, na sư krao apinh Kră Yang 'Bok Kei-Dei sư păng tơjur akâu tơbral tơpă 'bơ̆t anăp Kră Yang 'Bok Kei-Dei lu 'bok sư.

¹³Manase krao apinh Kră Yang, Sư tơl tơwih nơ̆r Manase apinh păng mơ̆ng nơ̆r sư krao na chông tơbrŏk tơ Jêrusalem pơdrâu ăn dêh char sư kơdih; kơplah noh hloi Manase băt kơ Kră Yang 'Bok Kei-Dei sư.

¹⁴Đơ̆ng rŏng kơ lu tơdrong noh, sư man tơiung ming dur đaih Pơlei Đawit, gah bơmơ̆t kơ tu đak Gihôn lăm Thŭng truh tơ 'Măng Jang Ka, dăr kơ Ôphel, sư man dur kơjung hloh, ăn kơ lu yŏng linh wei tơ lăm rim pơlei kơjăp lăm char Juđa.

¹⁵Sư hŭt lê̆ đĭ lu rup yang đơ̆ng lăm hnam Kră Yang dôm lu rup yang bơngai tơmoi păng chơnang soi mă đêl sư đei man tơ groi hnam Kră Yang tơ pơlei Jêrusalem, sư klơ̆m hŭt đĭ tơ 'nguaih pơlei.

¹⁶Na sư hơmet pơm ming chơnang soi kơ Kră Yang, pơyơ̆r tơmam soi kơ tơdrong rơnŭk rơnua păng tơmam soi 'blŏk bơnê tơ noh; sư bơtho athei lu kon pơlei Juđa lui gơnang kơ Kră Yang 'Bok Kei-Dei Isơrael.

¹⁷Kon pơlei kư̆m oei pơyơ̆r tơmam soi tơ anih kơjung noh, mă-lei pơyơ̆r tơmam soi ăn kơ Kră Yang 'Bok Kei-Dei lu sư đĕch.

¹⁸Dôm lu tơdrong jang nai Manase, nơ̆r sư krao apinh Kră Yang 'Bok Kei-Dei, lu nơ̆r 'bok khan lê̆ adrol hăm anăn Kră Yang 'Bok Kei-Dei Isơrael khan kơ pơtao chih răk lê̆ lăm sơ̆p hla bơar lu pơtao Isơrael.

¹⁹Nơ̆r sư krao apinh Kră Yang 'Bok Kei-Dei đei tơl tơwih ăn kơ sư thoi yơ, dôm lu tơdrong yoch kơnê̆ mă sư đei pơm, lu anih kơjung mă sư đei pơm, man rup yang Asêria păng traih rup yang adrol kơ sư tam mă tơbral tơjur akâu sư, âu đei chih răk đĭ tơ lăm sơ̆p hla bơar Hôsai.

²⁰Manase lôch, pơdơh oei hơdai hăm lu 'bok sư, 'bŭ sư lăm anih pơtao sư; Ammôn kon drŏ-nglo sư, pơm pơtao pơtrơp sư.

²¹Ammôn sư 'nao lăp 'bar-jĭt 'bar sơnăm kơplah sư pơm pơtao; sư pơgơ̆r 'bar sơnăm lăm pơlei Jêrusalem.

²²Sư pơm tơdrong kơnê̆ tơpă 'bơ̆t anăp Kră Yang nhen thoi Manase, 'bă sư đei pơm boih, kơkuh pơyơ̆r kơ lu rup yang đe man dah traih mă 'bă sư Manase đei pơm păng kơkuh kơ lu yang rup noh.

²³Mă-lei sư ưh kơ đei tơbral tơjur akâu kơdih 'bơ̆t anăp Kră Yang thoi Manase, 'bă sư, rai pơm kơnê̆ hloh.

²⁴Lu yŏng jang kơ sư chă đon wă pơm kơ sư, na pơlôch hloi sư kơtă lăm hnam pơtao.

²⁵Na lu kon pơlei kư̆m rôp pơlôch hloi lu bơngai pơlôch pơtao Ammôn; na pôk hloi Jôsia, kon drŏ-nglo sư pơm pơtao pơtrơp sư.