Read bahnar II Ho 34 Bible Online

II Ho 34 - bahnar bible

II Ho 34

¹Jôsia 'nao lăp tơhngam sơnăm 'bơ̆t kơplah đe pôk sư pơm pơtao păng sư pơgơ̆r đei pêng-jĭt mônh sơnăm lăm pơlei Jêrusalem.

²Sư pơm 'lơ̆ng 'bơ̆t anăp Kră Yang, kiơ̆ trong Đawit, 'bok sư, ưh kơ weh gah 'ngiĕo dah gah 'ma.

³Sơnăm mă tơhngam lăm chăl sư pơgơ̆r, mă sư oei 'lơ̆p mơlôh, sư pơtơm chơchă Kră Yang 'Bok Kei-Dei Đawit, 'bok sư Sơnăm mă mơjĭt-'bar, sư pơtơm hơmet rơgoh lăm char Juđa păng pơlei Jêrusalem, hŭt lê̆ lu anih kơjung, gơ̆ng kơkuh kơ rup yang Asêria, rup yang đe traih păng rup đe hling tuh.

⁴Đe teh pơchah lê̆ đĭ lu chơnang soi kơ lu rup yang Baal 'bơ̆t anăp sư, teh pơchah pơhĕch lu chơnang soh 'long 'bâu phu kơpal chơnang soi noh; lu rup yang Asêria, rup yang đe traih păng rup yang đe hling tuh, teh tơgơ̆ tơpơ̆k lê̆, teh pơhĕch, na iŏk prôi tơ kơpal bơsat lu bơngai lôch mă đêl soi sơn ah kơ sư păng pơm rup yang noh.

⁵Sư kư̆m iŏk kơting lu 'bok soi na soh rŭk tơ kơpal lu chơnang mă lu sư juăt kơ soi kơ lu yang noh, na hơmet rơgoh char Juđa păng Jêrusalem.

⁶Lăm pơlei adrĕch Manase, Êphraim păng pơlei Simêôn, truh tơ lu pơlei adrĕch Naptali, anih mă đĭ juơ tăp dăr.

⁷Sư teh pơrăm lê̆ lu chơnang soi lu gơ̆ng rup yang Asêria, teh pơchah lê̆ lu gơ̆ng đe pơm yang jơ̆p kơ tơring char Isơrael, na sư wih brŏk tơ pơlei Jêrusalem.

⁸Lăm sơnăm mă mơjĭt-tơhngam chăl sư pơgơ̆r, đang kơ sư hơmet tơring char păng hnam akŭm rơgoh boih, na sư wơh Saphan kon drŏ-nglo Asalia, Maaseia bơngai pơgơ̆r pơlei tih păng Jôa kon drŏ-nglo Jêhôahas bơngai chih răk dôm tơdrong truh, wă pơm pơdơ̆ng ming Hnam Kră Yang 'Bok Kei-Dei sư.

⁹Lu đe noh năm tơ Hilkia 'bok soi tơm, jao ăn kơ sư jên đe pơyơ̆r kơ Kră Yang 'Bok Kei-Dei, wă khan lu jên kăk bơngai Lêwi lu bơngai wei 'măng jang mă đei iŏk bơih đơ̆ng ti lu bơngai Manase, bơngai Êphraim păng lu bơngai mă oei arih lăm lu bơngai Isơrael, kư̆m iŏk đơ̆ng lu bơngai Juđa, Bênjamin păng đơ̆ng lu kon pơlei oei lăm pơlei Jêrusalem.

¹⁰Lu sư jao jên noh kơ lu bơngai wei-lăng tơdrong jang lăm Hnam Kră Yang; lu sư apah thơ̆ wă pơm hơmet ming hnam akŭm Kră Yang.

¹¹Sư kư̆m jao kơthơ jang 'long, thơ̆ man wă apah răt tơmo tơpei, lu 'long pơm tơpang tơpơng, jrăng hnam mă đêl lu pơtao Juđa lê̆ hiah răm.

¹²Lu bơngai thơ̆ noh jang đĭ jơhngơ̆m. Lu kai wei-lăng lu thơ̆ noh Jahat, Ôbađia, bơngai Lêwi adrĕch Mêrari; Sachari păng Mêsulam đơ̆ng lăm adrĕch Kôhat. Kŭm đei lu bơngai Lêwi nai hai, lu bơngai gơh reh brŏ hơgei.

¹³Lu bơngai 'nâu wei-lăng lu bơngai jang păng wei-lăng tôm tơdrong jang; lu mơ'nah bơngai Lêwi chih hla bơar, lu kai păng lu bơngai gak 'măng.

¹⁴Kơplah lu sư ba jên đơ̆ng đe pơyơ̆r kơ hnam Kră Yang bơih, na Hilkia 'bok soi tơm sư 'bôh sơ̆p hla bơar khôi juăt Kră Yang ăn kơ Môis.

¹⁵Hilkia khan kơ Saphan bơngai chih hla bơar: “Inh đei 'bôh hla bơar khôi juăt lăm Hnam Kră Yang.” Hilkia ăn Sơ̆p hla bơar khôi juăt noh kơ Saphan.

¹⁶Saphan chĕp ba sơ̆p hla bơar khôi juăt ăn kơ pơtao, na khan kơ pơtao: “Dôm tơdrong jang mă ih đei pơjao ăn kơ lu yŏng pơgơ̆r dang ei lu sư oei jang.

¹⁷Lu sư iŏk ba bơih lu jên mă đơ̆ng lăm hnam Kră Yang păng kư̆m đei jao ăn bơih kơ bơngai wei-lăng jang păng lu bơngai jang.

¹⁸Saphan bơngai chih hla bơar khan dơ̆ng kơ pơtao: “Hilkia 'bok soi tơm đei jao kơ inh sơ̆p hla bơar khôi juăt.” Saphan đŏk hloi 'bơ̆t anăp pơtao.

¹⁹Wă pơtao kơtơ̆ng nơ̆r đơ̆ng lăm sơ̆p hla bơar khôi juăt noh Sư hek hloi ao sư.

²⁰Pơtao athei Hilkia, Ahikam kon drŏ-nglo Saphan, Apđôn kon drŏ-nglo Mika. Saphan bơngai chih hla bơar păng Asaia bơngai kơiĕng pơtao khan:

²¹“Năm krao apinh bĕ Kră Yang kơ inh kơ lu bơngai Isơrael oei arih hlot păng lu bơngai Juđa gah dôm nơ̆r mă đei chih lăm sơ̆p hla bơar mă 'nao 'bôh âu khan; kơ tơdrong Kră Yang hil mĭl mă truh tơ lu bơ̆n tih tơpă, yua kơ lu 'bok bơ̆n sơ̆ ưh kơ wă mơ̆ng păng ưh kơ chu kiơ̆ nơ̆r Kră Yang, kư̆m kuă kơ pơm kiơ̆ nơ̆r mă đei chih lăm sơ̆p hla bơar âu.”

²²Hilkia păng lu bơngai mă pơtao đei wơh năm tơ'bơ̆p Hulda yă khan lê̆ adrol, akăn Sallum bơngai wei-lăng ao giĕng, Sư kon drŏ-nglo Tôkhat, Sâu Hasra; yă Hulda sư oei lăm Tơring mă 'bar lăm pơlei tih Jêrusalem; lu sư khan kơ yă ei kiơ̆ thoi nơ̆r pơtao đei tơtă.

²³Yă ei khan kơ lu sư: “Kră Yang 'Bok Kei-Dei Isơrael khan: ‘Roi bĕ kơ bơngai mă wơh ih năm tơ inh:

²⁴Kră Yang khan: Inh wă ăn tơdrong răm truh tơ anih 'nâu păng tơ lu kon pơlei mă oei lăm anih âu, đĭ-đăng nơ̆r hiap pơtê̆ mă đei chih boih lăm sơ̆p hla bơar mă đei đŏk boih 'bơ̆t anăp pơtao Juđa.

²⁵Yua kơ lu sư achăng lê̆ Inh boih, soh 'long 'bâu phu kơ yang nai, yua dôm tơdrong đơ̆ng ti lu sư pơm na tơblĕk Inh; lei na Inh gô tuh tơdrong Inh hil mĭl tơ anih 'nâu, ưh kơ đei layơ ngach.’

²⁶Roi bĕ kơ pơtao Juđa mă wơh ih năm krao apinh Kră Yang, dôm nơ̆r ih đei kơtơ̆ng 'nâu, Kră Yang Isơrael khan thoi noh.

²⁷‘Yua kơ ih đei jơhngơ̆m rơmuăn tơjur akâu kơdih 'bơ̆t anăp Kră Yang 'Bok Kei-Dei wă ih kơtơ̆ng nơ̆r Sư khan wă hil phak anih 'nâu păng kơ kon pơlei oei lăm âu, ih tơjur boih akâu 'bơ̆t anăp Inh, hek ao păng nhơ̆m hmoi 'bơ̆t anăp Inh, Inh kư̆m kơtơ̆ng boih nơ̆r ih,’ Kră Yang khan.

²⁸‘Âu Inh gô ăn kơ ih wih oei hơdai hăm lu 'bok ih, đe gô 'bŭ ih hiôk-hian păng măt ih pă đei 'bôh boih dôm tơdrong gleh truh mă Inh wă pơm kơ anih 'nâu hăm kon pơlei oei lăm âu.’ ” Lu đe noh năm roi ăn kơ pơtao nơ̆r noh.

²⁹Pơtao athei akŭm pơđĭ lu kră lăm Juđa păng pơlei Jêrusalem.

³⁰Pơtao tŏk năm tơ Hnam Kră Yang hơdai hăm đĭ-đăng lu drŏ-nglo bơngai Juđa, lu bơngai đơ̆ng lăm pơlei Jêrusalem, lu 'bok soi lu bơngai Lêwi, đĭ-đăng kon pơlei 'lơ̆p 'lŏ năm kiơ̆, Pơtao đŏk ăn kơ lu sư mơ̆ng nơ̆r đơ̆ng sơ̆p hla bơar tơdrong pơgơ̆p đei 'bôh đơ̆ng lăm Hnam Kră Yang.

³¹Pơtao dơ̆ng 'bơ̆t anih sư, pơm tơdrong pơgơ̆p dơ̆ng 'bơ̆t anăp Kră Yang, pơkă pơkăm kiơ̆ Kră Yang đĭ jơhngơ̆m klơm klak wei răk nơ̆r tơtă, tơdrong pơkă khan păng khôi juăt, wă pơm kiơ̆ trŏ thoi nơ̆r pơgơ̆p mă đei chih lăm sơ̆p hla bơar âu.

³²Sư kư̆m athei lu bơngai oei lăm pơlei Jêrusalem păng bơngai Bênjamin kư̆m pơkă pơm kiơ̆ tơdrong pơgơ̆p noh. Na lu kon pơlei Jêrusalem pơm kiơ̆ tơdrong pơgơ̆p Kră Yang 'Bok Kei-Dei, mă Kră Yang 'Bok Kei-Dei 'bok lu sư.

³³Jôsia iŏk hŭt lê̆ đĭ dôm rup yang kơnê̆ 'mê̆ Krưp đơ̆ng lăm tơring char Isơrael păng athei đĭ-đăng kon pơlei oei lăm tơring char Isơrael kơkuh gơnang kơ Kră Yang 'Bok Kei-Dei. Lăm đĭ chăl pơtao lu kon pơlei ưh kơ achăng lê̆ Kră Yang, 'Bok Kei-Dei 'bok lu sư.