Read bahnar II Ho 35 Bible Online

II Ho 35 - bahnar bible

II Ho 35

¹Jôsia pơm giĕng Năm Brih 'blŏk hơdơ̆r kơ Kră Yang tơ pơlei Jêrusalem; năr mơjĭt-puăn khei mônh lu sư 'bet pơlôch, triu pơm giĕng Năm Brih

²pơtao sư jao ăn tơdrong jang kơ rim 'nu 'bok soi, pơlung lu sư kơ tơdrong jang lăm Hnam Kră Yang.

³Sư khan kơ lu bơngai Lêwi, bơngai mă bơtho kơ đĭ-đăng kon pơlei Isơrael, bơngai Lêwi mă đe 'măn rơgoh 'lơ̆ng ăn kơ Kră Yang: Năm tah bĕ Hom 'Lơ̆ng Rơgoh tơ lăm hnam Kră Yang mă Sôlômôn kon drŏ-nglo Đawit, pơtao Isơrael đei pơm; lu iĕm huay pă tung hom noh kơpal hơngiĕng dơ̆ng. Dang ei năm bơ̆jang bĕ kơ Kră Yang 'Bok Kei-Dei lu iĕm păng kon pơlei Sư Isơrael.

⁴Hơmet bĕ lu iĕm kơdih kiơ̆ kơ adrĕch 'bok lu iĕm, kiơ̆ kơ khŭl lu iĕm, kiơ̆ mă Đawit pơtao Isơrael păng Sôlômôn kon drŏ-nglo sư đei chih tơtă boih.

⁵Oei dơ̆ng bĕ lăm anih rơgoh, hơdai hăm lu bơngai Lêwi săp pơrĕng kiơ̆ kơ khŭl hnam dơnŏ bơngai Isơrael,

⁶'Bet triu pơm tơmam soi Năm Brih athei hơmet akâu iĕm rơgoh, hơmet 'nhĕm triu ăn kơ lu 'nhŏng oh iĕm wă pơm kiơ̆ trŏ thoi nơ̆r Kră Yang đei yua Môis khan tơbăt.

⁷Jôsia iŏk Sem dơrong sư kơdih asong ăn kơ lu kon pơlei, pêng-jĭt rơbâu tŏ triu păng bơbe, pơm tơmam soi Năm brih, kư̆m ăn pêng-rơbâu tŏ rơmo tơno, wă ăn kơ lu bơngai mă đei năm akŭm pơm giĕng Năm Brih noh.

⁸Lu yŏng pơgơ̆r kư̆m đei jơhngơ̆m wă asong kon sem pơm tơmam soi pơyơ̆r ăn kơ kon pơlei, ăn kơ lu 'bok soi păng lu bơngai Lêwi. Hilkia, Sachari păng Jêhiêl lu kră wei-lăng Hnam Kră Yang 'Bok Kei-Dei ăn kơ lu 'bok soi 'bar-rơbâu tơdrâu-hrĕng tŏ triu bơbe pơm tơmam soi Năm Brih păng pêng-hrĕng tŏ rơmo wă sa lăm năr giĕng Năm Brih.

⁹Kônania, Semaia, Nêthanel, 'nhŏng oh sư, Hasabia, Jêiêl păng Jôsabat lu kră pơgơ̆r bơngai Lêwi ăn pơđăm-rơbâu tŏ triu bơbe pơm tơmam soi Năm Brih păng pơđăm-hrĕng tŏ rơmo wă ăn kơ bơngai sa lăm năr giĕng Năm Brih.

¹⁰Tơdrong jang hơmet lê̆ đang boih, lu 'bok soi lu sư dơ̆ng 'bơ̆t anih lu sư kơdih păng lu bơngai Lêwi kiơ̆ kơ khŭl lu sư thoi nơ̆r pơtao tơtă.

¹¹Lu sư 'bet pơlôch triu pơm tơmam soi pơyơ̆r giĕng Năm Brih, na lu 'bok soi iŏk pham đơ̆ng ti lu sư na tơtreh; lu bơngai Lêwi nai lŏng akar lu kon sem tơmam soi noh.

¹²Lu sư 'măn lê̆ lu tơmam soi 'buh phara, wă klah asong ăn kơ kon pơlei, kiơ̆ kơ khŭl adrĕch, 'bă lu sư wă soi pơyơ̆r ăn kơ Kră Yang kiơ̆ thoi đei chih boih lăm sơ̆p hla bơar Môis: Lu sư kư̆m yua lu rơmo pơm 'nhĕm sa lei-lăi mơ̆n.

¹³Kiơ̆ kơ tơdrong juăt, lu sư phang lu 'nhĕm kon triu kơ giĕng Năm Brih thoi đei tơtă; bĕ lu 'nhĕm 'lơ̆ng rơgoh đe pai lăm gŏ 'bŭng păng lăm gŏ glah, na lu sư asong ăn hloi kơ đĭ-đăng bơngai.

¹⁴Đơ̆ng noh, lu sư hơmet 'nhĕm sĕch kơ lu sư kơdih păng kơ lu 'bok soi, yua kơ lu 'bok soi noh, lu sư kon sâu Arôn oei hiơ̆k kơ pơyơ̆r tơmam soi 'buh pơkhôi păng rơmă dĭng truh kơmăng. Thoi ei na lu bơngai Lêwi athei hơmet tơmam sa kơ lu sư kơdih păng lu 'bok soi lu kon sâu Arôn.

¹⁵Lu bơngai hơri, kon sâu Asap; Hêman păng Jêđuthun, 'bok 'bôh lê̆ adrol pơtao, kư̆m oei dơ̆ng lăm anih lu sư kơdih, kiơ̆ thoi tơdrong juăt Đawit tơtă; lu bơngai gak wei 'măng jang kư̆m ngôi tơ rim 'măng, ưh kơ weh đơ̆ng tơdrong jang sư kơdih, yua kơ 'nhŏng oh lu sư bơngai Lêwi đei hơmet ăn boih tơmam sa kơ lu sư.

¹⁶Na lăm năr noh tơdrong akŭm kơkuh kơ Kră Yang đei hơmet 'lơ̆ng boih wă pơm giĕng 'blŏk hơdơ̆r kơ năr Năm Brih, wă pơyơ̆r tơmam soi 'buh pơkhôi tơ kơpal chơnang soi Kră Yang kiơ̆ thoi nơ̆r pơtao Jôsia đei tơtă.

¹⁷Đĭ lu kon pơlei Isơrael đei tơ noh, pơm giĕng Năm Brih minh năr păng pơm giĕng sa 'Bĕng ưh kơ đei 'Buih Pông lăm tơpơh năr.

¹⁸Đơ̆ng chăl Samuel 'bok khan lê̆ adrol, lăm bơngai Isơrael đe ưh tam đei pơm giĕng Năm Brih tih thoi noh; păng kư̆m ưh kơ đei pơtao ayơ lăm Isơrael mă pơm 'blŏk hơdơ̆r năr giĕng Năm Brih thoi pơtao Jôsia, hăm lu 'bok soi bơngai Lêwi, đĭ kon pơlei Juđa păng Isơrael mă đei tơ noh păng kon pơlei đơ̆ng Jêrusalem đei pơm noh.

¹⁹Đe pơm giĕng Năm Brih lăm sơnăm mơjĭt-tơhngam chăl pơtao Jôsia pơgơ̆r.

²⁰Đơ̆ng rŏng đĭ kơ tơdrong 'lơ̆ng noh, đang kơ Jôsia hơmet Hnam Kră Yang boih, na Nêkô pơtao đe Êyiptơ tŏk blah tơ pơlei Karchêmis cheng đak Krong Ơphrat; Jôsia năm găn blah lu sư.

²¹Nêkô wơh bơngai năm khan kơ Jôsia: “Ơ pơtao đe Juđa, inh hăm ih hăm đei tơdrong kiơ? Năr 'nâu inh ưh kơ sĭ năm wă blah ih ôh, mă-lei năm blah lu bơngai ayăt hăm dêh char nhôn. Kră Yang 'Bok Kei-Dei khan kơ inh jah mă tĕnh; lei pơdơh bĕ, 'nĕ pă tơblah hăm Kră Yang 'Bok Kei-Dei, Tơ'ngla mă oei hơdai inh, hli kơnh Sư pơlôch pơrăm ih.”

²²Mă-lei, Jôsia ưh kơ kơdŭn tơ rŏng, ưh kơ wă mơ̆ng nơ̆r Kră Yang đei yua Nêkô roi tơbăt; sư rai hơmet hrŭk hơbĕn ao tơwơ̆l năm tơ anăp tơblah hăm Nêkô; lu sư tơblah băl tơ lăm Thŭng Mêgiđô.

²³Lu linh chĕp hră prah 'bơm hloi pơtao Jôsia, Jôsia khan kơ yŏng linh wei sư: “Tung ba inh weh đơ̆ng âu bĕ, yua kơ inh 'bơm 'brơ̆m hră boih rơka jrŭ dêh.”

²⁴Lu yŏng linh sư pôk iŏk sư đơ̆ng gre aseh sư, ba sư hăm gre aseh nai, na chơ ba sư brŏk tơ pơlei Jêrusalem. Sư lôch, đe 'bŭ sư hơdai hăm bơsat lu 'bok sư. Đĭ bơngai Juđa păng bơngai lăm pơlei Jêrusalem grong nhơ̆m hmoi kơ sư.

²⁵Jêrêmi pơm 'bai hơri nhơ̆m hmoi kơ Jôsia; kư̆m đei lu bơngai drŏ-nglo, drŏ-kăn oei hơri pôk kơ pơtao Jôsia dĭng truh dang ei; tơdrong hơri nhơ̆m hmoi jing juăt tơ lăm lu bơngai Isơrael; 'nâu tơdrong hơri noh đe chih răk tơ lăm sơ̆p hla bơar nhơ̆m hmoi.

²⁶Dôm lu tơdrong jang nai Jôsia đei pơm păng dôm lu tơdrong jang 'lơ̆ng mă sư pơm kiơ̆ kơ đei chih lăm sơ̆p hla bơar khôi juăt Kră Yang.

²⁷Tơdrong jang sư đơ̆ng blŭng-a truh tơ tôch, đei chih răk boih tơ lăm sơ̆p hla bơar lu pơtao Isơrael păng pơtao Juđa.