Read bahnar II Ho 36 Bible Online

II Ho 36 - bahnar bible

II Ho 36

¹Kon pơlei tơring ei, pôk Jêhôahas, kon drŏ-nglo Jôsia pơm pơtao pơtrơp đơ̆ng 'bă sư tơ pơlei Jêrusalem.

²Jêhôahas 'nao 'bar-jĭt pêng sơnăm 'bơ̆t năr đe pôk sư pơm pơtao păng sư pơgơ̆r lăp pêng khei tơ pơlei Jêrusalem.

³Pơtao Êyiptơ tơjur lê̆ Jêhôahas đơ̆ng pơm pơtao pơlei Jêrusalem păng phak dêh char Juđa ra pêng tân puăn-hrĕng kĭ jên hu păng pêng-jĭt puăn kĭ maih.

⁴Pơtao Êyiptơ pôk Jêhôahas, oh Êliakim pơm pơtao đe Juđa tơ Jêrusalem păng krao tơplih anăn sư jing Jêhôiakim. Pơtao Nêkô rôp Êliakim 'nhŏng Jêhôahas, chông ba tơ dêh char Êyiptơ.

⁵Jêhôiakim 'nao 'bar-jĭt pơđăm sơnăm kơplah sư pơm pơtao; sư pơgơ̆r mơjĭt-mônh sơnăm tơ pơlei Jêrusalem păng sư pơm tơdrong kơnê̆ 'bơ̆t anăp Kră Yang 'Bok Kei-Dei sư.

⁶Nebukatnessar pơtao char Babilôn tŏk blah sư, rôp chô̆ sư hăm glang kong chông ba sư tơ dêh char Babilôn.

⁷Nebukatnessar kư̆m blah iŏk lu tơmam đơ̆ng lăm Hnam Kră Yang chĕp ba tah tơ lăm hnam pơtao sư tơ Babilôn.

⁸Lu tơdrong jang nai dơ̆ng Jêhôiakim đei pơm, dôm lu tơdrong kơnê̆ 'mê̆ brư̆ sư pơm, đĭ dôm tơdrong đei chih răk lăm sơ̆p hla bơar pơtao Isơrael păng Juđa. Jêhôiachin kon drŏ-nglo sư pơm pơtao pơtrơp sư.

⁹Jêhôiachin 'nao mơjĭt-tơhngam sơnăm kơplah đe pôk sư pơm pơtao, sư pơgơ̆r lăp pêng khei mơjĭt năr tơ pơlei Jêrusalem. Sư pơm tơdrong kơnê̆ 'bơ̆t anăp Kră Yang.

¹⁰Truh lăm bơyan puih, pơtao Nebukatnessar wơh đe năm rôp chông ba sư tơ dêh char Babilôn, kư̆m iŏk dôm tơmam 'lơ̆ng gĭt đơ̆ng lăm Hnam Kră Yang, na pôk Sêdêkia ma sư pơm pơtao pơgơ̆r dêh char Juđa păng pơlei Jêrusalem.

¹¹Sêdêkia 'nao 'bar-jĭt mônh sơnăm kơplah đe pôk sư pơm pơtao păng sư pơgơ̆r mơjĭt-mônh sơnăm lăm pơlei Jêrusalem.

¹²Sư pơm tơdrong kơnê̆ dêh 'bơ̆t anăp Kră Yang 'Bok Kei-Dei sư, ưh kơ wă tơjur akâu 'bơ̆t anăp Jêrêmi 'bok khan lê̆ adrol nơ̆r đơ̆ng Kră Yang

¹³Sư kư̆m iung blah pơtao Nebukatnessar, bơngai mă athei sư pơkă yua anăn Kră Yang 'Bok Kei-Dei. Sư jing kơchu arăng kơ̆l, ưh kơ wă wih tơ Kră Yang 'Bok Kei-Dei Isơrael.

¹⁴Hloh kơ noh dơ̆ng, lu đei 'bok soi păng lu kon pơlei rai kiơ̆ lu tơdrong kơnê̆ 'mê̆ brư̆ thoi lu bơngai tơmoi lăm dêh char jum dăr lu sư, pơm pơ'mê̆ kơ hnam Kră Yang mă Sư đei rơih iŏk 'măn lê̆ rơgoh lăm pơlei Jêrusalem.

¹⁵Kră Yang 'Bok Kei-Dei 'bok lu sư đei lơ wơ̆t wơh bơngai pơtruh nơ̆r Sư bơtho khan ling-lang, yua kơ Sư 'mêm mơnat kơ kon pơlei pơla Sư păng hnam Sư oei.

¹⁶Mă-lei lu sư hiap lu bơngai đơ̆ng Kră Yang 'Bok Kei-Dei, ưh kơ wă mơ̆ng pơdê nơ̆r Kră Yang 'Bok Kei-Dei, pơjăm lu bơngai khan lê̆ adrol Kră Yang dĭng mah Kră Yang hil mĭl phak kon pơlei Sư, ưh pă gơh hơmet ming liơ.

¹⁷Kră Yang 'Bok Kei-Dei ăn pơtao bơngai Babilôn, iŏk đao gưm pơlôch lu kon tơdăm lăm anih rơgoh lu sư, ưh pă 'mêm mơnat kơ bu, tơdăm dah adruh 'lơ̆p, kră mă pă kĕ. Kră Yang 'Bok Kei-Dei jao đĭ lu sư lăm ti pơtao Babilôn.a

¹⁸Pơtao iŏk đĭ lu tơmam yua đơ̆ng lăm Hnam Kră Yang 'Bok Kei-Dei, tih dah iĕ lu tơmam gĭt lăm Hnam Kră Yang, lu tơmam gĭt pơtao păng tơmam gĭt lu yŏng pơgơ̆r, iŏk đĭ chĕp ba tơ dêh char Babilôn.

¹⁹Lu linh Babilôn soh hnam Kră Yang 'Bok Kei-Dei, teh pơchah lê̆ dur pơlei Jêrusalem, soh đĭ hnam pơtao păng pơrăm đĭ lu tơmam kăl yua lăm pơlei.

²⁰Lu bơngai mă oei arih klaih đơ̆ng đao gưm, đe rôp chông ba pơm bơnă tơ char Babilôn; lu sư pơm đĭch đam kơ pơtao hăm kơ lu kon sâu sư dĭng truh tơ chăl pơtao dêh Persia pơgơ̆r,

²¹Tơdrong 'nâu truh wă pơsĭt kơ nơ̆r Kră Yang khan mă đơ̆ng Jêrêmi 'bok khan lê̆ adrol roi tơbăt. Dĭng truh tơ dêh char đei pơdơh lu sơnăm Sa'bat kiơ̆ kơ Kră Yang 'Bok Kei-Dei đei pơkă boih, đĭ-đăng lăm dêh char pơdơh sơnăm Sa'bat tơtŭng rơhiăng đĭ juơ, dĭng truh tơ tôm tơpơh-jĭt sơnăm.

²²Lăm sơnăm blŭng-a chăl Sirus pơm pơtao Persia, Kră Yang wă pơsĭt nơ̆r Sư mă Jêrêmi đei khan adrol boih, Kră Yang pơm ăn kơ jơhngơ̆m Sirus pơtao Persia, wă kơ sư roi tơbăt tơ jơ̆p-jang teh đak sư, hăm chih hla bơar roi tơbăt khan:

²³Sirus pơtao Phersia khan: “Kră Yang 'Bok Kei-Dei kơpal plĕnh đei ăn boih kơ inh pơgơ̆r dêh char lăm teh đak âu, Sư athei wă kơ inh man pơjing Hnam Akŭm tih kơ Sư tơ pơlei Jêrusalem lăm char Juđa. Lăm lu iĕm, bu mă kon pơlei pơla Sư, năm bĕ tơ pơlei Jêrusalem; hơpơi apinh Kră Yang 'Bok Kei-Dei oei hơdai sư, ăn kơ sư tŏk năm!” 11-Nov-2014@18:29, Backup Description=