Read bahnar II Ho 5 Bible Online

II Ho 5 - bahnar bible

II Ho 5

¹Lăp, dôm tơdrong jang Sôlômôn pơm hnam Kră Yang đang keh boih, Sôlômôn iŏk tơmơ̆t dôm tơmam mă 'bă sư Đawit pơyơ̆r: Hu, maih păng đĭ-đăng tơmam yua, tah lăm hnam mong tơmam hnam Kră Yang 'Bok Kei-Dei.

²Sôlômôn krao akŭm đĭ-đăng lu kră bơngai Isơrael, lu yŏng kơdră lăm rim adrĕch 'bă Sư păng lu kră pơgơ̆r kon pơlei Isơrael tơ pơlei Jêrusalem wă tung tơmơ̆t Hom tơdrong pơgơ̆p Kră Yang đơ̆ng Siôn, noh pơlei Đawit.

³Đĭ-đăng lu drŏ-nglo bơngai Isơrael akŭm năm tơ pơtao wă pơm giĕng trŏ lăm khei tơpơh.

⁴Wă đĭ-đăng lu kră bơngai Isơrael truh na lu bơngai Lêwi tung ba Hom Pơgơ̆p noh.

⁵Lu 'bok soi bơngai Lêwi năm tung ba Hom Pơgơ̆p păng Bơsŭn Anih Akŭm hăm đĭ dôm tơmam rơgoh yua lăm noh.

⁶Pơtao Sôlômôn păng đĭ-đăng lu bơngai Isơrael akŭm hơdai pơtao dơ̆ng 'bơ̆t anăp Hom Pơgơ̆p, lu sư pơyơ̆r triu, rơmo wă pơm tơmam soi lơ dêh, ưh pă kĕ chih jô̆.

⁷Lu 'bok soi tung tơmơ̆t Hom Pơgơ̆p Kră Yang tơ lăm anih 'măn lê̆ kơ Hom Pơgơ̆p, tơ anih 'Lơ̆ng Rơgoh Hloh lăm hnam Kră Yang 'Bok Kei-Dei, tơ ala lu pơnăr rup chêrubim.

⁸Chêrubim bơyar pơnăr sư kơpal kơ Hom Pơgơ̆p, gom klơ̆p Hom Pơgơ̆p păng đĭ 'long tơnung tung Hom.

⁹'Long tơnung tung Hom Pơgơ̆p kơjung, na đơ̆ng anăp lăm anih 'Lơ̆ng Rơgoh lăng 'bôh, mă-lei lăng đơ̆ng 'nguaih ưh kơ 'bôh; Hom Pơgơ̆p noh oei đei tơ lăm noh dĭng truh tơ dang ei.

¹⁰Lăm Hom Pơgơ̆p ưh kơ đei kiơ, 'nguaih kơ 'bar tŏ gô 'bang khôi juăt mă Môis đei tah lăm noh tơ Kông Hôrêp, kơplah Kră Yang pơgơ̆p hăm kon pơlei Isơrael, 'bơ̆t lu sư 'nao lĕch đơ̆ng char Êyiptơ.

¹¹Lu 'bok soi kơdŭn lĕch đơ̆ng anih 'Lơ̆ng rơgoh, đĭ-đăng lu 'bok soi lu sư athei hơmet kơdih rơgoh, mă khan lu sư khŭl ayơ.

¹²Lu bơngai Lêwi hơri, noh Asap, Hêman păng Jêđuthun, lu kon drŏ-nglo sư lu 'nhŏng oh sư hrŭk hơbĕn ao che 'bui se rơmuăn, preh chhar, reh brŏ dung, tĭng-nĭng đĭ-đăng lu sư dơ̆ng gah hơlĕch kơ chơnang soi hơdai hăm minh-hrĕng 'bar-jĭt 'nu 'bok soi hlôm keng.

¹³Lu bơngai hlôm keng hăm lu bơngai hơri hơdai minh pôm nơ̆r tơ'nguơ̆ hrơ̆p hrơ̆p, na hơri bơnê ư-ang kơ Kră Yang, lu sư hơri hơdai hăm re keng, ot preh chhar reh brŏ dung hăm lu brŏ nai hơri ư-ang kơ Kră Yang khan: “Sư 'lơ̆ng 'mêm mơnat iơ̆m dim Sư oei oei ling-lang,” Kơplah noh hnam Kră Yang đei hơmơ̆l gom;

¹⁴dĭng mah lu 'bok soi ưh kơ kĕ dơ̆ng wă bơ̆jang yua kơ hơmơ̆l jur tơdrong ư-ang rang mơnhal đơ̆ng Kră Yang mơ̆t 'bĕnh-'bang jơ̆p-jang kơ hnam akŭm 'Bok Kei-Dei.