Read bahnar Eso 1 Bible Online

Eso 1 - bahnar bible

Eso 1

¹Sơnăm blŭng-a lăm chăl Sirus, pơtao pơgơ̆r dêh char Phersia, Kră Yang wă pơsĭt nơ̆r Sư đei yua 'bơ̆r Jêrêmi đei khan, na Sư pơm ăn kơ jơhngơ̆m Sirus, pơtao Phersia ră roi jơ̆p-jang kơ teh đak sư kơdih păng kư̆m đei chih hla bơar tơjur nơ̆r sư thoi âu:

²Sirus pơtao Phersia, khan thoi âu: Kră Yang Kră Yang 'Bok Kei-Dei đei ăn kơ inh pơgơ̆r dôm lu dêh char lăm teh đak păng kơdih Sư athei inh pơm kơ Sư minh pôm hnam akŭm tơ pơlei Jêrusalem, lăm dêh Juđa.

³Bơngai bu lăm lu iĕm, mă kon pơlei Sư, athei wih brŏka tơ pơlei Jêrusalem dêh Juđa, wă pơm ming dơ̆ng hnam akŭm Kră Yang, Sư boih Kră Yang 'Bok Kei-Dei lu bơngai Isơrael, mă oei lăm pơlei Jêrusalem. Hơpơi kơ Kră Yang 'Bok Kei-Dei bơngai noh oei hơdai hăm sư!

⁴Lu bơngai Juđa mă oei arih, mă khan oei tơ yơ, kon pơlei mă tơ anih lu sư oei, athei tơgŭm lu sư hu, maih, mŭk tơmam, sem dơrong, wă pơm hnam akŭm Kră Yang 'Bok Kei-Dei, ưh kơ jô̆ lu tơmam đei pơyơ̆r boih tơ lăm hnam akŭm Kră Yang 'Bok Kei-Dei tơ pơlei Jêrusalem.

⁵Kơplah noh, lu kơdră adrĕch Juđa păng Bênjamin, lu 'bok soi păng bơngai Lêwi, đĭ-đăng dôm lu đe bu mă Kră Yang 'Bok Kei-Dei đei pơtrŭt lăm jơhngơ̆m lu sư wă, năm pơjing hnam akŭm Kră Yang tơ pơlei Jêrusalem.

⁶Lu kon pơlei oei lăm tơring ei lu sư tơgŭm tơmam ngăl, ăn kơ lu sư tơmam păng hu păng maih, mŭk tơmam, sem dơrong păng dôm lu tơmam gĭt, ưh kơ jô̆ lu tơmam mă đe đei pơyơ̆r nai.

⁷Pơtao Sirus kư̆m pơdrâu dôm lu tơmam yua lăm hnam akŭm Kră Yang, mă đêl Nebukatnessar đei iŏk đơ̆ng pơlei Jêrusalem păng tah 'măn lăm hnam yang sư.

⁸Sirus, pơtao Phersia, athei Mitrêdat, bơngai wei tơmam, iŏk lu tơmam yua lăm hnam akŭm tơlĕch đĭ tơ 'nguaih, jô̆ păng pơjao kơ Sêsbasar kuan tih lăm dêh Juđa.

⁹'Nâu kơsô̆ lu tơmam yua lăm hnam akŭm ei: Pêng-jĭt tŏ pơnhan chhĕr maih, minh-rơbâu tŏ kơthao hu, 'bar-jĭt tơsĭn tŏ săng,

¹⁰pêng-jĭt hlak pơnhan maih, puăn-hrĕng mơjĭt hlak pơnhan hu, lei-lăi, minh-rơbâu tŏ tơmam yua nai dơ̆ng.

¹¹Jô̆ đĭ-đăng kơsô̆ tơmam yua lăm hnam akŭm mă đe pơm păng hu păng maih ei pơđăm-rơbâu puăn-hrĕng tŏ. Kơplah lu bơngai Isơrael đe rôp pơm bơnă oei tơ Babilôn đei chông wih brŏk tơ pơlei Jêrusalem, na Sêsbasar kư̆m chĕp ba hloi dôm lu tơmam ei.