Read bahnar Eso 6 Bible Online

Eso 6 - bahnar bible

Eso 6

¹Pơtao Đarius sư athei đe chă lăng hơlen tơ lăm anih tah hla bơar, anih mong tơmam tơ Babilôn.

²Đe chă 'bôh tơ lăm hnam pơtao tơ pơlei Ekbatana tơ lăm tơring Mêđi, đei minh sơ̆p hla bơar so sơ̆ đei 'măn lê̆ đei chih thoi âu:

³Sơnăm blŭng-a chăl Sirus pơm pơtao, pơtao Sirus đei chih tơjur ăn hla bơar gah tơdrong pơm hnam akŭm Kră Yang 'Bok Kei-Dei tơ Pơlei Jêrusalem thoi âu: Pơm ming bĕ hnam akŭm Kră Yang 'Bok Kei-Dei, wă pơm anih pơyơ̆r dôm lu tơmam soi; lu hơnă sư athei pơm mă kơjăp, kơjung sư pêng-jĭt hlok tor sư pêng-jĭt hlok;

⁴pơm pêng trong tơmo tih păng minh trong hơpok 'long 'nao; mă jên pơhuach pơm noh iŏk đơ̆ng lăm hnam mong tơmam pơtao ăn.

⁵Đơ̆ng noh dơ̆ng, lu tơmam gĭt pơm hăm maih păng hăm hu lăm hnam Kră Yang 'Bok Kei-Dei, mă Nebukatnessar đei iŏk đơ̆ng lăm hnam akŭm tơ Pơlei Jêrusalem chĕp ba tơ Babilôn, athei pơdrâu păng chĕp ba tơ hnam akŭm Pơlei Jêrusalem; ih athei dan đêl tơ anih so sư lăm hnam Kră Yang 'Bok Kei-Dei.

⁶Thoi noh dang ei, ơ Tatênai pơm 'bok pơgơ̆r gah bơmơ̆t đak krong, Sêthar Bôsênai păng đĭ-đăng lu bơngai bơ̆jang tơ Aphatsak gah to đak krong, athei weh bĕ đơ̆ng noh;

⁷athei lê̆ 'bok kuan wei-lăng lu bơngai Juđa păng lu bơngai kơdră pơgơ̆r lu sư pơjing hnam akŭm Kră Yang 'Bok Kei-Dei tơ anih so sư.

⁸'Nâu nơ̆r inh athei, iĕm athei pơm kiơ̆ hăm lu đe kơdră pơgơ̆r kon pơlei Juđa, wă tơgŭm pơm dơ̆ng hnam akŭm Kră Yang 'Bok Kei-Dei: Athei iŏk dôm lu tơmam đei ra đơ̆ng gah to đak krong, jah ăn jên 'nĕ kơ hiơ̆ ăn kơ lu bơngai noh, wă kơ tơdrong jang ưh kơ đei layơ kơtĕch pơdơh.

⁹Rim năr athei ăn kơ lu 'bok soi tơ Jêrusalem lu tơmam soi mă kăl hloh wă kơ sư pơyơ̆r ăn kơ Kră Yang 'Bok Kei-Dei rơmo tơno, triu tơno, triu tơno kon, 'ba mi, 'boh, sik, dah đak rơmă, 'nĕ kơ kơ'bah ôh,

¹⁰wă kơ lu sư soi pơyơ̆r lu tơmam soi 'bâu phu ăn kơ Kră Yang 'Bok Kei-Dei kơpal plĕnh lăp đon păng krao khan kơ tơdrong arih pơtao păng lu kon drŏ-nglo inh.

¹¹Inh đei nơ̆r tơtă thoi âu: Tơdah đe bu pơjah hăm nơ̆r inh đei chih tơjur âu, na athei hor iŏk minh pôm 'long hơpok đơ̆ng hnam bơngai noh păng chô̆ hơtol sư tơ noh, yua kơ tơdrong yoch noh, pơm kơ hnam sư jing anih đe tuh 'bruih 'brăm.

¹²Apinh Kră Yang 'Bok Kei-Dei, Tơ'ngla mă pơm ăn kơ anăn Sư oei lăm hnam akŭm noh, pơrăm lê̆ pơtao ayơ, kon pơlei ayơ mă pơ̆n yơ̆r ti pơjah hăm nơ̆r đei tơjur âu wă pơrăm hnam akŭm Kră Yang 'Bok Kei-Dei tơ pơlei Jêrusalem. Inh Đarius đei chih tơjur nơ̆r tơtă âu. Athei pơm kiơ̆ nơ̆r âu mă pơ'lơ̆ng!

¹³Tatênai, 'bok kuan tih pơgơ̆r dêh gah to đak krong, Sêthar Bôsênai păng lu bơngai bơ̆jang hơdai lu sư, lu sư pơm kiơ̆ 'blep trŏ thoi nơ̆r pơtao Đarius đei tơtă.

¹⁴Thoi noh, lu đe kră pơgơ̆r kon pơlei Juđa pơtơm pơjing ming dơ̆ng hnam akŭm, tơdrong jang pŭn hiôk tơpă, 'blep trŏ thoi nơ̆r Hagai păng Sachari khan lê̆ adrol, kon drŏ-nglo Iđô. Thoi noh lu sư pơm keh hnam akŭm kiơ̆ kơ nơ̆r tơtă đơ̆ng Kră Yang 'Bok Kei-Dei lu đe Isơrael păng kư̆m kiơ̆ kơ nơ̆r tơjur đơ̆ng Sirus, Đarius păng Artaserses pơtao dêh char Phersia.

¹⁵Năr mă pêng khei Adar, trŏ kơ sơnăm mă tơdrâu chăl pơtao Đarius, hnam akŭm âu pơm keh.

¹⁶Kon pơlei Isơrael, lu 'bok soi bơngai Lêwi noh lu bơngai mă đe rôp pơm bơnă wih brŏk, đĭ-đăng lu sư chơt hiôk pơm giĕng et sa pơih hnam akŭm Kră Yang 'Bok Kei-Dei keh.

¹⁷Gah tơdrong pơm giĕng et sa pơih hnam akŭm keh âu, lu sư pơyơ̆r minh-hrĕng tŏ rơmo dăm, 'bar-hrĕng tŏ triu dăm, puăn-hrĕng tŏ triu tơno păng kiơ̆ kơ lu adrĕch bơngai Isơrael, lu sư pơyơ̆r mơjĭt-'bar tŏ bơbe dăm pơm tơmam soi huai đơ̆ng yoch ăn kơ mơjĭt-'bar adrĕch bơngai Isơrael.

¹⁸Lu 'bok soi păng lu bơngai Lêwi kiơ̆ kơ khŭl lu sư klah asong wă bơ̆jang kơ Kră Yang 'Bok Kei-Dei tơ Pơlei Jêrusalem, kiơ̆ thoi lăm sơ̆p hla bơar Môis đei chih.

¹⁹Trŏ năr mơjĭt-puăn khei mônh, lu bơngai đêl đe đei rôp pơm bơnă wih brŏk, 'blŏk pơm giĕng năm brih.

²⁰Lu 'bok soi păng bơngai Lêwi, đĭ-đăng lu sư hơmet akâu kơdih wă kơ rơgoh, na pơlôch triu năm brih ăn kơ đĭ-đăng lu bơngai đêl pơm bơnă wih brŏk ăn kơ lu 'nhŏng oh 'bok soi lu sư kơdih păng yua kơ kơdih akâu, pơm sŏng sa giĕng năm brih âu hơdai hăm lu bơngai Isơrael.

²¹Lu bơngai Isơrael hŭt lê̆ tơdrong kơkuh kơ yang kư̆ kă, lu sư kiơ̆ bơngai Isơrael, wă krao chă Kră Yang 'Bok Kei-Dei đe Isơrael.

²²Lăm tơpơh năr lu sư 'blŏk pơm giĕng 'bĕng ưh kơ đei 'buih pông lu sư đei jơhngơ̆m hiôk chơt; yua kơ Kră Yang pơm ăn păng pơm ăn kơ jơhngơ̆m pơtao Asiri đei mơnat, tơgŭm lăm tơdrong pơjing pơm hnam akŭm Kră Yang 'Bok Kei-Dei đe Isơrael.