Read bahnar Eso 8 Bible Online

Eso 8 - bahnar bible

Eso 8

¹'Nâu, lu kơdră mă pơgơ̆r adrĕch adrung, khŭl bơngai đơ̆ng Babilôn wih hăm inh, lăm chăl pơtao Artaserses pơgơ̆r.

²Gah kon sâu Phinêhas đei Gersôm; gah kon sâu Ithamar đei Đaniel; gah kon sâu Đawit đei Hatus;

³Hatus kon sâu Sêkania, kon sâu Pharôs đei Sachari; păng lu bơngai oei hơdai sư; kiơ̆ kơ jô̆ adrĕch adrung đei minh-hrĕng pơđăm-jĭt 'nu drŏ-nglo;

⁴Gah kon sâu Phahat Môap đei Êlihôênai kon drŏ-nglo Sêrahia hăm đĭ lu sư đei 'bar-hrĕng 'nu drŏ-nglo;

⁵Gah kon sâu Satu đei Sêkania kon drŏ-nglo Jahasiêl păng đĭ lu sư đei pêng-hrĕng 'nu drŏ-nglo;

⁶Gah kon sâu Adin đei Êbêt kon drŏ-nglo Jônathan păng đĭ-đăng đei pơđăm-jĭt 'nu drŏ-nglo;

⁷gah kon sâu Êlam đei Jêsaia, kon drŏ-nglo Athalia păng đĭ-đăng đei tơpơh-jĭt 'nu drŏ-nglo nơ̆r âu: Esơra sư khan thoi âu: Nơ̆r âu ưh kơ đei lăm sơ̆p hla bơar tơm.

⁸Gah kon sâu Sêphatia đei Sêbađia, kon drŏ-nglo Mikel păng đĭ-đăng đei tơhngam-jĭt 'nu drŏ-nglo;

⁹gah kon sâu Jôap đei Abdia, kon drŏ-nglo Jêhiêl păng đĭ-đăng đei 'bar-hrĕng jĭt tơhngam 'nu drŏ-nglo;

¹⁰gah kon sâu Bani đei Sêlômit kon drŏ-nglo Jôsiphia păng đĭ-đăng đei minh-hrĕng tơdrâu-jĭt 'nu drŏ-nglo;

¹¹gah kon sâu Bêbai, đei Sachari, kon drŏ-nglo Bêbai păng đĭ-đăng đei 'bar-jĭt tơhngam 'nu drŏ-nglo;

¹²Gah kon sâu Agat đei Jôhanan, kon drŏ-nglo Hakatan păng đĭ-đăng đei minh-hrĕng mơjĭt 'nu drŏ-nglo;

¹³Lu bơngai oei gah kon sâu Ađônikam truh hơtuch hloh kơ đĭ-đăng; anăn lu sư: Êliphêlet, Jêuel păng Sêmaia păng lu sư đĭ-đăng đei tơdrâu-jĭt 'nu drŏ-nglo;

¹⁴gah kon sâu Bikwai đei Uthai hăm Sakur păng đi lu sư đei tơpơh-jĭt 'nu drŏ-nglo.

¹⁵Inh krao akŭm lu sư jê̆ đak krong ro tơ Ahawa đơ̆ng noh lu nhôn pơm anih tơ noh pêng năr, đơ̆ng noh inh chă lăng lu kon pơlei păng 'bok soi, mă-lei ưh kơ 'bôh bơngai Lêwi ôh.

¹⁶Inh hloi wơh đe năm krao Adrĕch adrung Êliêser, Ariêl, Sêmaia, Êlnathan, Jarip Êlnathan, Nathan, Sachari păng Mêsulam, jing yŏng păng kư̆m krao Jôiarip păng Êlnathan hloi, bơngai đei 'bơ̆r đon.

¹⁷Inh wơh lu sư năm khan kơ kơdră Iđô tơ pơlei Kasiphia, inh bơtho kơ sư wă pơma khan kơ Iđô thoi yơ păng lu 'nhŏng oh sư, lu bơngai bơ̆jang tơ lăm hnam akŭm Kasiphia, wă apinh gơih ăn kơ lu nhôn lu bơngai gơh jang tơgŭm lăm hnam akŭm Kră Yang 'Bok Kei-Dei lu bơ̆n.

¹⁸Yua kơ đơ̆ng ti Kră Yang 'Bok Kei-Dei lu bơ̆n tơgŭm, lu sư ba ăn tơ lu bơ̆n minh 'nu bơngai hơgei, sư adrĕch adrung Mahli, noh kon drŏ-nglo Lêwi kon drŏ-nglo Isơrael, hăm Sêrêbia păng lu kon drŏ-nglo sư hăm lu 'nhŏng oh sư, đei mơjĭt-tơhngam 'nu;

¹⁹kư̆m đei Hasabia păng Jêsaia, lăm adrĕch Mêrari, hăm lu 'nhŏng oh sư păng lu kon drŏ-nglo sư, đei 'bar-jĭt 'nu;

²⁰lăm lu bơngai Nêthinim na mă Đawit păng lu kơdră wei-lăng đei song ăn tơgŭm tơdrong jang bơngai Lêwi, đei 'bar-hrĕng 'bar-jĭt 'nu đĕch, đĭ lu sư đei chih tơmơ̆t anăn ngăl.

²¹Tơ jê̆ đak krong Ahawa, inh athei đĭ-đăng ơ̆t kơ sŏng sa, wă kơ bơ̆n drap kơkuh 'bơ̆t anăp Kră Yang 'Bok Kei-Dei lu bơ̆n, krao apinh sư tơ'bôh ăn kơ bơ̆n kon sâu lu bơ̆n păng tơmam bơ̆n đei hiôk-hian kơplah bơ̆n yak rok trong.

²²Mă-lei inh, mơlâu, ưh kơ pơ̆n apinh pơtao ăn minh grŭp linh păng linh hao seh, dŏng tơgŭm lu bơ̆n đơ̆ng ayăt kơplah lu bơ̆n năm rok trong; yua kơ lu bơ̆n đei khan kơ pơtao thoi âu: Ti Kră Yang 'Bok Kei-Dei lu nhôn wei-lăng tơgŭm lu bơngai băt krao chă Sư; mă-lei tơdrong mơsêh păng tơdrong hil mĭl Sư blah lu bơngai bu mă blah Sư.

²³Thoi ei, lu bơ̆n athei ơ̆t kơ sŏng sa wă krao khan apinh Sư ăn kơ bơ̆n yak hiôk-hian gô tơl tơwih nơ̆r Kră Yang 'Bok Kei-Dei lu bơ̆n.

²⁴Lăm lu 'bok soi, inh rơih chă mơjĭt-'bar 'nu pơm yŏng kơdră, noh jơ̆ Sêrêbia, Hasabia păng mơjĭt 'nu 'nhŏng oh lu sư;

²⁵đơ̆ng noh, inh kŏng ăn kơ lu sư, hu, maih păng lu tơmam hnam akŭm đe pơyơ̆r kơ Kră Yang 'Bok Kei-Dei, tơmam noh đơ̆ng pơtao lu bơngai hơgei, lu 'bok kuan tih pơtao, hăm đĭ-đăng bơngai Isơrael tơ noh pơyơ̆r.

²⁶Thoi noh, inh kŏng pơjao ăn kơ lu sư đei tơdrâu-hrĕng pơđăm-jĭt talâng jên hu, tơmam yua pơm păng hu trăp sư minh-hrĕng talâng hlak jên hu păng đĭ minh-hrĕng talâng hlak jên maih,

²⁷'bar-jĭt tŏ pơnhan maih tĕch sư noh minh-rơbâu đariêk păng 'bar tŏ pơnhan tô pơm păng kong rang 'lơ̆ng hloh, kư̆m gĭt thoi maih mơ̆n.

²⁸Na inh khan kơ lu sư thoi âu: Lu iĕm jơ̆ bơngai 'lơ̆ng rơgoh Kră Yang păng lu tơmam yua lăm hnam Kră Yang 'Bok Kei-Dei noh kư̆m 'lơ̆ng rơgoh mơ̆n. Hu păng maih âu jơ̆ tơmam soi pơyơ̆r lăp đon Kră Yang Kră Yang 'Bok Kei-Dei 'bok lu iĕm.

²⁹Athei bơwei sư mă tơnen dĭng truh tơ layơ lu iĕm kŏng dơ̆ng jao ăn 'bơ̆t anăp đe 'bok soi păng bơngai Lêwi, hăm 'bơ̆t anăp lu kơdră adrĕch adrung đe Isơrael tơ pơlei Jêrusalem, lăm hnam mong tơmam hnam akŭm Kră Yang.

³⁰Thoi noh lu 'bok soi păng lu bơngai Lêwi, đơ̆ng rŏng kơ lu sư đei kŏng lăng lu hu, maih păng lu tơmam yua lăm hnam noh đang boih, na akŭm pơpôi iŏk na chĕp ba tơ pơlei Jêrusalem, tah lăm hnam akŭm kơkuh kơ Kră Yang 'Bok Kei-Dei lu bơ̆n.

³¹Năr mơjĭt-'bar khei mônh, lu nhôn pơtơm yak năm đơ̆ng đak krong Ahawa, wă năm tơ pơlei Jêrusalem. Ti Kră Yang 'Bok Kei-Dei nhôn gô tơgŭm, dŏng pơklaih nhôn đơ̆ng ti lu ayăt, lu bơngai răp trong.

³²Na, nhôn truh tơ pơlei Jêrusalem, oei pơdơh tơ noh pêng năr.

³³Năr mă puăn, lu nhôn kŏng lăng dơ̆ng lu hu, maih păng lu tơmam yua lăm hnam Kră Yang 'Bok Kei-Dei, đơ̆ng noh pơjao ăn kơ Mêrêmôt, kon drŏ-nglo 'bok soi Uri, 'bok soi hơdai hăm sư đei Êlêasar, kon drŏ-nglo Phinêhas, Jôsabat kon drŏ-nglo Jêsua păng Nôađia, kon drŏ-nglo Binnui, bơngai Lêwi.

³⁴Đĭ-đăng tơmam đei kŏng lăng hơlen, trăp dôm yơ chih răk hơđăl dôm noh.

³⁵Lu nhôn bơngai mă đe rôp pơm bơnă gơh wih brŏk dơ̆ng, pơyơ̆r tơmam soi 'buh ăn kơ Kră Yang 'Bok Kei-Dei đe Isơrael đĭ mơjĭt-'bar tŏ rơmo dăm đơ̆ng lăm mơjĭt-'bar adrĕch Isơrael, tơsĭn-jĭt tơdrâu tŏ triu dăm, tơpơh-jĭt tơpơh tŏ triu kon păng mơjĭt-'bar tŏ bơbe dăm wă pơm tơmam soi huai iŏk tơdrong yoch; đĭ-đăng pơm tơmam soi 'buh pơyơ̆r kơ Kră Yang.

³⁶Lu sư pơjao hla bơar nơ̆r tơtă đơ̆ng pơtao ăn kơ lu 'bok kuan wei tơring păng ăn kơ lu 'bok kuan wei pơgơ̆r char gah bơmơ̆t đak krong, na lu sư tơgŭm kon pơlei păng tơdrong jang hnam akŭm Kră Yang 'Bok Kei-Dei.