Read bahnar Ne 11 Bible Online

Ne 11 - bahnar bible

Ne 11

¹Lu kră pơgơ̆r kon pơlei tă kơ oei lăm pơlei Jêrusalem: Gah lu kon pơlei nai đe hlang rơih iŏk minh lăm mơjĭt đơ̆ng lu bơngai noh, năm oei tơ pơlei Jêrusalem, pơlei 'lơ̆ng rơgoh păng lu tơsĭn 'nu noh oei tơ pơlei nai;

²Kon pơlei sơkat ăn pŭn hiôk kơ bơngai drŏ-nglo ayơ mă pơyơ̆r akâu sư oei tơ pơlei Jêrusalem.

³'Nâu lu bơngai pơm yŏng đơ̆ng rim tơring oei tơ lăm pơlei Jêrusalem; mă-lei lăm lu pơlei iĕ char Juđa, rim 'nu oei kơtă lăm pơlei lu sư kơdih: Noh kon pơlei Isơrael, lu 'bok soi, bơngai Lêwi, bơngai kră hnam yang păng lu kon sâu lu đĭch đam Sôlômôn.

⁴Đei mơ'nah lu bơngai Juđa păng bơngai Bênjamin oei lăm pơlei Jêrusalem, lu kon drŏ-nglo Juđa đei Athaia, kon drŏ-nglo Usia, sâu tơm Sachari, sâu i Amaria, sâu ach Sephêtia; Sephêtia kon drŏ-nglo Mahalalel lăm kon sâu adrĕch adrung Pêres.

⁵Đei đơ̆ng Masêia, kon drŏ-nglo Baruk, sâu tơm Kôlhôse, sâu i Hasaia, sâu ach Ađaia; Ađaia kon drŏ-nglo Jôiarip, sâu Sachari adrĕch adrung bơngai pơlei Silô,

⁶lu kon sâu Pêres oei lăm Jêrusalem puăn-hrĕng tơdrâu-jĭt tơhngam 'nu bơngai nuih pran kơtang.

⁷Gah adrĕch adrung Bênjamin đei Salu, kon drŏ-nglo Mêsulan sâu tơm Jôêt, sâu i Pêđaia sâu ach Kôlaia; Kôlaia kon drŏ-nglo Masêia, sâu tơm Ithiêl, sâu i Jêsaia.

⁸Đơ̆ng rŏng kơ sư đei Gapbai păng Salai hăm tơsĭn-hrĕng 'bar-jĭt tơhngam 'nu.

⁹Jôel kon drŏ-nglo Sikri, pơm kră pơgơ̆r lu sư păng Juđa kon drŏ-nglo Hasenua, pơm kră kơiĕng wei-lăng pơlei.

¹⁰Lăm lu 'bok soi đei Jêđaia, kon drŏ-nglo Jôiarip, Jakin.

¹¹Păng Sêraya, kon drŏ-nglo Hilkia, sâu tơm Mêsulam, sâu i Sađôk, sâu ach Mêraiôt; Mêraiôt kon drŏ-nglo Ahitup, bơngai wei-lăng hnam akŭm 'Bok Kei-Dei.

¹²Hăm lu 'nhŏng oh lu sư bơ̆jang lăm hnam akŭm jô̆ tơhngam-hrĕng 'bar-jĭt 'bar 'nu, kư̆m đei đơ̆ng Ađaia, kon drŏ-nglo Jêrôham, sâu tơm Pêlalia, sâu i Amsi, sâu ach Sachari; Sachari kon drŏ-nglo Pasur, sâu Milkiya,

¹³hăm 'nhŏng oh lu sư lu yŏng kơdră hnam 'bă, đei 'bar-hrĕng puăn-jĭt 'bar 'nu, kư̆m đei Amahsai, kon drŏ-nglo Asarel, sâu tơm Ahsai, sâu i Mêsilêmôt, sâu ach Imer,

¹⁴păng 'nhŏng oh lu sư lu bơngai nuih pran kơtang, đei minh-hrĕng 'bar-jĭt tơhngam 'nu, Sapđiên kon drŏ-nglo Hagêđôlim, pơm kră pơgơ̆r lu sư.

¹⁵Lăm lu bơngai Lêwi Sêmaia, kon drŏ-nglo Hasup, sâu Asrikam sâu Hashabia, sâu ach Buni.

¹⁶Lăm lu kră pơgơ̆r bơngai Lêwi đei Sabêthai păng Jôsabat, rơih iŏk wei-lăng tơdrong jang gah 'nguaih kơ lăm hnam akŭm 'Bok Kei-Dei;

¹⁷gah Matiana, kon drŏ-nglo Mika, sâu tơm Sapđi, sâu Asap, pơgơ̆r gah tơdrong jang hơri ư-ang lăm kơplah krao khan, hăm Bakbukia, bơngai mă 'bar lăm lu 'nhŏng oh sư păng Apđa kon drŏ-nglo Sumua, sâu tơm Galal, sâu Jêđuthun.

¹⁸Bơngai Lêwi oei lăm pơlei 'lơ̆ng rơgoh, đei 'bar-hrĕng tơhngam-jĭt puăn 'nu.

¹⁹Lu bơngai wei 'măng jang Akup, Tamôn păng 'nhŏng oh lu sư, lu bơngai gak 'măng jang đei minh-hrĕng tơpơh-jĭt 'bar 'nu.

²⁰Lu bơngai Isơrael nai, lu 'bok soi păng lu bơngai Lêwi oei lăm lu pơlei iĕ dêh Juđa, rim 'nu đei tơdrong jang sa kơdih,

²¹mă-lei lu đĭch đam kră hnam yang; bre Siha păng Gispa pơm yŏng pơgơ̆r lu đĭch đam kră hnam yang.

²²Yŏng pơgơ̆r bơngai Lêwi oei lăm pơlei Jêrusalem noh Usi, kon drŏ-nglo Bani, sâu tơm Hasabia, sâu i Mattania sâu ach Mika adrĕch adrung Asap, khŭl bơngai hơri lu sư tă kơ oei tơ lăm Ôphel, noh kră wei-lăng tơdrong jang lăm hnam akŭm 'Bok Kei-Dei.

²³Yua kơ đei nơ̆r tơtă đơ̆ng pơtao athei trŏ kơ lu sư păng đei pơkă asong tơmam sa kơ lu bơngai hơri, năr ayơ tôm mah kơ lăm năr ei,

²⁴Pêthahia, kon drŏ-nglo Mêsêsabel adrĕch Sêra kon drŏ-nglo Juđa, oei jê̆ pơtao lăm tôm tơdrong jang trŏ kơ kon pơlei.

²⁵Gah lu pơlei păng chŭn mir lu sư, đei lu mơ'nah bơngai Juđa oei tơ Kiriat Arba păng lu pơlei jê̆ sư, lăm pơlei Đibôn păng lu pơlei jê̆ sư, lăm pơlei Jêkapsêl păng lu pơlei jê̆ sư.

²⁶Lăm pơlei Jêsua đei, Môlađa, Bêt Pêlêt,

²⁷Lăm pơlei Hasar Sual, pơlei Bêrsêba păng lăm lu pơlei jê̆ sư,

²⁸Pơlei Siklak, pơlei Mêkôna păng lu pơlei jê̆ sư,

²⁹Ên Rimmôn, pơlei Sôra, pơlei Jarmut,

³⁰pơlei Sanôa, pơlei Ađulam păng lu pơlei jê̆ sư, tơ lăm Lakis păng lu chŭn mir sư, lăm pơlei Asêka păng lu pơlei jê̆ sư, thoi noh lu sư oei đơ̆ng Bêrsêba truh tơ thŭng Hinôm.

³¹Lu Bơngai Bênjamin kư̆m oei đơ̆ng pơlei Gêba truh tơ Mikmas, Aiya, Bethel păng lu pơlei jê̆ sư;

³²pơlei Anatôt, Nop, Anania,

³³pơlei Hasor, Rama, pơlei Gitaim,

³⁴pơlei Hađit, pơlei Sêbôim, pơlei Nêbalat,

³⁵pơlei Lôt păng pơlei Ônô wă khan lăm thŭng lu bơngai bơ̆jang.

³⁶Đei lu mơ'nah bơngai Lêwi oei tơ dêh Juđa arih hơdai hăm lu bơngai Bênjamin.