Read bahnar Ne 12 Bible Online

Ne 12 - bahnar bible

Ne 12

¹'Nâu lu 'bok soi păng bơngai Lêwi, Serubabel, kon drŏ-nglo Salatiêh păng Jêsua: Sêraia, Jêrêmi, Esơra.

²Amaria, Maluk, Hatus,

³Sekania, Rêhum, Mêrêmôt,

⁴Iđô, Ginêthoi, Abija,

⁵Mijamin, Mađai, Bilga,

⁶Sêmaia, Jôiarip, Jêđaia.

⁷Salu, Amok, Hilkia păng Jêđaia, 'Noh yŏng pơgơ̆r, lu 'bok soi păng 'nhŏng oh lu sư lăm chăl Jêsua.

⁸Lu bơngai Lêwi: Jêsua, Binnui, Katmiêl, Serêbia, Juđa păng Matania, bơngai pơgơ̆r tơdrong hơri hơdai hăm lu 'nhŏng oh sư.

⁹Đei Bakbukia, Unô hăm lu 'nhŏng oh lu sư, lu sư dŏng băl lăm tơdrong jang lu sư.

¹⁰Jêsua 'bă kơ Jôiakim; Jôiakim 'bă kơ Êliasip, Êliasip 'bă kơ Jiađa;

¹¹Jiađa 'bă kơ Jônathan păng Jônathan 'bă kơ Jađua.

¹²Lăm chăl Jôiakim; đei lu 'bok soi, lu sư jing bơngai yŏng kơdră kơ hnam dơnŏ 'bă lu sư. Lăm adrĕch Sêraya, đei Mêraia; lăm adrĕch Jêrêmi, đei Hanania;

¹³lăm adrĕch Esơra, đei Mêsulam; lăm adrĕch Amaria, đei Jêhôhanan;

¹⁴gah adrĕch Maluk, đei Jônathan; lăm adrĕch Sebania đei Jôsep;

¹⁵lăm adrĕch Harim, đei Atna, lăm adrĕch Mêraiôt, đei Hêlkai;

¹⁶lăm adrĕch Iđô, đei Sachari; lăm adrĕch Ginêthôn, đei Mêsulam.

¹⁷Lăm adrĕch Abija, đei Sikri; lăm adrĕch Miniamin păng adrĕch Môđia, đei Philtai;

¹⁸lăm adrĕch Bilga, Samua; lăm adrĕch Sêmaia, đei Jêhônathan;

¹⁹lăm adrĕch Jôiarip, đei Matênai; lăm adrĕch Jêđaia, đei Usi;

²⁰lăm adrĕch Salai, đei Kalai; lăm adrĕch Amok, đei Eber;

²¹lăm adrĕch Hilkia, đei Hasabia, lăm adrĕch Jêđaia đei Nêthanel.

²²Lu yŏng kơdră adrĕch 'bă sư lu bơngai Lêwi, lăm chăl Êliasip, Jiađa, Jôhanan păng Jađua; lu 'bok soi hai, chih tơmơ̆t anăn lăm sơ̆p hla bơar truh lăm chăl Đarius pơgơ̆r; teh đak Phersia.

²³Lu kon drŏ-nglo bơngai Lêwi lu yŏng kơdră lăm adrĕch 'bă sư, đe đei chih tơmơ̆t lăm sơ̆p hla bơar tơdrong Hơ'mon lu pơtao truh tơ chăl Jôhanan, kon drŏ-nglo Êliasip.

²⁴Lu kră kơdră lăm bơngai Lêwi: Đei Hasabia, Serêbia păng Jêsua kon drŏ-nglo Katmiel, hơdai hăm 'nhŏng oh lu sư dơ̆ng tơklă băl pơrĕng kiơ̆ khŭl, wă kơkuh bơnê pơm kiơ̆ thoi nơ̆r Đawit bơngai Kră Yang 'Bok Kei-Dei.

²⁵Matinia Bakbukia, Ôbađia, Mêsulam, Tamôn păng Akup, lu bơngai gak 'măng jang wei-lăng gah lu hnam mong tơmam.

²⁶Dôm lu đe âu oei arih lăm chăl Jôiakim kon drŏ-nglo Jêsua, sâu Jôsađăk păng lăm chăl Nêhêmi, pơm kră pơgơ̆r dêh char păng lăm chăl Esơra pơm 'bok soi păng chih hla bơar.

²⁷Kơplah năr pơyơ̆r dur pơlei Jêrasalem keh đang bơih, na đe năm chă lu bơngai Lêwi đơ̆ng jơ̆p kơ anih lu sư oei wă chông ba lu sư brŏk tơ Jêrusalem wă pơih et sa bơnê kơ dur pơm keh hăm tơdrong hiôk chơt, đei nơ̆r bơnê ư-ang păng hơri, reh brŏ, hlôm keng.

²⁸Đĭ lu bơngai hơri akŭm băl, đơ̆ng jum dăr kơ pơlei Jêrusalem, đơ̆ng pơlei bơngai Netôphat.

²⁹Đei mơ̆n đơ̆ng pơlei Bêt Gilgal, đơ̆ng tơring Gêba păng Asmawet yua kơ lu bơngai hơri đei pơm pơlei lu sư oei jum dăr kơ pơlei Jêrusalem.

³⁰Lu 'bok soi păng lu bơngai Lêwi păng hơmet kơdih wă kơ 'lơ̆ng rơgoh kư̆m hơmet ăn kơ kon pơlei wă kơ 'lơ̆ng rơgoh, lu 'măng jang păng dur pơlei kư̆m rơgoh mơ̆n.

³¹Na inh athei yŏng pơgơ̆r bơngai Juđa tŏk tơ kơpal dur đơ̆ng noh klah song pơm 'bar khŭl lơ pơrĕng nơnăm wă bơnê ư-ang. Minh khŭl nơnăm gah 'ma kơpal dur, truh tơ 'măng jang Mơ̆r.

³²Đơ̆ng rŏng lu sư noh đei Hôsaia păng đei minh puăt lu kră pơgơ̆r bơngai Juđa nơnăm.

³³Hơdai hăm Asaria, Esơra, Mêsulam,

³⁴Juđa, Bênjamin, Sêmaia, Jêrêmi,

³⁵păng lu kon drŏ-nglo 'bok soi mơ'nah hlôm keng; Sachari kon drŏ-nglo Jônathan, sâu tơm Sêmaia, sâu i Matania, sâu ach Mika; Mika kon drŏ-nglo Sakur, sâu Asap;

³⁶hăm 'nhŏng oh sư, Sêmaia, Asarel, Milalai, Gilalai, Mai, Nêthanêl, Juđa păng Hanani, chĕp reh brŏ hơri Đawit, bơngai Kră Yang 'Bok Kei-Dei păng Esơra, bơngai chih hla bơar, nơnăm adrol kơ lu sư.

³⁷Đơ̆ng 'măng jang Tu đak, lu sư tŏk tơpăt truh tơ kung pơlei Đawit, truh tơ anih tŏk kơ dur tơ kơpơ̆ng hnam pơtao Đawit păng truh tơ 'măng jang Đak tơ gah hơlĕch.

³⁸Khŭl mă 'bar lăm lu khŭl bơnê ư-ang nơnăm yak gah 'ngiĕo, inh nơnăm đơ̆ng rŏng lu sư hơdai hăm minh puăt lu kon pơlei, đơ̆ng hnam thôt Tơnuh ŭnh truh tơ dur să.

³⁹Năm kơpơ̆ng kơ 'măng jang Êphraim, jê̆ 'măng jang So 'măng jang Ka, hnam thôt Hananêl păng hnam thôt Minh-hrĕng truh tơ 'măng jang Triu lu sư pơdơh 'bơ̆t 'măng jang Gak.

⁴⁰Thoi noh 'bar khŭl bơnê ư-ang noh pơdơh mơ̆t lăm hnam akŭm Kră Yang 'Bok Kei-Dei, inh păng minh puăt lu kră pơgơ̆r kiơ̆ hơdai inh.

⁴¹Păng lu 'bok soi: Êliakim, Masêia, Miniamin, Mika, Êliôenai, Sachari păng Hanania, chĕp keng hlôm.

⁴²Păng đei Mêsaia, Sêmaia, Êlêasar, Usi, Jêhôhanan, Malkija, Êlam păng Êser, lu bơngai hơri, đei Jêrahia pơgơ̆r hơri.

⁴³Lăm năr noh, lu sư pơyơ̆r tơmam soi gĭt tih păng hiôk chơt; yua kơ Kră Yang 'Bok Kei-Dei ăn kơ lu sư đei hiôk chơt tih; lu bơngai drŏ-kăn păng lu kon hơ'lơ̆p kư̆m hiôk chơt mơ̆n, đe kơtơ̆ng jơwa re tơdrong hiôk chơt kơ pơlei Jêrusalem truh tơ ataih.

⁴⁴Lăm năr noh, đe rơih chă bơngai wei-lăng lu hnam mong tơmam pơyơ̆r plei blŭng-a lăm bơyan iŏk minh lăm mơjĭt, wă tah mong lăm noh, đei pơkă boih kiơ̆ kơ lu 'bok soi păng bơngai Lêwi, kư̆m đei pơkă kiơ̆ kơ đei chŭn mir tăp dăr kơ pơlei; yua kơ lu bơngai Juđa hiôk chơt yua kơ lu 'bok soi păng bơngai Lêwi oei bơ̆jang awih awăn.

⁴⁵Lu sư bơ̆jang kơ Kră Yang lu sư păng hơmet kơdih akâu 'lơ̆ng rơgoh thoi lu bơngai hơri păng lu gak 'măng jang, pơm kiơ̆ nơ̆r đơ̆ng Đawit tơtă păng kon drŏ-nglo sư Sôlômôn, bơwei tơdrong jang đơ̆ng Kră Yang 'Bok Kei-Dei pơjao.

⁴⁶Yua kơ lăm chăl Đawit păng Asap sơ̆, đei minh 'nu kră pơgơ̆r wei-lăng lu bơngai hơri, đei 'bai hơri bơnê kơkuh ư-ang kơ Kră Yang 'Bok Kei-Dei.

⁴⁷Lăm chăl Serubabel păng Nêhêmi, lu bơngai Isơrael athei asong ăn tơmam sa kơ lu bơngai hơri păng lu bơngai gak 'măng jang, kiơ̆ kơ lu sư yua rim năr; akŭm klah asong 'măn phe 'ba kơ lu bơngai Lêwi păng lu bơngai Lêwi klah asong ăn dơ̆ng phe 'ba kơ lu kon sâu 'bok Arôn.